مذهبی ءُ اعتقادی مسائلاں شه شخصی احوالان انت؛ حکومت ءُ دۆلتاں اے مسائلانی تها دخالت مه کن انت

شیخ‌الاسلام مولانا عبدالحمید، ماں زاهدان ءِ جمعه نماز ءِ دیوان ءَ (13 خرداد 1401/3 ژوئن 2022) «مذهبی ءُ اعتقادی مسائلانَ» شه «مردمانی شخصی احوالاں» زانت ءُ مسلمان ءُ نامسلمانێں حکومتانَ شه «دخالت به مردمانی هورتێں مسائل ءُ مذهبی مسائلاں» مکن کرت.

په سنی‌آنلاین ءِ سرهال ءَ شیخ‌الاسلام مولانا عبدالحمید درّائێنت: بازێنے شه حکومتاں لۆٹ انت که هر چیز ءِ تها هۆر بےانت، اے په هر حکومتے ضرر ءَ انت، چِه آ حکومت اسلامی بیت یا بےدین. مذهبی ءُ اعتقادی مسائلاں شه مردمانی شخصی احوالان انت که دولتاں نباید دخالت کن انت.

واجه ءَ سکّ سۆگه کرت: مردماں باید مذهبی آزاتی ءُ ند ءُ گپتارے آزاتی داشته بےانت ءُ توان انت نقد کن انت. ماں هر چاگردے که انتقاد ءِ دێم گرگ بیت اۆد ءَ فساد ءُ مشکل جۆڑ بیت. گۆں انتقاد ءَ انسان وتی کمی ءُ سستیانَ سرپدَ بیت ءُ چاگرد اصلاحَ بیت. مسلمان ءُ نامسلمانێں حکومتاں باید سکی ءُ مشکلانَ سگّ انت ءُ په عدالتے اجرا ءُ مردمانی آزاتی ءُ تاهیر ءَ جهد کن انت.

زاهدان ءِ جمعه ءِ امام ءَ درشاں کرت: واجه رسول‌‌الله صلّی‌الله‌علیه‌وسلم ءَ وتی زمانگ ءَ انچۆ الله ءِ حکمانَ ماں چاگرد ءَ اجرا کرت که آ زمان ءَ نابرابری ءُ بےعدالتی ءُ مۆک نه ات. واجه رسول‌الله صلّی‌الله‌علیه‌وسلم ءَ مردمانَ اصلاح کرت. اسلامی دین ءَ که شه «عدالت» ءُ «احسان» ءَ برزتر انت، په چاگرد ءَ آورت ءُ ماں دنیا ءِ مردمان بدلی ئِے آورت.

واجه ءَ سکّ سۆگه کرت: «عدالت» پهکانی کرّ ءَ فرض ءُ واجب انت ءُ لهتے شه اسلامی مذاهباں «عدالت» ءَ را شه دینَے بنی مسائلان زانتگ، پمێشا باید عدالت ماں چاگرد ءَ اجرا بیت تاں تاهیر ءُ امنیت بێت.

🔹دنیا ءِ امنیت ءُ تاهیر گۆں «عدالت ءِ اجرا ءَ» همگرنچ انت

مولانا عبدالحمید وتی هبرانی دێمتر ءَ به «عدالت ءُ انصاف» ءِ ارزشت ءَ به بندگانی حق ءِ تها ءُ آیی اثر ءَ ماں چاگرد ءَ اشاره کرت ءُ گوشت ئِے: الله پاک ءَ تیوگێں پیغمبرانَ په عدالت ءُ انصافے تبلیغ ءُ اجرا ءَ دێم داتگ. دنیا ءِ تاهیر ءُ امنیت گۆں عدالت ءَ همگرنچ انت. وهدےکه دنیا ءِ تها بےعدالتی ءُ بےانصافی بیت گڑا دنیا ءِ مردماں گۆں مۆنجاتی، تکانسری ءُ نگرانی ءَ آماچَ بےانت. جانی، مالی، سسایی ءُ مجگی امنیت گۆں عدالت ءَ همگرنچ انت. مردمانی مرۆچی ئێں تیوگێں نگرانی ءُ مشکلانی منانک انسانانی سستی ماں عدالت ءِ اجرا ءُ آوانی بےانصافی الله ءِ بندگانی حقے تها انت.

