مولانا عبدالحمید شه وتی ترکیه‌ءِ درمانی‌ئێن ساتا پد، چارشمی (30 مهر 1399/21 اکتوبر 2020)ئا به زاهدانِ بالی‌پٹا مان بوت. په زاهدانِ اهل‌سنتے جمعه‌وے پیشنمازے کارگسے هال‌رسانی‌ئے بنجاهے سرهالا، شیخ‌الاسلام مولانا عبدالحمید که همے سالے 6 مهرا هم‌دپ گوں 27 سبتمبر 2020ئا په استانبول ترکیه‌ئا شُتَت، مرۆچی صحبا زاهدانا آت ۆ مردمان واجه‌ئا را شه زاهدان بالی‌پٹا دان مکی‌ءِ مزن مسیتا دێمراهی کرت.
مولانا وهدے که به مسیتا رست کمے هبرِ کرت که درمانِ په خێر گوَسته ۆ گوَشته: الحمدلله په شما سنگت ۆ زانتکار ۆ طالبان ۆ درّێن مردمانِ دعانِ برکتا اے درمانی‌ئێن سات په خێر گوَست، درمان هم جْوان بوت ۆ زبرێن آسراتے داشته. شه الله‌ئا اۆمێت دارین که درمان پوره بیت، البت په درمانے پوره‌ئی‌ئا بائد آسودگ کنین.
زاهدانِ جمعه‌وے پیشنمازا وتی هبرانِ دێمترا زندگیا را شه الله‌ئے لطفا زانت ۆ گوشته: من مدام شه الله‌ئا انچێن عمر ۆ زندگی‌ئے لوٹته که آیرا په هزمت به دین ۆ الله‌ئے بندگی ۆ هزمت په چاگرد ۆ مردمان هرچ کنین ۆ شه الله تعالی‌ئا لوٹته‌ون که منا نپسے لوٹانِ آماچ مکنت.
دارالعلوم زاهدانِ سرمسترا گێش کرت: اپسوزنت که اسلامی امت مرۆچی گوں علم ۆ زانتے کمی‌ئا دێم‌په‌دێم‌انت. اسلامی چاگرد مرۆچی به علم ۆ زانت ۆ وانگ نبیسگ ۆ اصلاحا نیاز داریت. دینے وسّاک، چاگرد ۆ مردمانِ اصلاح ۆ زانت ۆ اسلامے معارفان تالان کنگ باز هژدری‌انت.
واجه‌ئا گوَشت: اسلامے دشمنان ماں راج‌دپترے دراجیا نتوانته دینا شه اسلامی ملکانِ مردمان گرنت، پچے که اسلام دینے که وهدےکه به دلے تها نشت په آسانی درَ نبیت.
اهل‌سنتے دینی وانگجاهانِ هماهنگی شورائے سرمسترا وتی هبرانِ گڈسرا گوں طالبانِ سۆگه‌ئا به «اخلاص» ۆ «الله‌ئے راضی کنگ» ۆ «جهد گنگ په علمے کٹتن ۆ چاگردے اصلاحا» گوَشته: درّین طالبان! شما اَمّے آیوکے اۆمێتءُ. کۆشِست کنت که علم ۆ زانت کٹ کنت دان آ استاذ ۆ مزن واجه‌ئان جاها پر کنت که اے دنیاوا را یلش داته ۆ په ابدمانێن جاها شتگنت.
امّا گرد جهد کنن که شه الله‌ئے دین ۆ واجه رسول‌الله‌ئا گامگیج کنن. دان وهدے که ما الله‌ئے وشنودی ۆ رضایتے پدا بَیَن سۆبمندَن، بلێن اگان الله‌ئا ناراض کنن گڑان بےسۆبَ بَیَن.