پیرس (نواۓوقت) فرانس میں راسخ العقیدہ مسلمانوں کو ملک بدر کرنے کی مہم میں پھر تیزی آگئی ہے۔ فرانسیسی وزیراعظم نکولس سرکوزی کے اعلان کے بعد اب تک 5 پاکستانیوں سمیت 125 سے زائد مسلمان سکالرز، مبلغین اور راسخ العقیدہ مسلمانوں کو ملک بدر کر چکی ہے۔ ان کا جرم محض سچا اور عملی مسلمان ہونا ہے۔ یہ مہم نام نہاد دہشت گردی کیخلاف جنگ کے نام پر شروع کی گئی ہے۔
مصری عالم دین علی ابراہیم السودانی جو اکثر و بیشتر تبلیغ پر فرانس جاتے رہتے ہیں ان کو بھی جہاد کا درس دینے کے الزام میں ملک بدر کردیا گیا ہے۔ ملک بدر کئے گئے 5 پاکستانیوں کا تعلق بھی ایک تبلیغی جماعت سے ہے۔
السودانی کو پہلے بھی بغیر کسی قانونی کارروائی کے ملک بدر کیا گیا تھا تاہم ان کی فرانسیسی بیوی نے عدالتی جنگ لڑ کر ان کی فرانس واپسی کا حکم نامہ حاصل کر لیا تھا جس سے واضح ہوتا ہے کہ فرانسیسی حکومت اور ایجنسیاں مسلمانوں کیخلاف بلاجواز کارروائی کیلئے بہانے ڈھونڈتی رہتی ہیں اور ان کا سب سے بڑا ”ثبوت“ شک ہوتا ہے۔
فرانسیسی وزیر داخلہ کے مطابق وہ طویل عرصے سے ملک کو جہاد کا شوق پیدا کرنے والے افراد سے پاک کرنے کی کوشش کر رہے ہیں اور اس ضمن میں 2002ءسے ابتک 125 سے زائد افراد کو ملک بدر کیا جا چکا ہے۔ وزارت داخلہ کے بیان کے مطابق السودانی کی 2008ءسے مانیٹرنگ کی جا رہی تھی۔
واضح رہے کہ فرانسیسی حکومت ہر برس متعدد علماءو آئمہ مساجد کو ملک بدر کرنے کی کوشش کرتی ہے مگر وہ عدالتوں کے ذریعے بچ جاتے ہیں۔ فرانس میں مسلمانوں کی تعداد 10 فیصد اور ملک کی دوسری بڑی آبادی ہے۔