شیخ‌الاسلام مولانا عبدالحمید، ماں زاهدان ءِ جمعه نماز ءِ دیوان ءَ (8 اردیبهشت 1402) وتی دلگرانی ءَ شه مردمانی مشکلاں درشان کرت ءُ کارمسترانَ سکّ سۆگه ئِے کرت که مردمانی هبرانَ گۆش دار انت ءُ استمان ءِ لۆٹان منّ انت.
🔹 کسے که «الله» ءُ «مردمان» ویل کنت هچ پناهے نه دار ایت
په سنی‌آنلاین ءِ سرهال ءَ مولانا عبدالحمید گوشت: دو هژدری ئێں چیز انت که آوانی ساتگ په تیوگێن حکومتاں زلورت انت. اگه اے دو چیز ساتگ بےانت گڑا مردم ماں دنیا ءَ سۆبێن بیت. اگه پاگواجه، پێشۆنک ءُ رهشۆناں ءُ پهکێن پاٹیان اے دو چیز ءَ ویل کن انت المی پرۆش ور انت. آ دو ئێن چیزاں «الله» ءُ «مردم» انت. الله ءِ امر ءُ مردمانی گپانی اُشکنگ باز هژدری انت، اگاں ما الله ءُ مردمانَ داشته به اێں گڑا توان اێں که سۆبێن به اێں، بلێن اگاں اے دوئێنانَ ویل کن اێں گڑا هچی نه توانت ما را رکێن ایت.
🔹 گهترێن سیاستزانت هما انت که مردمانی سۆبانی پکر ءَ بیت
زاهدان ءِ آدێنگ ءِ امام ءَ درّائێنت: مهمترێن سیاست هما انت که مردم الله ءِ وشنودی ءِ پد ءَ بیت ءُ هچ کارے مه کنت که الله ءَ ناوشنود کنت. همےرنگ جوان‌ترێن سیاست ءُ گهترێن سیاستزانت هما انت که مردمانی وشنودی ءَ کٹ ایت. چشێن سیاست ءُ سیاست‌زانتے ماں دنیا ءَ سر برز بیت.
🔹 شه کارمسترانی نێمگ ءَ هچ کارے په مردمانی رۆزیگی مشکلانی جۆڑ کنگ ءَ گندگَ نه بیت/ ماں اے سکێن جاور ءَ مردماں همدگر ءَ کمک کن انت
واجه ءَ گێش کرت: ارمان که مرۆچی مشکلاں ملک ءِ تها باز انت. کارگسانی پوریاگراں کار ءَ را بند کرتگ که ماجب کم انت. هچ کسے ءِ ماجب مرۆچی بسَ نه کنت، زر بےارزشت بوتگ. کریه‌نندان شکایت کن انت که کریه باز برز انت، کریه‌واران هم گوش انت که زر بےارزشت انت. مئے سۆگه همێش انت که رۆزیگی جاور سک خراب انت ءُ شه کارمسترانی نێمگ ءَ کارے نه بیت، شما مردماں همدگر ءَ کمک کن ات.
🔹هچ حکومتے گۆں سلاه ءِ زۆر ءَ نه مان ایت
مولانا عبدالحمید وتی هبرانی دێمتر ءَ گوشت: مردم که به بن‌بست ءَ لگتگ انت ووٹ‌کاری اش لۆٹتگ، بلێن لهتے شه کارمستراں اێشرا نه منّتگ، پچےکه سرپد انت که مردم چےَ لۆٹ انت ءُ ووٹ‌کاری ءِ آسرات چے انت. نون گهترێن تۆجیل همێش انت که چارگے درگێج اێں. واجه ءَ گوشت انگت منی سۆگه ءُ پێشنهاد مردمانی گپانی اُشکنگ انت.
زاهدان ءِ آدێنگ ءِ امام ءَ سک سۆگه کرت: ما شمے دۆزواه اێں که اے گپانَ جن اێں. اے نونێن گپ نه انت، دێر انت که اے گپان گوشگ بےانت بلێن نون ٹک تر انت. ما گوش اێں که مردمانی دێم ءَ مه اۆشت ات، پچےکه اگاں مردمانَ ویل کن ات گڑا الله هم ناوشنود بیت.
🔹 فنوج ءِ پێشامد باز دردآور ات/ امنی واکاں بائد مردمانی کرّ ءَ بےانت نه مردمانی خلاف ءَ
زاهدان ءِ آدێنگ ءِ امام ءَ به فنوج ءِ پێشامد ءَ اشاره کرت ءُ گوشت ئِے: فنوج ءِ پێشامد باز دردآور ات. مردمانی سرهال ءِ رد ءَ امنی واکاں دو موتور ءَ را گۆن داتگ ءُ ٹۆکر جتگ که ماں اے وئیل ءَ یک نپرے کشگ بوتگ. مردمان همے وئیل ءِ بابت ءَ پاسگاه ءِ دێم ءَ مچ بوتگ انت که واکان آوانی نێمگ ءَ تیرگواری کرتگ ءُ چار نپر ٹپی بوتگ.
