شیخ‌الاسلام مولانا عبدالحمید ماں زاهدان ءِ جمعه نماز ءِ دیوان ءَ (31 تیرماه 1401/ 22 جولای 2022) آپءُهوا ءِ ٹگلگ ءُ وڑوڑێں آفت ءُ بلائانی اێر آیگ ءَ را گناه ءُ مردمانی کردارانی آسرات زانت ءُ په رکّگ شه اے مشکل ءُ آفتاں په توبه ءُ استغفار ءُ چاگرد ءِ اصلاح ءَ سکّ سۆگه ئِے کرت.
په سنی‌آنلاین ءِ سرهال ءَ شیخ‌الاسلام مولانا عبدالحمید پد شه اے پاگپ ءِ وانگ ءَ «ظَهَرَ الْفَسَادُ فِي الْبَرِّ وَالْبَحْرِ بِمَا كَسَبَتْ أَيْدِي النَّاسِ لِيُذِيقَهُمْ بَعْضَ الَّذِي عَمِلُوا لَعَلَّهُمْ يَرْجِعُونَ» [روم: 41] درشان ئِے کرت: گناه، الله ءِ حکمانی نادلگۆش کنگ ءُ مردمانی بدێں کرداراں سبب بوتگ انت که ڈگار ءِ آپءُهوا ٹگل ایت. مراد شه فسادے که ماں برزگے پاگپ ءَ بیان بوتگ همے بدلی انت که ماں دنیا ءَ آتگ انت ءُ په مردماں نقصان دار انت.
واجه ءَ گێش کرت: تیوگێں انسانانی اگده الله ءِ حکمانی سر ءَ عمل کنگ ءُ پدگیری شه الله ءَ انت. تاں وهدےکه مردماں شه الله ءِ حکمان پدگیری کن انت دنیا ءُ آزماں په آیی سۆب ءَ انت ءُ آیی هزمت ءَ کن انت، بلێں وهدےکه مردماں گۆں گناه ءُ الله ءِ حکمانی پرۆشگ ءَ وتی اگده ءَ ٹگلێن انت، گڑا دنیا ءِ جاور هم بدلَ بیت ءُ په مردم ءِ ضرر ءَ بیت.
زاهدان ءِ جمعه ءِ خطیب ءَ گوشت: مرۆچی ئێں انسان باز الله ءِ حکمانَ پرۆش ایت ءُ الله ءِ حکمانَ نادلگۆشَ کنت. ماں اے دنیا ءَ که مردماں زندَ گوازێن انت چنکس جنایتَ کن انت ءُ ناحقێں هونَ رێچ انت! مردماں شه ابرم ءِ راه ءَ در بوتگ انت ءُ گۆں نونێں سلاحاں گونڈل ءُ پیرێنانی هۆن ءَ رێچ انت. مردمے که ذره ئے عقل داشته بیت شه مرۆچی ئێں انسانانی کرداراں دلپدردَ بیت.
واجه ءَ درشان کرت: زمین ءِ بازێں گرمی ءُ آپءُهوا ءِ ٹگلگ سکّ خطرناک انت، جنگلاں بُنَ گر انت ءُ هلک ءُ کلگاں بێران بےانت. ماں وش آپءُهوائێں ڈیهاں مردماں شه گرمی ءَ مر انت. الله ءَ اے گرمی ءُ ڈکال ءُ مُج ءُ زمین‌چنڈانَ آۆرتگ. اے آفتاں که ماں دنیا ءَ آتگ انت مُچ عذاب انت ءُ آوانی سبب مردمانی گناه انت.
دارالعلوم زاهدان ءِ سرمستر ءَ درشان کرت: پهکێں چیزان گۆں الله ءِ اراده ءَ بےانت. وهدے که الله زمین‌چنڈ ءُ دگه پێشامدے را مه لۆٹ ایت، گڑا آیی اسبابانَ زیانَ کنت ءُ اگاں لۆٹ ایت، آیی اسبابانَ کار ایت. پچے مردماں قرآن ءَ دلگۆش نه کن انت ءُ قرآن ءُ پێغمبر ءِ سۆگه ءُ رهشۆنیانَ ماں وتی زندگی ءَ نه یار انت؟! پچے مردماں پاک ءُ جوانێں زمین ءَ گۆں وتی گناهاں فاسدَ کن انت؟!
واجه ءَ گێش کرت: مردماں نه توان انت الله ءِ لۆٹ ءُ اراده ءِ خلاف ءَ کارے کن انت. مگه مردمَ توان انت آپءُهوا ءِ ٹگلگ ءِ دێم ءَ گر انت؟ مگه سرکاراں توان انت دَزّ ءُ مُجے دێم ءَ گر انت؟ کرونا ءُ آفتاں پرێشی اێر آتگ انت که مردمانَ سرپد کن انت که دنیا ءِ راه برگ الله ءِ دست ءَ انت. شه اے بابت ءَ باید ما پهکاں ڈُبّ به اێں ءُ وتی کردارانی بارو ءَ فکر کن اێں. مسلماناں که واجه رسول الله صلّی‌الله‌علیه‌وسلم ءِ امت انت باید وتی زندگی ءِ بارو ءَ فکر کن انت ءُ وتی کردار ءُ چاگرد ءَ اصلاح کن انت.
مولانا عبدالحمید وتی هبرانی دێمتر ءَ گوشت: تهنا رکگے راه شه آفت ءُ بلائاں توبه ءُ وت ءُ چاگرد ءِ اصلاح انت. دزّی ءُ سود ءُ ترندآپ‌واری ءُ قتل ءُ فساد باید شه چاگرد ءَ دور بےانت. باید یتیم ءُ بےوس زالبولانی حقاں دیگ بےانت. ماں لهتێں ملکاں کانود شه هم‌جنسی مئیل ءَ پله‌مرزیَ کنت؛ باید انت اے فسادانی دێم گرگ بیت. تیوگێں دنیا ءَ اێشر ءَ منّتگ که آزاتی انچۆ ویل نه انت، مردماں تاں اۆد ءَ آزات انت که عقل ءُ ابرم ءِ خلاف ءَ کارے مه کن انت، وهدےکه مردماں عقل ءُ ابرم ءِ خلاف ءَ کرد کرت، گڑا آفت ءُ فسادَے در پاچَ بےانت ءُ دریاب ءُ هشکی ناامنَ بےانت.
زاهدان ءِ جمعه ءِ امام ءَ گوشت: پاگواجه ءُ مزن‌سسائاں ءُ عاقل ءُ دلسۆچێں مردمان باید شه گناه ءُ فساداں مکن کن انت ءُ چاگرد ءَ الله ءُ پێغمبرے نێمگ ءَ تێلانک دےانت.