«سسا ءُ تدبیر» په آزادشهر ءِ مسئله ءِ گێشءُگیوار کنگ ءَ پهکێں اهل‌سنت ءُ آزاتێں مردمانی لۆٹ انت

شیخ‌الاسلام مولانا عبدالحمید ماں زاهدان ءِ جمعه نماز ءِ دیوان ءَ (10 دی‌ماه 1400/ 29 سپتمر 2021) ذمه‌وارانی «سسّا ءُ تدبیر ءَ» ماں آزادشهر ءِ جمعه نماز ءِ بارو ءَ «تیوگێں اهل‌سنت ءُ آزاتێں مردمانی لۆٹ» زانت.

په سنی‌آنلاین ءِ سرهال ءَ مولانا عبدالحمید درّائێنت: پهکێں اهل‌سنت ءُ آزاتێں مردمانی لۆٹ شه ملک ءِ ذمه‌واراں همێش انت که آزادشهر ءِ نماز جمعه ءِ بن‌گپ ءُ مولانا گرگیج حفظه‌الله ءِ مسئله ءَ که آ واجه یکّے شه دلسۆچ ءُ یکویی‌لۆٹێں پاگواجهان اِنت، گۆں سسّا ءُ تدبیر ءَ گێشءُگیوار کن انت.

واجه ءَ درشان کرت: اے چیز سببَ بیت که یکویی ءُ تپاک مردمانی نیام ءَ گێشتر بیت ءُ آ دشمنان که لۆٹ انت گۆں اے بن‌گپانی سبب ءَ جێڑه ءُ ناتپاکی جۆڑ کن انت، ناامێت بےانت. ما امێتوار اێں اے بن‎گپ گۆں ذمه‌وارانی سسّا ءُ تدبیر ءَ گێشءُگیوار بیت.

🔹گۆں پیامبر، صحابه ءُ اهل‌بیتانی سیرت ءِ رد ءَ کرد کنگ ءَ توان اێں وتی رهوت ءَ گۆں الله ءَ گێش کن اێں

شیخ‌الاسلام مولانا عبدالحمید ماں دگه بهرے شه وتی هبراں عمل ءُ کرد ءِ سستی ءَ را شه مرۆچی ئێں چاگرد ءِ مزنێں مشکلاں زانت ءُ گوشت ئِے: مرۆچی ئێں چاگردے مشکل اێش اِنت که نێکێن واجه‌کارانی سیرتے رد ءَ کردَ نه بیت. په دپا گوش اێں که ما گۆں رسول الله ءُ صحابه ءُ اهل‌بیتاں محبت دار اێں بلێن وتی کردارانی تها ءُ حتا ماں نماز ءَ که دین ءِ ٹوهێں رکن اِنت، سست اێں.

واجه ءَ گێش کرت: ادعا ءُ کردارانی سستی که مرۆچی ماں چاگرد ءَ هست، ماں اسلام ءِ راجدپتر ءِ دراجی ءَ نه بوتگ. پمێشا لازم اِنت که گۆں رسول الله ءُ صحابه ءُ اهل‌بیتانی سیرت ءِ رد ءَ کرد کنگ ءَ وتی رهوت ءَ گۆں الله ءَ گهتر کن اێں.

زاهدان ءِ جمعه ءِ خطیب ءَ درشان کرت: الله ءَ داشته به اێں ءُ په دنیایی سۆبمندیانی هاتر ءَ شه الله ءَ بےترانگ مه به‌اێں. الله گۆں تقوا، راستی، امانتداری، یکرنگی ءُ شریعت ءُ رسول الله ءُ اولیا ئانی سیرت ءِ  رد ءَ کرد کنگ ء داشتگ ءَ بیت. الله تعالی ٹوهترێں امێت اِنت.

واجه ءَ گڈسر ءَ نمازوانۆکان ءَ په «توبه» ءُ «خیرات ءِ دیگ» ءَ دلبڈی دات ءُ گوشت ئِے: صدقه ءُ خیراتاں ماں الله ءِ رحمتانی اێر آیگ ءَ اثر دار انت. وهدےکه توبه گۆں صدقه ءَ هۆر بیت زوتر منّگ ءَ بیت. امام ابوحنیفه رحمه‌الله باور دار ایت که هَورے نماز توبه ءُ استغفارے.