شیخالاسلام مولانا عبدالحمید، ماں زاهدان ءِ نمازجمعه ءِ دیوان ءَ (10 آذرماه 1402) گۆں اشاره به دنیا ءِ جاور ءِ بدل بیگ ءَ، دنیا ءِ حکومت ءُ سرکاران ءَ په سیاست ءُ دابانی ٹگلێنگ ءُ همکوپگی گۆں دنیا ءِ جاور ءَ سک سۆگه کرت.
🔹دنیا ءِ چاگرد ءَ پرێشی که نه توانتگ په فلسطین ءِ بنگپ ءَ «بنیادی تۆجیلے» درگێج ایت بائد جواب پچ دنت
په سنیآنلاین ءِ سرهال ءَ شیخالاسلام مولانا عبدالحمید ءَ گوشت: نونێں جاور ءُ گوست ءِ جاور ءِ میانجین ءَ باز دگری هست. نونێں مردم پێش ءِ مردم نه انت. نونێں مردم ڈهسما انت ءُ دینی ءُ مذهبی ءُ راجی ترندیانی آماچ نه انت، آوان گواچنان ءَ چار انت ءُ گێشءُگیوار کن انت. حاکم ءُ پاگواجهاں ماں تیوگێں دنیا ءَ بائد دنیا ءِ جاور ءَ چار انت. دنیا ءِ نونێں جاور ءَ نۆکێں چارگے پکار انت تاں مردمانی سسا ءُ دابان ءَ پجار ایت. مرۆچی هچ کس نه توانت که گواچنان ءَ مه منّ ایت ءُ مردم هم چۆٹیان ءَ نه منّ انت.
واجه ءَ درشان کرت: اسرائیل ءُ فلسطین ءِ جنگ ءِ باروا هم مردماں جاور ءُ گواچنان ءَ گند انت. شاید ماں گوست ءَ مولءُمراد شه جنگاں ملگری بوتگ، بلێں دنیا ءِ نونێں جاور چشێں چیز ءَ مۆکلَ نه دنت. مردماں غزه ءِ جنگ ءَ چار انت ءُ ابید شه تانسرپسُندێں یهودیاں، دنیا ءِ تیوگێں مردم ءُ آدگه یهودی ءُ مردماں ماں اروپا ءُ مسلمان ءُ نامسلمانێں ملکاں اے جنگ ءَ نه منّ انت.
زاهدان ءِ آدێنگ ءِ امام ءَ گێش کرت: اسرائیل ءِ کرداراں ماں غزه ءَ آیی جند ءِ چٹی (ضرر) ءَ انت ءُ اگاں همے کرداران ءَ فلسطیناں یا دگه ملکے کنت آوانی جند ءِ چٹی ءَ انت، پچےکه مردمانی هۆرکشی ءُ گسانی ٹالێنگ ءُ شهرانی بێران کنگ ءَ هچ کسَ نه منّ ایت. ماں دنیا ءِ نونێں جاور ءَ مردمَ نه منّ انت که هرکس زۆرے واهند بیت ءُ سلاح داشته بیت دگرانی سر ءَ بێڑ کنت.
واجه ءَ ٹکاٹک گوشت: دنیا ءِ نونێں جاور، ترانکاری ءُ سسا ءِ جاور انت. پچے یک جێڑه ئے هپتادءُپنچ سال دراج بیت ءُ اسرائیلی ءُ فلسطینی ءُ دنیا ءِ مردماں مه توان انت پرایی بنیادی تۆجیلی در گێج انت؟! دنیا ءِ پهکێن مردماں هاس آوان که چم بستکا شه اسرائیل ءَ پلهمرزیَ کن انت بائد پسو پچ دےانت که پچے نه توانتگ اش شه اسرائیل ءَ دێمداری کن انت.
🔹«بیمکاری» ءُ «تانسرپسندی» ءِ رۆتگ ماں دنیا ءَ «ظلم ءُ بےعدالتی» ءُ «فلسطین ءِ زۆرگپتی» انت
مولانا عبدالحمید وتی هبرانی دێمتر ءَ شه غزه ءِ جنگ ءِ نۆکێں بنگێج بیگ ءَ وتی بژن ءَ درشان کرت ءُ گوشت ئِے: بژنیگ انت که غزه ءِ جنگ دوارگ بنگێج بوتگ ءُ سک بمگواریَ بیت. ما را ءُ دنیا ءِ پهکێن مردمانَ شه اے جنگ ءَ بد کێت؛ حتا اسرائیل ءِ پلهمرزاں هم ناوشنود انت ءُ گوش انت که بائد شه اسرائیل ءَ دێمداری بیت، پچےکه اے جنگ هچ کسے سۆب ءَ نه انت.
واجه ءَ گێش کرت: پێسر ءَ هم گوشگ بوتگ که بیمکاری ءُ تانسرپسندی ءُ بازێں جێڑهانی رۆتگ ظلم ءُ نابرابری ءُ فلسطین ءِ ڈگارانی زۆرگپت انت. په دێمداری شه بیمکاری ءَ گهترێں راه آمید ءِ اێر دارگ ءُ ترانکاری ءُ گواچنانی دلگۆش کنگ انت که شه تانسرپسندی ءَ ماں تیوگێں دنیا ءَ دێمداری بیت همےچیز په دنیا ءِ امنیت ءَ سۆبمند انت. نونێں دۆر جنگ ءِ دۆر نه انت ءُ دنیا ءِ مردماں بائد سکاں شه جنگ ءَ پهرێز کن انت. ما را امێت است که اے هپتادءُپنچ سالگێں جێڑه هلاس بیت ءُ فلسطین ءِ زۆرگپتگێں ڈگاراں فلسطینانَ دیگ بےانت.
