سیستان ۆ بلوچستان ءِ گێشترێں مردماں استان ءِ بهر کنگ ءِ بارو ءَ آزگ‌سما انت ۆ اے چیز ءَ نه‌لۆٹ انت

شیخ‌الاسلام مولانا عبدالحمید ماں زاهدان ءِ جمعه نماز ءِ دیوان ءَ (21 آبان 1400/ 12 نومبر 2021) گۆں اشاره به استان ءِ بهر کنگ ءِ بن‌گپ ءَ درشان ئِے کرت که استان ءِ گێشترێں مردماں مخالف اَنت ۆ اے بن‌گپ ءِ بروردانی بارو ءَ ڈاه دات.

 ◽️ په زاهدان ئِے اهل‌سنتے جمعه‌ ءِ پیشنمازے کارگسے هال‌رسانی‌ئے بنجاهے سرهالا، شیخ‌الاسلام مولانا عبدالحمید درشان کرت: اے رۆچاں استان ءِ بهر کنگ ءِ بن‌گپ ماں فضای مجازی ءَ گرم انت ۆ لهتے شه پارلمان ءِ جهگیراں مسائلے را پێش کرتگ که گۆں قوماں ۆ وڑوڑێں پاٹیانی پدگَرد ءَ دێم‌په‌دێم بوتگ.

◽️واجه ءَ گوشت: الحمدلله اے استان ءِ راج، وڑوڑێں مذاهب ۆ شیعه و سنیانی نیام ءَ جُهلێں راجدپتری‌ئێں رهوت ۆ بازێں محبتے هست، شه جغرافیا ءِ لحاظ ءَ هم سیستان ۆ بلوچستان ءِ وڑوڑێں ڈیهاں یکءُآدگر ءَ پوره ءَ کن اَنت. اگاں ما چهبار ءَ شه زاهدان ءَ جتا کن اێں، یا زاهدان ۆ چهبار ۆ ایرانشهر ءَ شه سیستان ءَ جتا کن اێں یا سیستان ءَ شه آدگه استان ءَ جتا کن اێں ۆ هر کجام جتائێں استانے بیت، گڑا مئے استانے تها نقص ۆ کمی ءَ کێت.

◽️زاهدان ءِ جمعه ءِ امام ءَ ٹکاٹک گوشت: سیستان ۆ بلوچستان ءِ گێشترێں مردماں استان ءِ بهر کنگ ءِ بارو ءَ آزگ‌سما ۆ دلگراں اَنت ۆ اے چیز ءَ نه لۆٹ اَنت. استان ءِ مردمانی دیدانک اێش اِنت که راجدپتری ۆ جغرافیایی رهوتاں که اے ڈیه ءِ مردمانی نیام ءَ هست اَنت نباید گستا بےاَنت.

◽️واجه ءَ گێش کرت: چه اشکالی دار ایت که ماں ایران ءِ ملک ءَ سیستان ۆ بلوچستان یک ٹوهێں ۆ شاهگانێں استانے بیت، کساسِ یک اروپایی‌ئێں ملکے ۆ ما اے استان ءِ مردمان ءَ یکءُآدگرے کنکّ ءَ سات اێں ۆ عدالت ءَ آوانی نیاما اجرا کن اێں؟

◽️مولانا عبدالحمید «عدالت ءِ اجرا ءَ» را شه سیستان ۆ بلوچستان ءِ دێمروی ءِ گهترێں راهاں زانت ۆ گوشت ئِے: عدالت ءِ اجرا ۆ مردمانی نیاما همدلی ۆ تپاک ءِ جۆڑ کنگ استان سیستان ۆ بلوچستان ءِ گهترێں دێمروی ءِ راه اِنت.

◽️زاهدان ءِ جمعه ءِ خطیب ءَ درائێنت: استان ءِ بهر کنگ ماں اے  جاور ءَ که ملک گۆں رۆزیگی سکّیاں آماچ اِنت، نه تهنا هچ کمکے به اے استان ءَ نه کنت، بلکه نۆکێں دلگرانی ئے په مردماں جۆڑ ءَ کنت ۆ بازێں مردمے را شۆرێن ایت.

◽️شیخ‌الاسلام مولانا عبدالحمید وتی هبرانی گڈسر ءَ سکّ سۆگه کرت: منی لۆٹ شه استان ءِ جهگیراں که دلسۆچێں مردم اَنت، اێش اِنت که استان سیستان ۆ بلوچستان ءِ بهر کنگ ءِ بن‌گپ ءَ ماں پارلمان ءَ پێش ۆ رندگیری مه کن اَنت، پچےکه اے استان همے وڑ ءَ مان ایت. استان ءِ بهر کنگ ءِ بدل ءَ په مردانی کار ۆ دندا ءَ چارگ ءِ بیت که خراب بیان انت ۆ اے استان ءِ مردماں گێشتر دلگۆش بےاَنت ۆ مردماں گێش شه پێسر ءَ گۆں هم بےاَنت، اے چێز به یکویی، براسی، امنیت ۆ استان ءِ دێمروی ءَ کمک ءَ کنت.