🔷 ما نه منّ اێں که امنیتی واکاں نماز جماعت ءَ مکن کن انت
شیخ‌الاسلام مولانا عبدالحمید، ماں زاهدان ءِ جمعه نماز ءِ دیوان ءَ (۲۸ مرداد ۱۴۰۱) شه لهتێن ذمه‌واران که مهتر معاویه رضی‌الله‌عنه ءِ بدگوشی ءَ کرت ات اش انتقاد ئِے کرت ءُ همےپێم مکن شه نمازے برجم دارگ ءَ ماں ٹوهێں مێتگانی نمازخانه ئاں ڈاه دات.
په سنی‌آنلاین ءِ سرهال ءَ شیخ‌الاسلام مولانا عبدالحمید ماں یک بهرے شه وتی هبراں واجه رسول‌الله صلّی‌الله‌علیه‌وسلّم ءِ صحابه ئانی حرمتے ساتگ ءَ درشان کرت: اگه کسے صحابه ءُ اهل‌بیتانی محبت ءَ دل ءَ نه دار ایت، ما گۆں دلسۆچی ءَ آیرا سۆگهَ کن اێں که ادب ءُ حرمت ءَ سات ایت ءُ درێن صحابی ءُ اهل‌بیتانی بدگوشی ءَ مه کنت.
ذمه‌وار ءُ ناذمه‌واران بائد مقدساتانی حرمت ءَ سات انت، اے باز هژدری انت.
واجه ءَ گێش کرت: مهتر معاویه رضی‌الله‌عنه وحی ءِ نبیسۆک بوتگ ءُ واجه رسول‌الله صلّی‌الله‌علیه‌وسلّم آیی سر ءَ برۆسه کرتگ، پچےکه وحی ءِ نبیسگ هرکسءَ دیگَ نه بوت. ماں حدیث ءَ هست که واجه رسول‌الله صلّی‌الله‌علیه‌وسلّم ءَ دعا کرت که اے الله معاویه ءَ هدایت کن ءُ آیی سبب ءَ دگرانَ هم هدایت کن.
🔹 شما وَ مهتر معاویه ءَ شه مهتر حسن گهتر درستَ نه کن ات
زاهدان ءِ جمعه ءِ امام ءَ گوشت: وهدے مهتر عثمان شهید بوت جێڑه کپت ءُ جمل ءُ صفین جنگ جۆڑ بوت انت، بلێن مهتر حسن ءَ گۆں مهتر معاویه ءَ صلح کرت ءُ تیوگێن اسلامی ملک ءَ را آیرا دات ئِے. هچ کس نه توانت گوش ایت ما گهتر شه مهتر حسن، مهتر معاویه ءَ درستَ کن اێں. آیی مهتر معاویه ءَ گهتر درستَ کرت. البت که ما تهنا واجه رسول‌الله ءَ بےگناه ءُ معصومَ زان اێں، بلێن شیعه یان ائمه ئانَ هم معصومَ زان انت ءُ معصوم کسے که رد ءُ گناه مه کنت، نپه مهتر حسن ءِ کردار راست ءُ شه زانتے روگه ءَ بوتگ.
واجه ءَ گۆں اشاره به مزن رهشۆنے سۆگه ءَ، شه ذمه‌واران لۆٹ ات که پهکێن صحابه ئانی حرمت ءَ سات انت.