واجه ءَ گێش کرت: تیوگێں مردماں مکلف انت که عدالت ءُ انصاف ءَ بندگانی حقے تها کمار کن انت. الله ءِ نافرمانی، کفر، شرک ءُ بےپروایی شه گناه ءُ حرام ءَ ظلم ءُ بےانصافی انت الله ءِ حقے تها. کسے که نماز، پاک‌ونڈ ءُ الله ءِ آدگه حکمانی تها سستی کنت چۆناهی ءَ ظالم ءُ بےانصافێں مردمے. مزن‌شانێں قرآن ءُ واجه رسول‌الله صلّی‌الله‌علیه‌وسلم ءِ فرمایشانی نادلگۆشی ٹوهێں بےانصافی ءِ که ارمان مردم گۆں آیی آماچ انت.

دارالعلوم زاهدان ءِ سرمستر ءَ گوشت: مرۆچی ظلم بندگانی حقے تها ماں چاگرد ءَ باز بوتگ؛ مردمانی حقاں چۆ پِسّ ءُ ماس ءِ حق ءَ، زهگان ءُ همسایگ ءُ دگه حقاں پادمالیَ بےانت. راجی ءُ مذهبی اقلیتانی حقانی دلگۆش کنگ ماں دنیا ءَ عدالتے رد ءَ انت که گێشترێں مردم باید کمێنانی حق ءَ کمار کن انت.

🔹واجه خمینی ءِ کارکردحاصلاں گۆں «عدالت ءِ اجرا» ءُ «پراهدلی» ءَ مان انت

زاهدان ءِ جمعه ءِ امام ءَ ماں دگه بهرے شه وتی هبراں گۆں اشاره به واجه خمینی ءِ مرک ءِ سالرۆچ ءَ، گوشت ئِے: واجه خمینی ءَ گۆں وتی چِست بیگ ءَ ماں دنیا ءَ آگاهی آورت ءُ ظالم ءُ زۆرغنڈ ءُ ٹوهێں حکومتانی دێم ءَ که استمانانی سرا ظلم اشَ کرت، توار چست ئِے کرت.

واجه ءَ گوشت: بێران بوتگێں رهشۆن ءِ کارکردحاصلاں تهنا گۆں عدالت ءُ انصاف ءِ اجرا ءُ دورچاری ءُ پراهدلی ءَ مان انت.

🔹ماں سرکاری وانگجاهانی لوار ءِ تعطیلی ءَ په زهگانی هێلکاری ءَ برنامه هلگ بیت

شیخ‌الاسلام مولانا عبدالحمید ماں وتی هبرانی گڈسر ءَ زانت‌لۆٹانَ په «قرآن ءُ دینی احکامانی یات گرگ ءَ» ماں سرکاری وانگجاهانی لوار ءِ تعطیلی ءَ سۆگه کرت ءُ گوشت ئِے: ماں سرکاری وانگجاه ءُ مزن‌شهدربرجاهانی تعطیلی ءَ وتی زهگانَ ویل مه کن ات، بلکه پراوان برنامه به هل ات تاں قرآن ءُ دینی احکامانَ یات گر انت.

واجه ءَ گوشت: درّێں ورنائان! قسم به الله ءِ نام ءَ که نه توان ات مه دنیا ءَ گهتر شه دین ءُ تقوا ءُ نماز ءَ ودی کن ات، شه اے بابت ءَ په مسیتاں بیا ات ءُ دین ءَ سکّ سات ات. واجه ءَ گوشت کارچ‌جنگی ءُ مردمانی کشگ په ویلێں هبرے سر ءَ باز رڈێں کارے. کسے که قتلَ کنت، وت را ءُ وتی لۆگمان ءَ گۆں مشکلاں آماچَ کنت. کارچ‌کشی، بدتبی، نشه ئی ءُ ترندآپ‌واری په لۆگماں ءُ مئے چاگرد ءَ ننگ انت ءُ دیندار ءُ وانندگێں ورنا چاگردے پهرءُ شأن انت. پمێشا ما پهک په ورنائانی اصلاح ءُ دینداری ءَ جهد کن اێں.