جوانێں رهبند داشتن په نۆکێں پدرێچءِ آپسله ۆ هێلکاریءَ شه لۆگمان ۆ دولتءِ باز مهمێں اگدهاں اِنت

سنی‌آنلاین|شیخ‌الاسلام مولانا عبدالحمید ماں زاهدانءِ جمعه نمازءِ دیوانءَ (26 شهریور 1400/ 17 سپتمبر 2021) گۆں اشاره به دینی ۆ مزن شهدربرجاهی علومانی یات گرگءِ ارزشتءَ ۆ معنوی چیزانی دلگۆش کنگءَ ماں انسانی چاگرداں، جوانێں رهبند داشتن په نۆکێں پدرێچءِ آپسله ۆ هێلکاریءَ را شه لۆگمان ۆ دولتءِ باز مهمێں اگدهاں زانت.

په زاهدانءِ اهل‌سنتے جمعه‌ئے پیشنمازءِ کارگسے هال‌رسانی‌ئے بنجاهے سرهالا، شیخ‌الاسلام مولانا عبدالحمید پد شه اے آیتءِ وانگءَ: «يَا أَيُّهَا الَّذِينَ آمَنُوا قُوا أَنْفُسَكُمْ وَأَهْلِيكُمْ نَارًا وَقُودُهَا النَّاسُ وَالْحِجَارَةُ عَلَيْهَا مَلَائِكَةٌ غِلَاظٌ شِدَادٌ لَا يَعْصُونَ اللَّهَ مَا أَمَرَهُمْ وَيَفْعَلُونَ مَا يُؤْمَرُونَ» [تحریم: ۶] درشانِ کرت: یکے شه مُچِّ استمان ۆ دولتانی باز مهمێں گڑتیاں جوانێں رهبند په آیۆکێں پدریچانی آپسله ۆ هێلکاریءَ اِنت. اگاں نۆکێں پدرێچ په‌جوانی آپسله بیت ۆ علم ۆ زانت کٹ کنت ۆ ایمان ۆ خو ۆ کردارِ جۆڑ بیت، آ پدرێچءِ آیۆک باز زبرءَ بیت.

واجهءَ درّائێنت: اگاں ما مه‌توان اێں به وتی ڈُبهءَ نۆکێں پدرێچءِ باروءَ خب عمل کن اێں ۆ تزکیه بوتگ ۆ مۆمن ۆ دیندار ۆ نێک ۆ جوانێں زهگ رۆدێن اێں، گێش شه اێشی که مانشءِ تها راحت نه‌اێں ۆ گۆں اللهءِ عذابءَ آماچَ بَےاێں، اے نۆکێں پدرێچ هم گۆں وتی ناجایزێں کرداران پِسّ ۆ پیرۆکانی تیوگێں مادی ۆ معنوی‌ئێں کَٹّانءَ پادمالءَ کن اَنت.

دارالعلوم زاهدانءِ سرمسترءَ گۆں استناد شه سوره تحریمءِ ششمی آیتءَ گوشتِ: قرآن کریمءَ «وتی جندءِ رکّێنگ» ۆ «لۆگمانءِ رکّێنگ»ءَ را شه مۆمنانی باز مهمێں ڈبهاں بیان کرتگ. باید انسانءِ ائولی مهمێں چیز اے بیت که وتءَ شه جهندمءِ عذابءَ رکّێن ایت ۆ پدا وتی زهگ ۆ گسءِ مردمانی فکرءَ بیت که آوانءَ شه جهندمءِ آچشءَ رکّێن ایت. مرۆچی سرپدێں استمان ۆ دێم‌شتگێں حکومت ۆ دولتاں هم نۆکێں پدرێچءِ هێلکاریءَ را وتی مهمێں رهبندانی لڑءِ اولءَ هِشتگ.

