آج ہفتے کے روز 18 عرب اور اسلامی ممالک کے وزرائے خارجہ نے غزہ کی پٹی کے شہر خان یونس میں ناصر میڈیکل کمپلیکس کو نشانہ بنانے والے اسرائیلی فضائی حملے کی مذمت کرتے ہوئے اس بات پر زور دیا ہے کہ اسرائیل پر لازم ہے کہ وہ جنگ بندی کی پابندی کرے اور شہریوں کا تحفظ یقینی بنائے۔
یہ بات سعودی عرب، متحدہ عرب امارات، قطر، کویت، سلطنت عمان، مصر، اردن، سوڈان، لیبیا، فلسطین، جبوتی، صومالیہ، الجزائر، لبنان، موریطانیہ، ترکیہ، پاکستان اور انڈونیشیا کے وزرائے خارجہ کی جانب سے جاری کردہ ایک مشترکہ بیان میں کہی گئی ہے۔
بیان میں خان یونس میں ناصر میڈیکل کمپلیکس کو نشانہ بنانے والے اسرائیلی فضائی حملے کی “سخت ترین الفاظ میں” مذمت کی گئی ہے۔ اس حملے کے نتیجے میں مریض اور طبی عملے کے افراد شہید و زخمی ہوئے اور اسے “بین الاقوامی انسانی قانون کی خلاف ورزی قرار دیا گیا ہے جو طبی تنصیبات اور صحت کے شعبے میں کام کرنے والے افراد کو خصوصی تحفظ فراہم کرتا ہے”۔
وزراء نے “فلسطینی شہریوں پر جاری اسرائیلی حملوں، بشمول خیموں اور بے گھر افراد کو پناہ دینے والے دیگر مقامات کو نشانہ بنانے” کی بھی مذمت کی۔ بیان میں کہا گیا کہ یہ حملے جنگ بندی کے معاہدے اور غزہ کی پٹی میں امن و استحکام بحال کرنے کی کوششوں کو سبوتاژ کرتے ہیں، نیز یہ امریکی صدر ڈونلڈ ٹرمپ کے جامع منصوبے سے بھی متصادم ہیں۔
وزراء نے انسانی امداد اور پناہ گاہوں کے سامان بشمول خیموں، کارواں اور موبائل گھروں کے علاوہ طبی سامان کے داخلے پر عائد اسرائیلی پابندیوں کے تسلسل پر شدید تشویش کا اظہار کیا، جس کے باعث موسم سرما کی آمد کے ساتھ ہی غزہ کی پٹی میں انسانی المیہ مزید سنگین ہوتا جا رہا ہے۔ بیان میں اس بات پر زور دیا گیا کہ “مناسب پناہ گاہوں کی کمی اور پانی، نکاسی آب اور صحت کی دیکھ بھال کی خدمات کی ابتر صورتحال شہریوں بالخصوص بچوں اور شیر خوار بچوں کی زندگیوں کو شدید خطرے میں ڈال رہی ہے، جنہیں شدید سرد موسم کی وجہ سے ایک بار پھر موت کے خطرے کا سامنا کرنا پڑ سکتا ہے”۔
وزراء نے اسرائیل سے مطالبہ کیا کہ وہ امداد میں اضافے کے لیے عالمی برادری اور امن کونسل کی اپیلوں کا مثبت جواب دے اور شرم الشیخ معاہدے، صدر ٹرمپ کے جامع منصوبے اور سال 2025 کی اقوام متحدہ کی سلامتی کونسل کی قرارداد نمبر 2803 کے تحت اپنی ذمہ داریوں کو فوری اور مکمل طور پر پورا کرے۔
بیان میں مزید کہا گیا کہ “اسرائیل پر لازم ہے کہ وہ جنگ بندی کی پابندی کرے، شہریوں اور طبی تنصیبات کا تحفظ کرے اور انسانی امداد کی مناسب مقدار میں، محفوظ، پائیدار اور بلا روک ٹوک ترسیل کو یقینی بنائے، جس میں بنیادی ڈھانچے کی بحالی کے لیے ضروری پناہ گاہوں اور ابتدائی بحالی کا سامان و آلات بھی شامل ہیں۔ نیز اس پر لازم ہے کہ وہ اقوام متحدہ کے اداروں اور انسانی ہمدردی کی تنظیموں کو بغیر کسی رکاوٹ کے اپنے فرائض انجام دینے کی اجازت دے”۔
بیان میں کہا گیا “چونکہ معاہدے پر دستخط ہوتے ہی پہلے مرحلے کی ذمہ داریوں پر عمل درآمد شروع ہونا طے پایا تھا، اس لیے اسرائیل پر لازم ہے کہ وہ کسی مزید تاخیر یا دیگر شرائط عائد کیے بغیر ان پر عمل درآمد کرے۔ ان میں وہ سیاسی اور سکیورٹی شرائط بھی شامل ہیں جو انسانی امداد کی ترسیل میں رکاوٹ بنتی ہیں۔ مزید برآں، فوری انسانی ضروریات کو پورا کرنے کا عمل بعد کے مراحل میں پیش رفت سے آزادانہ طور پر انجام دیا جانا چاہیے”۔
وزراء نے امریکہ اور امن کونسل سے، ہر ایک سے اس کے دائرہ کار کے تحت، مطالبہ کیا کہ وہ ان ذمہ داریوں پر اسرائیل کے مکمل عمل درآمد اور انسانی امداد کے داخلے پر عائد تمام پابندیوں کے خاتمے کو یقینی بنانے کے لیے اپنی کوششیں تیز کریں، تاکہ مفاہمت کی ساکھ برقرار رہے اور جنگ بندی کو تقویت ملے۔
وزراء نے جنگ بندی کو مستحکم کرنے، منصوبے کے تمام مراحل پر عمل درآمد کرنے اور فلسطینی عوام کی تکالیف کو کم کرنے کے لیے انسانی امداد میں اضافے کی خاطر علاقائی اور بین الاقوامی شراکت داروں کے ساتھ مل کر کام جاری رکھنے کے اپنے عزم کا اعادہ کیا۔