کریمه بلوچ، «بلوچێن زانت‌لوٹان» بی اس او نامی‌ئێن هوربندے پێسرے رهشۆن ماں کینڈائا کشگ بوته. شِد ۆ دێم هم ساجد حسین، هالکار ۆ سیاسی‌ئێن جهدکار ماں سویڈنا بێگواه بوت که پدا ڈڈّر رۆدکِرّے ودی بوت. اێشی بزانت اێشنت که بلوچان سیاسی‌ئێن جهدکار که گوں پاکستانے حکومتا مٹ‌ۆمێل‌اَنت، جتا شه پاکستانا دنیاوے دگه امن‌ترێن جاهان هم امنیت ندارنت.
چنکه سالے بیت که پاکستانے بلوچانِ سیاسی‌ئێن جهدکار ۆ حق‌لوٹان په نابرابری‌ئے واسته ۆ وتی حقے گار بیگا ماں بلوچستانے صوبایی‌ئا سکّێن جنگے را بنگیج‌اِش کرته که په پاکستان ۆ آیی ٹَکبَندێن پلامرزا یکے شه آزگ‌سماترێن سکّی‌ئان‌اِنت، پمێشا پاکستانے حاکمان گوں هر وڑێن دینی ۆ سیاسی‌ئێن مئیلان مداراءَ کننت، بلێن بلوچانَ په سکّی پادمال کننت. البت نیمون‌اِش ملکے حد ۆ سیمے ساتگ‌اِنت.
شه پاکستانے نظامی‌ئێن واکان دیدانکا، اے پراهێن ملک که شه معدنی‌ئێن سرچمگان سرێچ‌اِنت گوں صدها کیلومتر دریاب‌کرّا ۆ مالدارێن سرمایه‌گذارے چۆ چین ۆ البت پراهێن گیابان په اێٹمی ۆ زهرناکێن سلاهانِ آزموتِنا ۆ کمّێن ۆ یک‌په‌یکێن مچّیا، آوان عمرے شیشگ‌اِنت که بایدات په هر قیمتے سات‌انتِه. بلوچستانے جْوانێن جاور که شه خداداتگێن نعمتان سررێچ‌اِنت، اے صوبائی‌ئا را پاکستان ۆ آیی میان استمانی‌ئێن پلامرزانِ چمے دێما ڈِکّ‌اِش کرته. پاکستانے حاکمَ لۆٹ‌اَنت شه اے خداداتگێن نعمتان بهر زورنت ماں‌وهدےکه گونڈترێن دلگوشے به آیی اصلی‌ئێن واهندان ندارنت. حقیقتا آ تهنا بلوچستانا لوٹ‌اَنت نه مردمانِ.
ابید شه اێشی بلوچانِ سیاسی‌ئێن جهدکار ۆ آوان که شه بلوچان حقان دێمپان کننت، گێشتر شه چاگردے میانی ۆ واننده‌ئێن پاٹیان‌اَنت که وڑ وڑێن دیدانک دارنت، لهتێن جتایی‌لوٹ‌انت، لهتێن شه پاکستانے ملکے حد ۆ سیمان دێمپانَ کننت ۆ همےپێم رنگ‌رنگێن باور دارنت شه مسلمانا گپته تاں کمّێن ذگری ۆ بےدینان. اے جهدکاران بید شه پاکستانے زۆربندێن فوجان گوں دو مهمێن سکّیا دێم‌په‌دێم‌اَنت؛ اول بلوچانِ قومی ۆ سنتی‌ئێن راجمان ۆ دوم آ شه دنیاوے برز ۆ جهل ۆ جهان ۆ ڈیه‌ئے زۆربندانِ پایدگان په جْوانی سهی نه ونت. پمێشا بعضے وهدا چۆ شطرنجے مهرگان رقیبێن واکان نیاما ردوبدلَ بینت ۆ لٹ ورنت بلێن سرپد نه ونت. بلکێن اێشان ٹوهترێن بےسۆبی‌ئے سبب جتایی شه دیندار ۆ بلوچانِ پاگواجه‌ئان ۆ همےپێم دیندارانِ دێمے اۆشتاتن بیت، که همے بن‌گپ سبب بوته که حکومت آوانِ ضدا بدێن تبلیغات کنت ۆ آوانَ سکولار ۆ بکّال ۆ بےدین گوَشیت ۆ پادمال‌اِش کنت. نون وهداِنتِه که پاکستانے بلوچێن جهدکار وتی دیدانک ۆ سیاست ۆ رهوتانَ دوارگ چاراَنت ۆ آوان تها بدلی بیارنت.
رجانک: سنی‌آنلاین بلوچی