شیخ‌الاسلام مولانا عبدالحمید ماں زاهدان ءِ جمعه نمازے دیوان ءَ (۳۰ مهرماه ۱۴۰۰/ 23 اکتوبر 2021) «نێکێن تب» ءَ را شه مهتر رسول الله صلّی‌الله‌علیه‌وسلم ءِ مهمترێں کارکرد حاصلاں زانت ۆ گۆں اشاره به وش تبی ءِ پراهی ءَ ماں اسلام ءَ لهتێں نمونگ شه چاگردی وش تبیانءَ ماں اسلام ءَ بیانِ کرت.
په زاهدانِ اهل‌سنتے جمعه‌وے پیشنمازے کارگسے هال‌رسانی‌ئے بنجاهے سرهالا، شیخ‌الاسلام مولانا عبدالحمید پد شه اے آیتے وانگ ءَ «قُلْ هَٰذِهِ سَبِيلِي أَدْعُو إِلَى اللَّهِ عَلَىٰ بَصِيرَةٍ أَنَا وَمَنِ اتَّبَعَنِي وَسُبْحَانَ اللَّهِ وَمَا أَنَا مِنَ الْمُشْرِكِينَ» [یوسف: ۱۰۸] درشان کرت: الله تعالی ءَ پیغمبر صلّی‌الله‌علیه‌وسلّم ءِ سبب ءَ بےمٹێں داب ۆ سنت ۆ وش تبی په انسان ءَ دێم داتگ که په انسان ءِ سۆبمندیءَ ماں اے دنیا ۆ آ دنیا ءَ پایدگ دار اِنت.
واجه ءَ گوشت: مهتر رسول الله صلّی‌الله‌علیه‌وسلّم ءَ گهترێں تبءَ را یات داتگ. تیوگێں دۆد ءُ ربێدگانی خوبی شه انبیا، آسمانی‌ئێں وحی ۆ هاس قرآن مجید ۆ پێغمبر صلّی‌الله‌علیه‌وسلّم ءِ سنت ۆ تعلیمان اَنت. چوناهی ءَ دنیاءِ تیوگێں جوانێں دۆداں شه اسلامءِ دۆداں اثر گپتگ.
زاهدان ءِ جمعه ءِ امام ءَ وتی هبرانی دێمتر ءَ لهتے شه اسلامءِ تعالیمان ءَ بیان کرت ۆ گوشتِ: رسول الله صلّی‌الله‌علیه‌وسلّم په راستی ۆ راست گوشگ ءَ سکّ سۆگه کرتگ. راستی شه تب ءِ مهمێں اصلان اِنت. راست گوشانی دل سالم اِنت. درۆگ انسان ءَ شه الله ءَ دورَ کنت.
واجهءَ درشان کرت: یک دگرے شه پێغمبر ءِ تعلیمان صله رحمی ۆ نێکی گۆں پت ۆ مات ۆ دگه سیادانِ اِنت. همےپێم نێکی گۆں همسایگاں شه رسول الله صلّی‌الله‌علیه‌وسلّم ءِ بےجۆڑه‌ئێں تعالیمان اِنت. اسلامی دۆد ما را یات ءَ دنت که گۆں همسایگان نێکی کن اێں.
دارالعلوم زاهدان ءِ سرمسترءَ «ناجۆڑے نیاد ءَ» را یکے شه اسلامی دین ءِ تعالیمان زانت ۆ گوشتِ: پێغمبر صلّی‌الله‌علیه‌وسلّم ءَ اسلامی امت ءَ را دلبڈی داتگ که په نادراهانی نیاد ءَ برو اَنت. حدیث ءِ تها آتگ که اگاں شما سهب ءَ په ناجۆڑے نیاد ءَ برو اِت الله تعالی هپتادهزار فرشته ءَ فرمانَ دنت که تاں شپ ءَ په شما دعای خیر کن اَنت ۆ اگاں شپ ءَ په نادراهے نیاد ءَ برو اِت تاں سهب ءَ هپتادهزار فرشته په شما دعای خیر ءَ کن اَنت.
زاهدان ءِ جمعه ءِ خطیب ءَ وتی هبرانی دێمتر ءَ گوشت: باید مئے چم ۆ زوان ۆ تیوگێں ڈڈر پاک بیت. هچ کسَے مال ۆ ناموس ءَ په بدی سێل مه‌کن اێں. گۆں هچ کس ءَ کێنگ مه‌کن اێں. پهکێں دادان ءَ شه الله ءِ نێمگ ءَ زان اێں.
زاهدان ءِ جمعه ءِ امام ءَ وتی هبرانی گڈسرا گوشت: ما امێتوار اێں الله تعالی مسلمانان ءَ قرآن ۆ اسلام ۆ پێغمبر صلّی‌الله‌علیه‌وسلّم ءِ سیرتے سرا تپاک دنت که آوانی ردءَ قوم گرایی ۆ بیجائێں ترندی رد انت ۆ پراهدلی ۆ مدارا پسند اِنت.