نِهرانی بازێں گرانی سبب بوتگ مردماں تکانسر بےانت

سنی‌آنلاین| شیخ‌الاسلام مولانا عبدالحمید ماں زاهدان ءِ جمعه نماز ءِ دیوان ءَ (16 اردیبهشت 1401/ 6 مے 2022) گۆں اشاره به لهتے هالاں نانے گرانی ءِ بارو ءَ شه «نهرانی بازێں گرانی» ءَ سکّ انتقاد ئِے کرت. واجه ءَ ملک ءِ رۆزیگی مشکلانی رۆتگ ءَ را ملکاری مشکلاں زانت ءُ شه حکومت ءُ سرکار ءَ لۆٹ ات ئِے که اے بارو ءَ شه مخالف ءُ موافقانی دیدانکاں کارمرز کن انت.

په سنی‌آنلان ءِ سرهال ءَ مولانا عبدالحمید ماں یک بهرے شه وتی هبراں درشان ئِے کرت: ارمان که تورم ءُ گرانی ملکے تها باز بوتگ ءُ گرانێں نهراں مردمانی سرێن ءَ را پرۆشتگ ءُ استمان تکانسر بوتگ.

واجه ءَ گوشت: حکومت، ملک ءِ ذمه‌وار، سرکار ءُ ما پهکانی اگده اے گرانی، ناداری ءُ بےکاریانی بارو ءَ باز گران انت، نهرانی گران بیگ ءَ مردمانَ  باز گۆں مشکلاں آماچ کرت که هر بودێں مردم ءِ زرد ءَ رنجێن ایت.

زاهدان ءِ جمعه ءِ امام ءَ به آرت ءُ نان ءِ نهرے گران کنگ ءَ اشاره کرت ءُ گوشت ئِے: آ پێم که هالانی تها آتگ، نانے نهر گرانَ بیت. نان مردمانی ائولی نیاز انت. ماں چاگرد ءَ بازێں مردمے انت که وس اش گۆں گۆشت ءُ برنج ءَ نه رس ایت، اگاں مردمانی وس گۆں نان ءَ هم مه رس ایت گڑا شه گشنگی ءَ بێرانَ بےانت.

واجه ءَ تچکاتچک گوشت: واجه‌کارانَ گوش انت که ما نان ءِ گرانی ءِ بدل ءَ مردمانَ زرَّ دےاێں. ما گوش اێں شمے زراں، شمے سرے خیرات، ما شمے زرانَ دگه جاه ءَ هم دیستگ، اے گپان بس په مردمانی دل وشی ءَ گوشگَ بےانت. گڑا شما نان ءَ گران مه کن ات تاں چاگردے آ مردماں که وس اش گۆں دگه چیزے نه رس ایت کم‌ته‌کم توان انت نانے بۆر انت. بازێں لۆگمان انت که گۆں نان ءِ همے نهر ءَ نه توان انت نان گر انت چه رس ایت به نان ءِ گرانێں نهر ءَ. پمێشا اے لس مهلوکانی لۆٹ انت ءُ یک ملکی لۆٹے که نان ءِ نهر گران مه بیت.

مولانا عبدالحمید «ملکاری مشکلانَ» ملکے رۆزیگی مشکلانی رۆتگ زانت ءُ گوشت ئِے: من ٹکاٹکَ گوش آں ءُ توان آں که اے گپ ءَ ثابت کن آں که ملک ءِ ملکاری مشکلاں رۆزیگی مشکلانی رۆتگ انت. شما ملک ءِ ملکاری مشکلان ءَ جۆڑ کن ات ءُ اقتصادی مشکلانَ به هل ات، اگاں اقتصادی مشکلان جۆڑ نه بوت انت گڑا شما همائانی گُٹ ءَ گر ات که ملکاری مشکلان ءَ رۆزیگی مشکلانی رۆتگَ زان انت.

واجه ءَ ملک ءِ ذمه‌وارانَ سکّ سۆگه کرت: شما ملک ءِ اقتصادی مشکلانی توجیل ءَ شه اقتصادزانتاں سۆج مه کن ات. ستک کن ات که اقتصادزانتاں نه توان انت ملک ءِ اقتصادی مشکلانَ حل کن انت، پچےکه ملکے اقتصادی مشکلانی علت دگه جای انت. شما ملک ءِ تهے ءُ ڈنے سیاستانی تها بدلی بیار ات. اے بارو ءَ تهنا په سرکارے پاٹی ءُ آوانی کارزانتاں دلجمع مه به ات، بلکه اے بارو ءَ شه دینی پاگواجهاں که شه قرآن ءُ حدیث ءَ زان انت ءُ همےپێم شه زانشتجاه ءُ چاگردے مزن سسائاں مدد لۆٹ ات.

زاهدان ءِ جمعه ءِ امام ءَ گوشت: اگاں اے چیزانَ کِمار کن ات گڑا ملکے تیوگێں مشکلاں ءُ اقتصادی مشلکلان حلَ بےانت ءُ همےپێم ملکی زرّے ارزشت که نون شه هما کم ارزشت ترێں زراں انت، برزَ رئوت. پراستی پچے زرے ارزشت اےرنگ کم انت؟! اے چیز ذمه‌وارانی اگده ءَ گرانَ کنت ءُ ذمه‌واراں باید اێشی بارو ءَ چارگے گند انت.