پیغمبر ﷺ  ءِ حکومت ءِ بنیاد «رحم ءُ مهروانی» ءُ «آمید ءِ اێر دارگ» ءِ سر ءَ بوتگ

شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (30 شهریور 1403) «رحم ءُ مهروانی» ءُ «آمید ءِ اێر دارگ» ءَ را شه پیغمبر ﷺ ءِ مهمترێں ساڑایگاں ماں سجهێں پڑاں ءُ هاس حکومت ءِ پڑا زانت ءُ سۆگهء کرت که شه واجه رسول الله ﷺ ءِ سیرت ءَ رندگیری بیت.

🔹 پیغمبر ﷺ ءَ «انسان» اپسله کرت

په سنی‌آنلاین ءِ سرهال ءَ مولانا عبدالحمید ربیع‌الاول ءِ ماه ءُ رسول الله ﷺ ءِ پیدائش ءِ درگت ءَ آ واجه ﷺ ءِ زندمان ءِ باروا گپ جت ءُ گوشتء: پیغمبر ﷺ ءَ انچێں مردمان ءَ که شرک ءُ بت ءِ عبادت ءُ وت‌منی ءِ آماچ ات انت، اپسله کرت ءُ شه آوان «انسان» جۆڑ ء کرت. پیغمبر ﷺ ءَ مردماں انسانیت، آزاتی، عقیده، عمل ءُ راستێں اخلاق ءِ درس دات. هماواں که پیغمبر ءِ وانگجاه ءَ درس وانت ءُ رُدات انت، نمونگێں مردم جۆڑ بوت انت.

واجه ءَ گێش کرت: مرۆچی که بنی آدم صنعت ءُ تکنولوژی ءِ وڑوڑێں پڑاں علم ءُ زانت ءِ گپ ءَ جنت، گڑا زاناں سۆبێں بوتگ که «انسان» جۆڑ کنت. ما ماں مزن‌شهدربرجاه ءُ دینی وانگجاهاں چنکس سۆبین بوتگ اێں که انچێں مردم اپسله کن اێں که انسانیت ءَ اخلاقیات ءُ آزاتی ءِ سبق دےانت ءُ وت هم همایی رد ءَ کردار کن انت؟

🔹رسول‌الله ﷺ «استاد اخلاق» ءُ نمونگے شه «رحم ءُ مهروانی» ءَ ات

زاهدان ءِ آدێنگ ءِ امام ءَ «رحم ءُ مهروانی» ءَ را شه واجه رسول الله ﷺ ءِ برزترێں ساڑایگاں زانت ءُ گوشتء: رسول‌الله ﷺ استاد اخلاق ات. آ مردماں که آئی رۆدێنت رحم ءُ مهروانی ءَ یاتء دات ءُ آوان ءَ سۆگهء کرت که جنگانی ته ءَ جنێن ءُ زهگ ءُ پیرێں مردمانی سر ءَ ارش مه کن انت ءُ دگه دینانی عبادتجاهان ءَ مه ڈالێن انت.

واجه ءَ گوشت: مرۆچی ماں دنیا ءَ کۆش ءُ هۆنرێچی باز بوتگ ءُ مردماں هورکشی به انت. غزه ءُ اوکراین ءُ روسیه ءِ جنگ، درور انت که اۆدا چۆں بم ءُ خطرناکێن سلاهان ءَ بےترس ءَ کارمرز کن انت ءُ گێشتری که کشگ به انت جنێن ءُ زهگ ءُ پیرێں مردم انت. گۆں اے پێشامداں که ماں دنیا ءَ گندگ به انت انسانیت شرمندگ ءُ سرجهل انت.

