بلوچ نودربر گل (پجار) ءِ بُنجاھی جارکش ءَ وتی شنگ کُرتگیں درشانے ءَ گْوشتگ که ریکوڈک ءِ گپ ءُ دیمروئی شوربندی ءِ گپ دُرسیں جھان ءَ بیگ ءَ اِنت بلے بژن که چه بلوچ ءِ سرڈگار ءَ دراتکگیں مڈّیاں بلوچ راج زبھر کنگ بیتگ، سرجمیں پاکستان ءَ ھمے شوربندیانی بنیاد ءَ دیمروئی بیگ ءَ اِنت بلے بلوچستان ءَ نوکیں لشکرجاه ءُ نوکیں لشکرکشیانی تیاری کنگ ءِ باروا جیڑگ ءَ اَنت۔ ریکوڈک شوربندی ءِ په دُرسیں شوربندیاں چه مُزوراں بگر داں انجینئر ءُ پھازدار چه پنجاب ءَ آرگ بیگ ءَ اَنت که مڈیاں چکاری بلوچستان ءِ مڈیانی لُٹ ءُ پُل کنگ ءِ تچکیں گْواچن اِنت۔ جارکش ءَ گْوشتگ که چه ایشی ءَ پیش سوئی ءَ درکپتگیں گیس ، سی پیک نامیں شوربندی ءَ پد گوادر ءِ ھال جھان ءِ دیم ءَ پدر اِنت که پنجاب ءِ مُزور ، چین ءِ لشکر ءَ ھوار آدگه دُرسیں راجاں گوادر ءَ باپار کنگ ءُ زندگی گْوازینگ ءِ موکل ھست بلے بلوچ راج ءَ نه وتی زمین ءَ باپار کنگ موکل ھست ءُ نه که په شرپ زندگی گْوازینگ ءِ موکل دیگ بیتگ،بلے په کمشرپ کنگ ءَ جوڑ بیتگیں سدانی کَچ پانگش ءُ لشکر ءِ لشکرکشیاں تیوک ءَ بلوچ نشانگ کنگ بیگ ءَ اَنت۔ جارکش ءَ گْوشتگ که بلوچستان ءِ جنگجاھے ءِ جوڑ کنگ ءَ دُرسیں شوربندیاں رَد کنیں۔پاکستان ءُ میان استمانی زوراکاں بلوچستان انگِر کُرتگ ءُ ایشی ءِ مول ھمیش اِنت که بلوچ راج ءِ مڈیانی په زور لُٹگ ءِ شوندات پدر اِنت۔ ما جھان ءَ گْوشگ لوٹیں که بلوچستان ءِ مڈی ءُ تیاب ءَ شوربندی نه بلکیں لشکری لشکرکشی یے که چه ایشی ءَ ھزاراں مردم آماچ اَنت۔ جارکش ءَ گْوشتگ که پاکستان ءِ آمیدگس تیوک ءَ پنجاب ئیگ اِنت که اود ءَ سرجمیں شپ ءَ آمیدگس پچ بنت۔میار بار لوٹائینگ ءُ یل کنگ بنت بلے یکے بلوچستان اِنت که اود ءَ نه آمیدگس ھست ءُ نه کانود ءُ نه دزرسی، مارشلا ءِ وڑیں چاگردے جوڑ کنگ بیتگ که یک مردمے ءَ گپ کنگ، گوشدارگ یا زھرشانی کنگ ءِ ھک ھست ءُ مردم درکانودی آوار جنگ،بیگواه کنگ ءُ کُشگ بیگ ءَ اَنت که ایشی ءِ ھزاراں درور ھست۔ جارکش ءَ گْوشتگ که ریکوڈک پروجیکٹ بلوچستان ءِ لُٹ ءُ پُل کنگ ءُ پنجاب ءِ دیمروئی دیگ ءِ شوربندی اِنت که ایشی ءَ ما رَد کنیں ءُ چوشیں دُرسیں شوربندیاں رد کنیں که چه آیاں بلوچ راج ءَ ھچ سیت ءُ نَپ نه بیت.
بنشون: زرمبش بلوچی