بنگلا دیش:71کی جنگ کے پہلے مشتبہ ملزم پر فرد جرم عائد

ڈھاکا(جنگ نیوز) بنگلا دیش کی خصوصی عدالت نے 1971 کی جنگ کے بعد پہلے مشتبہ ملزم پرفردِ جرم عائد کردی ہے، جن میں انسانیت کے خلاف جرائم اور نسل کشی جیسے20 الزامات ہیں۔
بنگلہ دیش میں انیس سو اکہترکی جنگ کے دوران جنگی جرائم کی تحقیقات کے لیے قائم کردہ ٹربیونل نے اپوزیشن جماعت کے ایک سینیئر رہنما کے خلاف الزامات عائد کیے ہیں۔
ٹریبونل نے دلاور حسین سعیدی پر دیگر جرائم کے علاوہ قتل عام اور تشدد کا الزام عائد کیا ہے۔ تاہم دلاور حسین نے تمام الزامات کی صحت سے انکارکیا ہے ۔
اس مقدمے کی آئندہ سماعت تیس اکتوبر کو ہوگی جب استغاثہ ابتدائی بیان داخل کرے گا۔ جرم ثابت ہونے پردلاور حسین کو پھانسی کی سزا ہوسکتی ہے۔