اھل‌سنتا یک ناسرپدیں لیب‌والائے بدزبانی ایر جت

سنی‌آنلائن| گوستگیں ھفتگا یک توپی لیب‌والایے بی‌ادبی و بدزبانی صحابی و بی‌بی عائشہ باروا ایرانِ اھل‌سنت سک ناراحت و غمیگ کرت.
یک کلیپے کہ اجتماعی شبکہ‌یانی تھا دست پہ دست بیت، پیش داریت کہ پرسپولیسِ تیمِ اے ناسرپدیں لیب‌والا مہ یک مذھبی دیوانے تھا حضرات ابوبکر صدیق، عمر فاروق و عثمان ذی‌النورین رضی‌اللہ‌عنہم ءٰ بدوبیراہ گوشیت. دگہ کلیپے تھا پدا ھمے مرد بی‌بی عائشہ صدیقہ رضی‌اللہ‌عنہا ءٰ بد گوشیت.
اے مردِ بی‌ادبی اھل‌سنتا سک تور ات، پمیشا اھل‌سنتا اے نازانتِ بدزبانی بی‌جواب نیشت، بلکیں چہ ھر نیمگا وتی توار اش برز کت و وتی اعتراض و اپسوزش درشاں کت.
اے باروا بازینیا خلفای راشدین باروا شعر پر بست و وتی دوستی و محبت گوں آیاں و بےزاری چه صحابیانی دژمناں جار جت.
ھمے درگتا بازینے چہ مردماں وتی گلہ گوں پرسپولیسِ فدراسیونا پیش کرتگ و لوٹتگش کہ اے ناسرپد کہ وحدت و تپاکیِ نمنوک انت باید چہ پرسپولیسِ تیما درکنگ بیت.
چه دگہ نیمگے اھل‌سنتِ نمایندہ‌یانی فراکسیونا مجلس تھا مہ یک‌نامہ‌اے وتی اعتراض چه اے کارا پیش کت.
ھمے پیم دکتر جلیل رحیمی خراسانِ تایبادِ مجلسِ نماینده‌یا ھں وتی توار برز برتگ و ایرانِ مجلسِ تھا اھل‌سنتِ بیزاری چه اے مردا درشاں کرتگ و چہ ملکِ مسئولاں لوٹتگ کہ اے نازانتانی دیما بگرنت و میل انت کہ ھنچو مفت لھتے نازانت چست بیت و ایرانِ ملتِ تپاکی و وحدتا چہ بین ببارت.