🔹«مذهبی سسا» پسو نه دنت
مولانا عبدالحمید گوشت: من گوستگێں وهداں چُنت رند ءَ گوشتگ که مذهب ءِ گِردی تنک اِنت و ماں هر ملکے، هاس ٹوهێں ملکاں که اۆد ءَ بازێں دین ءُ مذهب ءُ وڑوڑێں دیدانک هست، مذهبی سسا پسو نه دنت. کمتهکم اسلامی سسا بیت، پچےکه اسلامی سسا پورهێں سسائے ءُ پهکێن مذهباں اسلامی سسا ءِ ٹال انت «انسانی سسا» هم یک پورهێں سسا ئے ءُ اگه اسلامی سسا پراستی اسلام ءِ رد ءَ بیت، گڑا هما انسانی سسا انت. اسلام ءَ پرمائێنتگ که تیوگێں مردمانی پگر ءَ به ات ءُ هرکس ءِ دین ءُ باور آیی جندےانت ءُ الله ءِ پسو ءَ آ وتَ دنت.
زاهدان ءِ جمعه ءِ امام ءَ ٹکاٹک گوشت: اگاں «انسانی» ءُ «اسلامی» پگر کن ات گڑا توان ات که تیوگێں استمان ءُ مردمانی وشنودی ءَ کٹ ات. بائد پهکانی حرمت ءُ احترام ءُ حق ءَ دےات. اسلام ءَ پرمائێنتگ که اسیر ءُ بندیگ ءُ دزگر بوتگاں بےشرپی مه بےانت ءُ حرمت اش ساتگ بیت ءُ شه هما ورگی ئے که وتَ ور ات، انگت گهتر شه آیی بندیگ ءَ دےات تاں وهدے که آ آزاتَ بیت شه شمے جوانی ءَ گوش ایت ءُ په شما خێرێں دعا کنت. هێلء دےات ءُ رهشۆنی کن ات، بلێں بےشرپی ءُ بدگوشی مه کن ات. بےشرپی ءُ اسیر ءِ جهلجنی اسلام ءِ چپ ءَ انت. جوانی گۆں بندیگ ءُ اسیراں ماں تیوگێن دنیا ءَ راسدێمێں برورد دار ایت.
🔹مرۆچی هما سۆبێں انت که گۆں دنیا ءِ جاور ءَ همکوپگی کنت
🔹هر حکومتے که نۆکێں جاور ءَ نادلگۆش کنت مردمانَ شه دست دنت
مولانا عبدالحمید ءَ وتی هبرانی دێمتر ءَ گوشت: مرۆچی همایی سۆبێں بوتگ که همکوپگ گۆں دنیا ءِ جاور ءَ دێم ءَ برۆت. من گوستگێں وهداں چُنت رند ءَ ماں دیواناں شیعه ءُ اهلسنتانی دینی وانگجاه ءُ علمی بنجاهان ءَ ڈاه داتگ که دنیا ءِ جاور بدل بوتگ ءُ اگاں شما هم وتی جاور ءَ بدل مه کن ات گڑا آیۆک ءَ گۆں مشکلاں آماچَ به ات ءُ مردماں هم شه شما جتا بےانت. مرۆچی پێسر ءِ کهنگێں رهبنداں پسو نه دےانت ءُ یک نۆکێں رهبندے پکار انت. اگاں دنیا ءِ سرکار ءُ حکومتاں وتی رهبندانی تها ٹگل میار انت ءُ دنیا ءِ نۆکێں جاور ءَ نادلگۆش کن انت مردم هم آوان ویل کن انت.
واجه ءَ سک سۆگه کرت: اے که ما گوش اێں بائد انت سیاست ءُ کانوداں بدل بےانت پرے سوب ءَ انت که اے ملک ءِ ورنائان ءَ گند اێں. مرۆچی مئے ملک ءِ گێشتری مردم ورنا انت که مئے راز ءَ نه انت، بلکه آوان ءَ دگه باور ءُ امێتداری هست که ما بائد آوان ءَ دلگۆش کن اێں. مرۆچی ئێں جنێناں هم پێسر ءِ جنێنانی رنگ ءَ نه انت، بلکه سسا ءُ مرامے واهند انت، پمێشا ما بائد چاگرد ءِ تیوگێں ورنا ءُ جنێنان ءَ دلگۆش کن اێں.
زاهدان ءِ آدێنگ ءِ امام ءَ گێش کرت: مرۆچی دنیا ءِ تیوگێں مردماں رهوتانی سوب ءَ گۆں وت یکے انت. مرۆچی ئێں دنیا دگه دنیا ئے. من مدام پس ءُ براسان ءَ سۆگه کرتگ که نون آ پێسر ءِ بلوچی رسم ءُ رواجاں پسو نه دےانت. هما رنگ که شریعت ءَ گوشتگ گۆں جنکاں آوانی آرۆس ءِ بارو ءَ شۆر کن ات ءُ آوانی دیدانک ءَ جست کن ات. ماں اسلام ءِ دین ءَ هست که آرۆس ءِ باروا بنی ارادهکنۆک جنکے جند انت ءُ آیی کهولَ نه توان انت آیرا پرے کار ءَ گۆں بیهار ءَ لاچار کن انت. شاید گوستگێں وهداں دمگی رسمءُرواجانی زۆر شه اسلامی احکاماں گێشتر بوتگ، بلێں مرۆچی اگاں اسلامی دۆدءُربێدگ کمار بیت هچ مشکلے پێش نه ییت.