سنی‌آنلاین| مولانا فضل‌الرحمان کوهی، سرباز پشامگَے آدینگَے امام ۆ «انوارالحرمینِ» مدرسه دینی‌ئے سرمستر، شه روحانی‌ئانِ هاسێن آمیدگسے نێمگا په شش سال ۆ چار ماه بندیگا محکوم بوت. اِے مزنێن سنی‌ئێن عالم شه نومبر 2019ئا دان نون بندیگ بوته.
په سنی‌آنلاینِ بنجاهے سرهالا، پیشامگِ آدێنگے امام ماں 28 نومبر 2019ئا شه روحانی‌ئانِ هاسێن آمیدگسے نێمگا به مشهد لوٹتگ بوت که گوں وتی شش سنگتان شه امنیتی واکانِ نێمگا بندیگ بوت که آیی سنگتان پدا آزات بوتنت.
شِد ۆ دێمترا هم مولانا کوهی ماں آوریل 2017ئا هم بندیگ بوتت که پد شه 9 رۆچا گوں شیخ‌الاسلام مولانا عبدالحمید، اێرانے سنیانِ پێشونکے پادرمیانیا هلاس بوت.
مولانا فضل‌الرحمان کوهی دێمترا شه اهل‌سنتانِ حقان دێمپانَ کرت ۆ حکومتے لهتێن ناانصاپێن سیاستانِ نگدَ کرت. همےپێم آ واجه‌کار گوں غیرنظامی‌ئێن بلوچان بَرَگا په سوریه‌ئے جنگا سکّ مخالپت.
مولانا فضل‌الرحمان کوهی سیستان‌ۆبلوچستانے دینی مدارسانِ شوراوے باسک‌انت. ماں یکّے شه آن شوراوے دیوانان، مولانا عبدالحمید آ شوراوے سرمسترا گوں آ واجه‌کارے آزاتی‌ئے لوٹا گوَشتِ: مولانا فضل‌الرحمن کوهی یکّے شه اهل‌سنتانِ اثرگذارترێن زانتکار ۆ عالماننت که گوں هچ‌گجام شه دولتے مخالپێن سلاح‌بندێن پاٹیان هور نهنت. ماں تهرانا شه مولانا کوهی‌ئے نگدان دولتا سکّ‌تر نگدَ کننت، گڑان پچے آوانِ نگدانَ سگِّت، بلێن مولانا کوهی‌نگدانَ نسگّت؟
بازێنے شه اێرانے اهل‌سنتانِ جمعه‌وے امامان وتی هبرانِ تۆکا آمیدگسے اے حکما را «ناعادلانه» زانته ۆ مولانا کوهی‌ئے زوتێن هلاسیارش لوٹته.