🔹 کم‌ته‌کم به هل ات مردمان ماں وتی گساں نماز بوان انت
شیخ‌الاسلام مولانا عبدالحمید سکیانی باروا که اهل سنتانی سر ءَ هست انت که ماں نمازخانه ئان گۆں جماعت ءَ نماز مه وان انت، درشان کرت: اهل‌سنتاں ماں ملکے ٹوهێن مێتگاں کم ءُ باز هست انت، اے ملک هم پهکانی ملک انت، تهنا شیعه یا سنی یا دگه راجے ءِ نه انت، بلێن ارمان که ماں سجهێں مێتگاں ما را مۆکل نێست که مسیت بند اێں، ما شه اے بابت ءَ گلگ دار اێں. مسیت الله ءِ گس انت، شیعه یا سنی ءِ گس نه انت. مئے لۆٹ اێش انت مۆکل دےانت ماں تیوگێں میتگاں مسیت بندگ بیت. واجه ءَ گۆں ایشی که نه تهنا مسیتے بندگے مۆکلَ نه دےانت، بلکه نه هل انت مردمان ماں وتی گساں نماز ءَ گۆں جماعت ءَ برجم دار انت، درشان ئِے کرت: نون که ماں بازێں مێتگے که یکے شه آوان تهران انت ءُ اۆدے اهل‌سنتاں سالان انت که مسیتے لۆٹ انت، وهدے نه هل ات مسیتے بند انت، کم‌ته‌کم مۆکل دےات مردماں وتی گساں تها نماز بوان انت. اهل‌سنتاں اے چیز ءَ نه منّ انت که واکاں ماں نمازخانه ئان شه نماز ءَ مکن کن انت. گوش انت اے ڈگار په نندگ ءَ جۆڑ بوتک نباید آیی تها نماز بوان ات، وهدے که سجهێن ڈگار په مسیت ءَ انت ءُ شما آیی تها گس بستگ. انصاف کن ات، اے چه گپے که شه شمے دپ ءَ درَ بیت؟
زاهدان ءِ جمعه ءِ امام ءَ گێش کرت: مئے لۆٹ شه درێن شیعه یان اێش انت که درانَ په اهل‌سنتاں پچ کن انت ءُ به هل انت تاں اهل‌سنتاں اۆدا نماز بوان انت، هماپێم که مئے گسانی در ماں تیوگێن دنیا ءَ په شیعه یان پچ انت. نون نماز ءَ ماں نمازخانه‌ئان مکنَ کن انت ءُ من شه اے بابت ءَ تعجب آں. منا بێسه هست که مزن رهشۆن راضی نه انت و آیرا پراهێن دیدانے هست. ما مزن رهشۆن ءُ راجکماش ءَ درستَ کن اێں، آوان صدماں‌صد گۆں چشێن کاراں مخالف انت. اۆ واکاں، اۆ آوان که گونڈێں دیدانکے واهند ات! شیعه ءُ سنیاں براس انت، هرکس لۆٹ ایت اے براسی ءَ پرۆش ایت چه شیعه بیت یا سنی گۆں الله ءِ عذاب ءَ آماچ بیت.
🔹 اے کار په جمهوری اسلامی ءِ سۆب ءَ نه انت
مولانا عبدالحمید آدگه نیمۆنان که په دێمداری شه اهل‌سنتانی نمازے برجم دارگ ءَ پێش اش داشتگ، یاد کرت ءُ گوشت ئِے: ماں هلک ءُ کلگاں په مسیتے بندگ ءَ جوازَ لۆٹ انت، ماں کلگاں کجام گساں جواز دار انت که مسیت داشته بےانت؟ اے کار ءَ مه کن ات. به الله ءِ نام ءَ قسم که اے کاراں په جمهوری اسلامی ءِ سۆب ءَ نه انت. ما شمے خیر ءَ لۆٹ اێں، شما بائد وشّال به ات که تیوگین استمان نماز بوان انت. ماں سربازخانه ئان هم برےبرے اهل‌سنتاں مۆکل نه دےانت تاں گۆں جماعت ءَ نماز بوان انت.
🔹 هرکس مذهبی جێڑه جۆڑ کنت اهل فتنه انت
واجه ءَ یکے شه دینی حکومتانی مهمێں اگده ئانَ نمازے برجم دارگ زانت ءُ گوشت ئِے: جمهوری اسلامی مهمترێن چیزے شه نماز ءَ نه دار ایت. وهدے نمازخانه ئانَ سگتَ نه کن انت، اے جتایی ءُ ناتپاکی انت ءُ باید شه اے چیز ءَ دێمداری بیت. منی لۆٹ شه ذمه‌واران اێش انت که اے مسئله ءَ دلگۆش کن انت ءُ مه هل انت اے بابت ءَ توارے چست بیت. هرکس مذهبی جێڑه ئانی پدا بیت چه سنی بیت یا شیعه اهل فتنه انت. جمهوری اسلامی بزان دینی ئێن حکومت، آوان که اێشرا نه زاتگ بزان انت.