واجه ءَ گێش کرت: اے کار په امنی واکاں وش نه ات. امنی واکاں بائد مردمانی کرّ ءَ بےانت نه که مردمانی هلاپ ءَ. اگاں کسے ردی ءِ کرت بائد شه کانود ءِ رد ءَ رندگیری بیت. لهتێن شپ دێمتر ءَ ماں زاهدان ءَ تیرگواری اش کرت ات ءُ مردمان اش ترسێنت ات، اگاں ماشینے هلاپے کرتگ گۆں دورگند ءَ جدءُهل بیت نه که شهرے تها تیرگواری کن ات.
واجه ءَ گوشت: شما شهر ءَ را امنیتی کرتگ ءُ مردماں گۆں سکیاں آماچ انت که بائد سرپانی تها بۆشت انت. لهتے پاگواجه ءُ اسپےریشانَ داشتگ اش ءُ آوانی حرمت ساتگ نه بوتگ. اے کار مردمانَ شه حکومت دور کنت. مئے سۆگه به امنی واکاں اێش انت که مردمانَ دار ات، مردم باز هژدری انت.
🔹همارنگ که مامورانی کشۆکانَ ودیَ کن ات، مردمانی کشۆکان هم ودی کن ات و سزا دےات
مولانا عبدالحمید درشان کرت: قاضیان ما را دلجم کرت ات که بےدۆزواهی ءَ اے بن‌گپ ءَ رندگیری کن انت، بلێن نونَ گوش انت که معلوم نه ات که ماں تیرگواری ءَ کی تیر کے ءَ لگتگ، پمێشا نه بیت که قصاص کن اێں. ما شه اے گپ ءَ بهمانگ اێں. شما ماں کرج ءِ وئیل ءَ که بازێن مردمے یک مامورے را کشت ات، چۆن آ مامورے کشۆک ءَ را ودی ءُ کرت ءُ دو نپر ءَ قصاص ءُ کرت؟! وهدے کشۆک شه مردماں بیت ودی ءِ کن ات، بلێن اگاں مامورے بیت پچے نه توان ات آیرا ودی کن ات؟!
واجه ءَ همےپێم گوشت که زاهدان ءِ هۆنێن جمعه ءِ پێشامد پکائێن قتل عمدے بوتگ ءُ بائد کشۆکاں سزا دیگ بےانت.
🔹سرهالانی رد ءَ بندیگاں ماں بندیجاهاں سزا دیَگ بےانت/ آ واکے که بندیگان سزا دنت بائد سزا دیگ بیت
مولانا عبدالحمید سک سۆگه کرت: مئے باور همێش انت که ماں زهرشانیاں هر مامورے ماں هر کنڈے شه ملک ءَ بےسلاهێن مردمے را کشتگ، بائد قصاص بیت، پچےکه اے نه شه شریعت ءُ نه شه میان استمانی کانودانی رد ءَ روا نه انت.
واجه ءَ گێش کرت: همے زوتان انسانی حقانی هال‌دئوک ءَ ایران ءِ باروا دل‌په‌دردکنۆکێن هال دات ات. ما هم سرهال دار اێں ءُ بلکێن مئے سرهالاں گێشتر هم بےانت، پچےکه بازێنے که بندیگ بوتگ انت مئے کرّ ءَ کاینت ءُ گۆں ما گپ جن انت. مئے باور همێش انت که آ مامورے که ماں بندیجاه ءَ بندیگان لٹءُکٹ کرتگ بائد سزا دیگ بیت. پهکان ءُ هاس کارمستراں ماں جمهوری اسلامی ءَ بائد اسلام ءُ کانودے رد ءَ کردار کن انت. بائد آمید ءُ برابری اێر دارگ بیت.
🔹 گێش شه یک ماه انت که ماں زاهدان ءَ دامگ ءَ نماز جمعه ءِ وهد ءَ بند کن انت
مولانا عبدالحمید وتی هبرانی گڈسر ءَ گوشت: چنکه جمعه انت که نماز ءِ وهد ءَ ماں زاهدان ءَ دامگ ءَ بند کن انت. اے گپان که اِدا گوشگ بےانت دۆزواهی ءُ دلسۆچی ئێں گپ انت. دامگ ءِ بند کنگ په تیوگێن سۆداگر ءُ نبیسۆکاں چَٹی ءُ نقصان دار ایت ءُ سبب بیت که رۆزیگی مشکلاں گێش بےانت.