🔹گهترێں لۆگماناں هما اَنت که وتی زهگانی دین ۆ دنیائے فکرءَ بَےاَنت

زاهدانءِ جمعهءِ اماما وتی هبرانی دێمترءَ گۆں اشاره به سرکاری وانگجاهانی بنگێج بیگءِ نزیکیءَ گوشت: به مهرماهءِ اولا ۆ وانگجاه ۆ مزن‌شهدربرجاهانی بنگێج بیگءَ نزیکَ بَےاێں. بچگ ۆ جِنِکّان باید علم ۆ زانت ۆ قرآن یات گر اَنت، وانندَگ بےاَنت ۆ خو ۆ کردارش اسلامی بیت، اے شه واجبات ۆ زلورتان اِنت.

واجهءَ سکّ سۆگه کرت: مئے  زهگاں باید ماں وڑ وڑێں رشته ئان کاربلد بےاَنت؛ مئے چاگردءِ نیاز تهنا ڈاکٹری نه‌اِنت، بازێں رشته ئے اَنت که شاید اۆدا گهتر قبول بےاِت ۆ هم هرچ‌اِش کمتر بیت. پرےواستا جهد کن اِت که په رشته ئے گچپێں کنگءَ شۆر کن اِت.

زاهدانءِ جمعه ئے خطیبءَ درشان کرت: منی کلۆ په گرد ورنایان اێش اِنت که وتی نێکێں پسّ ۆ پیرۆکانی راستێن راها یله مه‌کن اِت، په مسیت ۆ نماز جمعهءَ بیا اِت، حلالێن کٹ‌ۆکارانی پدا برو اِت، شه نشه‌ایی ۆ گناه ۆ غفلتءَ پهرێز کن اِت ۆ په شریعتءِ راستێں راه ۆ علمءِ کٹگءِ پدا بےاِت، شمئے عزت ۆ حرمت به علمءِ کٹگ ۆ پدگیری شه دینا اِنت.

🔹سیستان ۆ بلوچستانءِ نۆکێں استاندار «رۆزیگی مشکلانی حل کنگ» ۆ «نابرابریانی دور کنگءَ» وتی کارانی لڑءِ ائولی سرا به‌هلّ ایت

شیخ‌الاسلام مولانا عبدالحمید وتی هبرانی گڈی سرا گۆں اشاره به سیستان ۆ بلوچستانءِ نۆکێں استاندارءَ «رۆزیگی مشکلانی حل کنگ» ۆ «عدالتءِ اجرا» ۆ«تبعیض ۆ نابرابریانی دور کنگ» ۆ «ورگی ۆ کشاورزی آپءِ سرءُپد»ءَ را شه مردمانی مهمترێں لۆٹاں زانت ۆ گوشتِ: گوستگێں هپتگءَ وزیر کشور به استان سیستان ۆ بلوچستانءَ آت ۆ واجه مهندس «حسین مدرس‌خیابانی»ءَ را سیستان ۆ بلوچستانءِ نۆکێں استاندارِ کرت.

زاهدانءِ جمعهءِ اماما گوشت: واجه مهندس خیابانی وسی‌ئێں ورنائے که گێش شه دگه علمی‌ئێں کاربلدیاں، ماں اقتصادءَ زبرێں تجربه دار ایت که ما امێتوار اێں توانت گۆں جوانێں مدیریتءَ سیستان ۆ بلوچستانءِ اقتصادءَ جۆڑ کنت.

واجهءَ گوشت: نۆکێں استاندار همےپێم ورگی ۆ کشاورزی آپءِ مشکلءَ گۆں دریابءِ آپءَ حل کنت که لس مردمانی لۆٹ انت. بازێں سالءِ که ماں دنیاءَ بازێں ملکءِ گۆں خاصێں دستگاهاں دریابءِ آپءَ وشءَ کن انت ۆ په ورگ ۆ کشاورزیءَ کارمردءَ کن انت.

مولانا عبدالحمید گڈسرءَ گۆں دعای خیر ۆ سۆبمندیءِ واهشتءَ په مهندس موهبتی، سیستان ۆ بلوچستانءِ پێسرءِ استاندارءَ درشانِ کرت: امێتوار اێں سیستان ۆ بلوچستانءِ نۆکێں استاندار په اے استانءِ مردمان سبب خیر بیت ۆ مردمانی گڑتی ۆ مشکلانءَ کم کنت.