ما نه منّ اێں که اسلامی ئێن حکومت گوش ایت آیرا شه نماز ءَ ٹوهتر دگه اگده ءِ هست. ماں دینی مسائلاں اۆلی اگده نماز انت، هماپێم که قرآن ءَ درائێنتگ: «الَّذينَ إِنْ مَكَّنَّاهُمْ فِي الْأَرْضِ أَقامُوا الصَّلاةَ وَ آتَوُا الزَّكاةَ وَ أَمَرُوا بِالْمَعْرُوفِ وَ نَهَوْا عَنِ الْمُنْكَرِ وَ للهِ عاقِبَةُ الْأُمُورِ» هما کساں که اگر حکومت بدئێں آیان ءَ ماں زمین ءَ گڑا قائم دار انت نماز ءَ ءُ در کن انت زکات ءَ ءُ حکم کن انت په نێکێں کار ءَ ءُ مکن کن انت بدێں کار ءَ ءُ الله واسطه انت درستێں کارانی انجام ءَ.
مولانا عبدالحمید ٹکاٹک گوشت: هرکس ءَ جێڑهی ئێن هبرے دات دێمے گر ات، بلێن نماز وانگے دێما مه گر ات مئے امێتداری شه تیوگێن امنیتی واکان ءُ چێرێن اداره ئاں اێش انت که چشێن کارے مه کن انت که الله ءُ اهل‌بێتاں ناراض بےانت. ما تپاک ءَ را سک ساتتگ ءُ مئے امێتداری شه مزن رهشۆن ءَ اێش انت که اهل‌سنتانی مذهبی آزاتیانَ وت چار ایت. شه راجکماش، پارلمان ءِ سرۆک ءُ عدلیه ءِ سرۆک ءَ هم لۆٹ اێں که اے بن‌گپ ءَ زبر دلگۆش کن انت.
🔹 بائد تیوگێں استمانانی بےشرپی مکن بیت
شیخ‌الاسلام مولانا عبدالحمید دێمتر ءَ گۆں اشاره به بێڑے که سلمان رشدی ءِ سر ءَ بوتگ شه جهانی چاگرداں لۆٹ ات که آزاتی گپتار ءُ بےشرپی ءِ میانجینا دگری به هل انت.
واجه ءَ گوشت: ما هم آزاتی گپتار ءَ باور دار اێں بلێن بےشرپی جتا انت. اگه کسے گۆں منانک ءُ منطق ءَ گپ جنت بائد انت دنیا آیرا آزاتی دنت، بلێن زاهءُزکت ءُ بےشرپی دگه چیزے. اسلامی استمان بےشرپی به پێغمبراں ءُ قرآن ءَ سگ ات نه کنت. مگه مسیحیاں بےشرپی به مهتر عیسی ءُ مهتر مریم ءَ سگ ات کن انت؟ وهدے آوان نه توان انت اێشرا منّ انت، مسلماناں هم نه توان انت بےشرپی به مهتر عیسی ءُ بی‌بی مریم ءُ مهتر محمد صلّی‌الله‌علیه‌وسلّم ءَ سگ انت.
واجه ءَ درائێنت وهدے به دو میلیارد مسلمان ءَ بےشرپیَ بیت، شه یک نپرے سر ءَ سرَ رئوت ءُ کارے کنت، گڑا آیی نام بێڑ به آزاتی گپتارَ بیت. ما شه میان استمانی برجمی ءُ دگه جهانی برجمیان لۆٹ اێں انچێن کانودے به هل انت که هچ استمانے ءِ بدگوشی مه بیت، چه مسلمانے بیت یا یهودی ءُ مسیحی ءُ بکالے بیت. اے باانصاف‌ترێن دیدانک انت ءُ چشێن کانودے المی دنیا ءَ امنَ کنت.