اصلاحی رهوت گۆں ورنائاں ءُ آیی اثر ماں چاگردی مشکلانی کم کنگ ءَ شه استاد قاسمی ءِ دیدانک ءَ

سنی‌آنلاین| مولانا مفتی محمدقاسم قاسمی یکشمبی ءَ (29 مهر 1403) ماں دارالعلوم زاهدان ءِ استادانی هپتگی دیوان ءَ که ابید شه وانگءُزانگی بن‌گپاں چاگردی مشکلاں هاسکار «کۆش» ءُ «نشه» ءِ باروا گپ بوت، په دێمداری شه اے مشکلاں ءُ آوانی کم کنگ ءَ جوانێں تۆجیل پێش کرت.

په سنی‌آنلاین ءِ سرهال ءَ مفتی محمدقاسم قاسمی وتی هبرانی ته ءَ ابید شه اێشی که پاگواجه ءُ بااثرێں مردمان ءَ سک سۆگه کرت که گۆں ورنائاں رهوت گر انت، په دێمداری شه چاگردی مشکلانی گێش بوهگ ءَ سے مهمێں تۆجیل پێشء کرت که اے وڑ انت: 1. پاگواجهاں قرآن ءُ سیرت ءِ دیوان برجم دار انت؛ 2. اسپےریشاں گۆں پاگواجهاں په اصلاحی گندءُنندانی برجم دارگ ءَ همکاری کن انت؛ 3. هاسکار په ورنائاں اصلاحی دیوان برجم دارگ بیت.

دارالعلوم زاهدان ءِ دارلافتا ءِ سرمستر ءَ «پاگواجهانی رهبنداں په کهول ءُ سیاداں» ءُ «مدامی ئێں رهوت گۆں ورنائان» ءَ شه مهمترێں گامگێجاں اے باروا زانت ءُ گوشتء: قرآن پاک ءَ درائێنتگ: «وَأَنْذِرْعَشِيرَتَكَ الْأَقْرَبِينَ» گهترێں رهبند که آیی سۆبمند بوهگ آزمود بوتگ همێش انت که هر پاگواجه په وتی کهول ءُ سیاداں ءُ هاس ورنائاں اصلاحی دیوان برجم دار ایت تاں جهلێں رهوت جۆڑ بیت ءُ ابید شه اێشی بائد انت اے رهوت ءُ رهبنداں مدامی به انت.

مولانا قاسمی ءَ همےرنگ اسپےریش ءُ کماشانی باروا گوشت: «اسپےریشاں هم گۆں پاگواجهانی همکاری ءَ اصلاحی دیوان برجم دار انت تاں ورنائاں شه دینی تعلیمان سۆبمند به انت.»

دارالعلوم زاهدان ءِ حدیث ءُ فقه ءِ زبردستێں استاد ءَ گێش کرت: «پاگواجهاں بائد انت ماں وڑوڑێں وار ءُ جاگهاں لس دیواں ءُ اصلاحی دیواں هاسکار په ورنائاں برجم دار انت تاں گێشتر گۆں آوانی مشکلاں دُرستی به انت ءُ جوانێں تۆجیل پێش دار انت.»