اۆگانستانءِ جنگۆلان گۆں ترانکاری ۆ سُهلءَ مسائلانَ گێش‌ۆگیوار کن اَنت ۆ جنگ ۆ مێڑانَ هلاس کن انت

سنی‌آنلاین| شیخ‌الاسلام مولانا عبدالحمید ماں زاهدان جمعه نمازءِ دیوانءَ (8 مرداد 1400/30 جولای 2021) ماں یک بهرءِ شه وتی هبران گۆں تأکید په اۆگانستانءِ جنگ ۆ مێڑانِ هلاس کنگءَ، جنگۆلانَ سۆگه‌ی کرت که وتی مشکل ۆ ناراستیانءَ گۆں ترانکاری ۆ سُهلءَ گێش‌ۆگیوار کن انت.

په زاهدانِ اهل‌سنتے جمعه‌وے پیشنمازے کارگسے هال‌رسانی‌ئے بنجاهے سرهالا، شیخ‌الاسلام مولانا عبدالحمید درشان کرت: ماں اۆگانستانءَ بدلی ان بیگ ان اَنت. ما ابید شه دلسۆچی ۆ خێرلۆٹیءَ په اۆگانستانءِ درێں استمانءَ دگه هچ چیزے نه لۆٹ اێں. حضرت مولانا عبدالعزیز رحمه‌الله مدام په اۆگانستانءِ مردمان دعا کرتگ ۆ گرێتگِ.

مولانا عبدالحمید گوشت: بازێنءِ اَنت که اۆگانستانءِ مردمانءَ شۆرێن اَنت. منی سۆگه به اۆگانستانءِ استمانءَ اێش اِنت که دگرانِ شۆرێنگانءَ نادلگۆش کن اَنت ۆ گۆں وت جنگ ۆ مێڑ مه کن اَنت. منی باور همێش اِنت که جنگ ۆ ناراستیءِ دَۆر ماں آ ملکءَ زوت هلاس بیت ۆ اۆدءَ دگه جنگ ۆ مێڑءِ مه بیت.

واجهءَ طالبانءَ شه اۆگانستانءِ ملکءِ واقعیتان زانت ۆ گوشتِ: طالبان دگه ملکءِ مردم نه اَنت، بلکه اۆگانستانءِ مردم اَنت ۆ آدگه اۆگانانِ رنگءَ یکءِ شه اۆگانستانءِ واقعیتان اَنت که گۆں آوانِ نادلگوش کنگءَ اۆگانستان به امنیتءَ نه رس‌اِیت.

دارالعلوم زاهدانِ سرمسترءَ گوشت: اۆگانستانءِ مشکلانِ گهترێں تۆجیل اێش اِنت که گۆں سُهلءَ گێش‌ۆگیوار بےاَنت. منی سۆگه به اۆگانستانءِ نونێں سرکار ۆ اۆگانستانءِ واکان اێش اِنت که جنگ مه‌کن‌اَنت، پچےکه هرد نێمگءِ جنگۆلان اۆگان اَنت که کشگءَ بےاَنت ۆ اۆگانانِ جن ۆ زهگان جنۆزام ۆ یتیم ۆ بےکسترپادَ بےاَنت.

🔸 اۆگانستانءِ دینی ۆ زانتجاهی زانتکاران قرآن ۆ پیغمبرءِ سیرتءِ رۆگهءَ کرد کن انت

مولانا عبدالحمید سکّ سۆگه کرت: اۆگانستانءِ وڑ وڑێں استمان شه زانت‌لۆٹ ۆ وانندگ ۆ دینی ۆ زانتجاهی زانتکاران قرآن ۆ پێغمبر صلّی‌الله‌علیه‌وسلم ءِ سیرتءِ ردءَ وتی ملکءَ جۆڑ کن‌اَنت ۆ عدالت ۆ اللهءِ قانونانءَ اجرا کن‌اَنت.

واجهءَ گێش کرت: چه اشکالءِ دار اِیت که ماں اۆگانستانءَ هم قرآن ۆ اسلامی شریعت اجرا بیت ۆ هم ملک ماں وڑ وڑێں پڑان دێمروی کنت؟! اسلامی دین نه تنها گۆں دێمروی ۆ صنعت ۆ تکنالوجی ۆ نۆکێں علمان مخالف نه اِنت، بلکه مئے باور اێش اِنت که نۆکێں علمان هم شریعتءِ علمانِ رنگءَ سرچمگ اِش وحی اِنت ۆ استمانانِ رندگیءِ سبب اَنت.

زاهدان جمعه‌ئے اماما گێش کرت: منی سۆگه به اۆگانستانءِ راجکماش ۆ دگه ذمه‌واران اێش اِنت که جنگءِ دێمءَ گر اَنت ۆ مردمانءَ به کشتن مه دےاَنت. همےپێم منی سۆگه به اۆگانستانءِ طالبان اێش اِنت که مدارءَ کن اَنت ۆ شه زانتکار ۆ زانتجاهی ۆ اۆگانستانءِ وسی‌ئێں مردمان که آوان هم طالبانِ رنگءَ شه اۆگانستانءِ هنتکانان اَنت، کار گِر اَنت. پهکان یک ۆ آدگرے گُٹّءَ کپ اَنت ۆ گۆں وت محبت کن‌اَنت.

واجهءَ سکّ سۆگه کرت که: نونێں جاورءَ اۆگانستانءِ گواچنی‌ئێں دۆست کسءِ اِنت که مردمانءَ شه جنگ ۆ هۆنرێچیءَ رکّێن اِیت ۆ اۆگانستانءِ دلسۆچ کسءِ اِنت که په قدرتءِ ساتگءَ مردمانَ په کشتن مه دنت.

مولانا عبدالحمید وتی هبرانِ گڈسرءَ گوشت: من اے هبرانَ شه دلسۆچی ۆ خێرلۆٹیءَ گوشین. اۆگانستانءِ درێں استمان مئے همسایگ اَنت ۆ ما آوانِ دلسۆچ اێں. اۆمێتوار اێں درێں اۆگانستان رۆشنائێں آیۆکءِ دێما داشته بیت.