ناوانندگ، بےدرد ءُ کم‌رأی ئێں پارلمان ءِ چپ بیگ گۆں بنیادی کانود ءِ اێر دارگ ءَ

مرۆچی (چارشمبی 26 فبروری 2025) ایران ءِ پارلمان ءِ گێشتری جهگیراں بنیادی کانود ءِ اێر دارگ ءِ هلاپ ءَ چست بوت انت ءُ ملک ءَ را گستائی ءُ بدگمانی ئے نێمگ ءَ تێلانک اش دات. اگه شه هما اول ءَ بنیادی کانود ملکی منگنامه ئے زانگ بوتێں ءُ ارزشت ءِ واهند بوتێں، گڑا مرۆچی آواں که وت ءَ مردمانی جهگیرَ زان انت، مردمانی پنجاه سالگێں لۆٹانی دێم ءَ نه اۆشتات انت. زاناں ایران ءِ راجانی پجارگ، ملک ءِ یکویی ءُ آمید ءِ اێر دارگ مهم تر انت یا سیاهێں چادر ءِ کانود ءِ منگ؟….

وهدےکه جهگیرے مردمانی حقاں سرپد مه بیت، وهدےکه په کانود ءِ اێر دارگ ءَ گڑتی مه کنت، وهدےکه گۆں کمترێں رأی ءَ پارلمان ءَ رۆت، وهدےکه هچ نامے ماں انقلاب ءَ نه دار ایت، وهدےکه یک رۆچے هم ملکاری پڑانی ته ءَ نه بوتگ، وهدےکه دو راجدپتری کتابء نه ونتگ گڑا آ چۆں زانت که ملکی زبان گۆں آدگه زبانانی نادلگۆش کنگ ءَ گار ءُ زیان بیت. آ نه زانت که اگاں ما غیر پارسی نبشته‌کار، شاعر ءُ ازمکاراں شه پارسی زبان ءُ لبزانک ءِ ھزمت ءَ در به کن اێں، گڑا ھچ چیزے په پارسی ءَ نه مان ایت که آیرا  پێش دار اێں.

ایران ءِ براهداری گۆں آیی وڑوڑێں دۆدءُربێدگ، زبان ءُ تباں انت، آوان که اے رۆچاں گۆں ایرانی زهرآمدی ءَ نبشتانکَ نبیس انت ءُ جێڑه کن انت ءُ گشتانک دےانت ءُ آدگه ایرانیانی حقانَ نادلگۆش کن انت، شه اے نازانتێں جهگیراں په ناتپاکی ءُ جێڑهانی جۆڑ کنگ ءَ کمتر نه انت.

مرۆچی اے وڑیں فیصلهانی ذمه واری ھما مردمانی سر ءَ انت که استمان ءَ را شه گچێن کنگ ءِ ھک ءَ زبھر اش کرتگ ءُ پارلمان ءِ ته ءَ ھما مردم اش آورتگ که گۆں شهرنندۆکی ھکاں آشنا نه انت ءُ نه زان انت که آوانی زمه واری بنیادی کانود ءِ سر ءَ عمل کنگ انت ءُ آوانی چپ بیگ گۆں مردمانی چنکه سالگێں لۆٹاں، دوازدمی پارلمان ءِ نام ءَ بدتر کرت ءُ وتی هما کمێں آبرو ءَ هم برت اش.

بلے دۆدءُربێدگ، پجار ءُ آوانی مھر انچۆ ھر آجوئێں انسان ءِ دل ءِ ته ءَ انت که آ گۆں زۆر ءُ کانود ءِ اێر نه دارگ ءَ شه آیی دل ءُ مجگ ءِ ته ءَ کشگ نه بنت.

اُمێت انت که گۆں راسدێم ءُ پکری ئێں رهبند ءُ طرحانی پێش دارگ ءَ په بنیادی کانود ءِ اێر دارگ، هاسکار کانود ءِ پانزدمی بند ءَ، مه هِل انت که استمان گێشتر وتی واهشتانی پیلو بیگ ءِ ودار ءَ بیت. راجدپتر شه چۆشێں رهبندانی مخالفاں هچبر په شری یات نه کنت.