🔹 گهترێں تۆجیل په مشکلانی دور کنگ ءَ عدالت ءِ اێر دارگ انت

مولانا عبدالحمید وتی هبرانی دێمتر ءَ گوشت: ما اسلامی دین ءَ را شه پیغمبر ﷺ ءُ خلفای راشدیناں گپتگ. رندگیری شه واجه رسول‌الله ﷺ ءَ ماں نماز ءِ سنتانی وانگ، حج، رۆچگ ءُ دگه دگه چیزاں نه انت، بلکه مدارا، اۆپار، سگگ ءِ ته ءَ انت. واجه رسول‌الله ﷺ ءُ خلفای راشدینانی حکومتداری که واجه رسول‌الله ﷺ ءِ حکومتداری ءِ رنگ ءَ بوتگ هم شه واجه ﷺ ءِ سیرت ءَ انت ءُ بائد شه آیی رندگیری بیت.

واجه ءَ «عدالت ءِ شنگ کنگ ءِ» باروا زۆر پر دات ءُ گوشتء: گهترێں راه په مشکلاں ءُ نابرابریانی دور کنگ ءَ عدالت ءِ شنگ کنگ انت. عدالت ءِ اێر دارگ ءُ حکمت ءُ تدبیر ءِ کارمرز کنگ تیوگێں مشکلان ءَ دور کن انت. په هر مشکل ءُ گپچل ءِ جۆڑ کنگ ءَ نه بائد شه جنگ ءُ دِرّءُدۆچ ءَ کارمرز بیت، بلکه مشکلاں بائد گۆں حکمت ءُ دوا ءَ علاج به انت.

زاهدان ءِ آدێنگ ءِ خطیب ءَ گوشت: مهمترێں کار، مردمانی هزمت ءُ آوانی دلانی دست ءَ آرگ انت که اے چیز گۆں وش تبی، اۆپار، عدالت ءُ آمید، مردمانی حرمت کنگ ءُ آوانی آزاتی ءَ کٹگ بیت.

🔹پاهواں مردمان ءَ رنج داتگ

زاهدان ءِ آدێنگ ءِ امام ءَ گۆں شرگداری شه «پاهو ءِ گێشی» ءَ گوشت: پاهواں ملک ءِ ته ءَ مردمان ءَ رنج داتگ. اگاں پاهو په قصاص ءُ حدودانی اێر دارگ ءَ به انت خب انت، بلێں اگاں په سیاسی مسائل ءُ نشه ئی موادانی پارءَ به انت، گڑا خبێں چیزے نه انت. همے پاهوانی سوب ءَ بازێں جنێنے جنۆزام ءُ زهگاں یتیم ءُ کهولاں غم ءِ آماچ بوتگ انت.

🔹 دینی ءُ مذهبی مسائلان ءَ «سیاسی» مه کن ات

مولانا عبدالحمید درائێنت: مئے سۆگه په کارمستراں همێش انت که دینی ءُ مذهبی مسائلان ءَ «سیاسی» مه کن ات. وهدے مسائلاں سیاسی به انت گڑا گرێن ور انت. دینی ءُ سیاسی مسائلاں گۆں دلبڈی ءُ حکمت ءُ تدبیر ءَ رندگیری به انت. اگاں «حجاب» ءِ باروا بےشرپی ءُ لٹءُکٹ ءِ بدل ءَ شه حکمت ءُ عدالت ءِ اێر دارگ ءَ کار گرگ بیت ءُ مالزانشتی مشکلاں ءُ نابرابریاں جۆڑ به بنت ءُ شه مالی فساد ءُ مۆک ءَ دێمداری بیت، گڑا مشکلاں جۆڑ بنت ءُ چاگرد یکویی ءُ براسی ءِ نێمگ ءَ رۆت.

واجه ءَ گێش کرت: رحم ءُ مهروانی ءُ مردمانی هبرانی اشکنگ ءُ آوانی لۆٹانی رندگیری ءَ تجربه کن ات ءُ دلجم به ات که اے رهبند پسو دنت. ما په آ کارمستراں که په عدالت ءِ اێر دارگ ءَ کوشست کن انت دعای خیر کن اێں.