ایران ءِ جوهری مسئله ءِ گێشءُگیواری گۆں «ترانکاری» ءَ په ڈیه ءُ جهانے نفع ءَ انت

سنی‌آنلاین| شیخ‌الاسلام مولانا عبدالحمید ماں زاهدان ءِ جمعه نماز ءِ دیوان ءَ (27 خرداد 1401/ 17 ژوئن 2022) وتی بژن ءَ ایران ءِ جوهری ترانکاریانی نونێں جاورے بارو ءَ درشان کرت ءُ شه آیی ضرران ڈاه دات ءُ هردو نیمگے پاٹیانَ په نرمی ءُ مدارا ءَ سک سۆکه ئِے کرت.

په سنی‌آنلاین ءِ سرهال ءَ شیخ‌الاسلام مولانا عبدالحمید درشان کرت: بن‌بستے که ایران ءِ جوهری ترانکاریانی دێم ءَ آتگ ءُ برےبرے جنگی پاترپ هم اشکنگَ بیت، پریشانی ءِ سبب بوتگ. پهکاں پریشان انت که دگه جنگے ماں ڈیه ءَ بنگیج مه بیت که اے جنگ په تیوگێں دنیا ءَ خطرناک انت.

واجه ءَ گێش کرت: ماں یوکراین ءِ جنگ ءَ روس ءِ کارزانت ءُ ذمه‌وارانی ردێں رهبنداں سبب بوت انت که هم روس ءِ سرچمگ بیران بےانت ءُ هم هردو نێمگ گۆں جانی ءُ مالی ئێں بیرانیاں آماچ بےانت که اێشی بازێں بدێں اثرے ماں دنیا ءِ ملکاں داشتگ. نێٹو ءِ بێڑ به اۆگانستان ءَ ءُ امریکا ءِ بێڑ به عراق ءَ هم ناسنجتگێں جنگ ات انت که جانی ءُ مالی ئێں بیرانی اش داشتگ.

زاهدان ءِ جمعه ءِ امام ءَ گوشت: اگاں ایران ءُ دنیا ءِ شهزۆرانی میانجینا جنگ بیت، گڑا گۆں دو پاٹی ءِ وس ءُ تهک ءَ، ماں میان‌رودرهت/ خاورمیانه ءَ بیران‌کنۆک ءُ ابُن کنێں جنگے بیت که آیی آچه به آسمان ءَ رس انت ءُ چشێں جنگے بنگێج کنگ هچ بر عاقلانه نه انت.

واجه ءَ تچکاتچک گوشت: عاقلانه اێش انت که دو پاٹی گۆں ترانکاری ءَ دێم ءَ برو انت ءُ هم سرکار ءُ هم شهزۆراں نرمی ءُ مدارا کن انت ءُ جمهوری اسلامی هم په دێمداری شه جنگ ءَ گێشتر نرمی کنت.

مولانا عبدالحمید گێش کرت: جوهری مسئله اگاں گۆں ترانکاری ءَ گێشءُگیوار بیت اے په ایران ءُ تیوگێں دنیا ءِ نفع ءَ انت، پچے که ڈیه دگه جنگے را سگّ اتَ نه کنت. ماں ڈیه ءَ آشۆپ باز انت، نباید گێشتر بیت، پهکاں باید په دێمداری شه جنگ ءَ جهد کن انت.

🔹ایرانے بندش ءُ تحریم، شه هما اول ءَ ردێں سیاستے ات

زاهدان ءِ جمعه ءِ امام ءَ وتی هبرانی دێمتر ءَ په بندشانی زورگ ءَ سکّ سۆگه کرت ءُ گوشت ئِے: ایرانے بندشاں نه تهنا گێش مه بےانت، بلکه اے بندشاں زورگ بےانت. ایران گێش شه هشتاد میلیون ءَ آباتی دار ایت. آوان که اے بندشانَ اێر کرتگ، زان انت که گێشترین ضرر ءُ نقصان استمانے سر ءَ انت.

واجه ءَ ٹکاٹک گوشت: بندش ءِ سیاست شه هما اول ءَ ردێں سیاستے بوتگ ءُ اے سیاست ءُ بندشاں باید گۆں ترانکاری ءَ گێشءُگیوار بےانت.