زاهدان ءِ هۆنێن جمعه ءِ کنۆک ءُ پرمائێنۆکاں دێمءُدرا محاکمه ءُ سزا دیگ بےانت

🔸چهبار ءِ جهگیر ءَ ماں ایران ءِ پارلمان ءَ ماں گپءُتراں گۆں «جماران» ءِ هال‌سرکنۆک ءَ گوشت: پد شه مهر 1401 ءِ پێشامد ءَ مردم ءُ سرکار ءِ میانجین ءَ جتایی بوت که تاں مرۆچی شه مردماں دلجویی نه بوتگ. ابید شه اێشی که مزن‌رهشۆن ءَ یک رمبے را دێم دات، بلێں بژن انت که شه سرکار ءِ نێمگ ءَ آ رنگێں کارے نه بوتگ.

🔸معین الدین سعیدی وتی هبرانی دێمتر ءَ گوشت: امێت دار اێں که گۆں زاهدان ءِ هۆنێن جمعه ءِ کنۆک ءُ پرمائێنۆکانی دێمءُدرائێں سزا دیگ ءُ محاکمه ءَ ءُ گۆں دلجویی شه مردماں دوارگ آوانی همدلی ءُ یکویی ءَ گند اێں.

🔸 چهبار ءِ جهگیر ءَ درشان کرت: مردم باز گلگ دار انت. آوان مارشت کرتگ که نادلگۆش بوتگ ءُ توار اش اشکنگَ نه بیت. منی باور ءَ بائد زهرشانیانی بستءُبندی کانود اێر دارگ بیت تاں مردمانی توار اشکنگ بیت. پچےکه هچ کس ناامنی ءُ جنگ ءَ نه من ایت ءُ مردماں هم مدام جهد کرتگ تاں وت را شه چشێں بن‌گپاں جتا کن انت، بلێں نبائد اے چیزاں سبب بےانت تاں مردمانی ناوشنودی ءَ شه رۆزیگی جاور ءَ نادلگۆش کن اێں.