مسلمانێں حاکماں چار خلیفه ءِ حکومت ءَ وتی پێشۆنک کن انت

چار خلیفه ءِ سی سالی ئێں خلافتے دور، واجه رسول الله صلّی‌الله‌علیه‌وسلم ءِ رهبند ءِ روگه ءَ بوتگ ءُ گهترێں دور بوتگ. خلیفه وت گشنگ بوتگ، بلێں استمان سیر بوتگ. مهتر عمر رضی‌الله‌عنه وهدے که خلیفه بوت، منبرے سر ءَ وتی پُچّ ءِ پینگانَ حسابِ کرت، سیزده پینگ پُچّے سرے هت ات. اے آوانی سۆبمندی ءِ راز ات. آوان زرّءُمالے پد ءَ نه هت انت ءُ مال مچ اش نه کرت. بلکه آوان په راستی په مردماں هزمت کرت ءُ مردمانی لاپ ءَ را سیر اش کرت. آوان نه پر وت بازار ءُ پاساژے جۆڑ کرت ءُ نه په وتی وارثان باگ ءُ زندگی جۆڑ اش کرت، بلکه وتی زندگی ءَ په مردماں ندر اش کرت.

درێگے مئے حاکماں ءُ مسلمانێں حاکماں شه خلفای راشدێں ءُ مهتر علی رضی‌الله‌عنه ءِ سیرت ءَ پدگیری کرتێں که مهتر علی ماں وتی حکومتے دوره ءَ هچ دنیا ءِ پد ءَ نه شت، بلکه آدگرانی دنیا ءَ آبادِ کرت، پمێشا الله ءَ آوانَ خلیفه نام داتگ ءُ ماں قرآن ءَ پرمائێنتگ ئِے که من شما را حکومتَ دےآں که حکومت مزنێں دادے، به شرطےکه کسے راست حکومت کنت ءُ په عدالت ءُ هزمت به مخلوق ءَ جهد کنت. چار خلیفه ءِ حکومت ءِ دور انچێں دورےات که آیی جۆڑه ماں دنیا ءَ باز کم انت.

تفسیر ءِ درس، 22 اردیبهشت 1401