واجه مولانا عبدالحمیدا اهل‌سنتِ گِلّه ڈاکٹر روحانیا پیش کرت اَنت

شیخ‌الاسلام مولانا عبدالحمید که په راجکماش حسن روحانیِ دبّوجی دیوانِ بهر زورگ تهرانا شتگ اَنت، ایرانِ راج و مذهبانی مشکلات آئیا پیش کرت اَنت و گوشتی: 40 سال چه انقلابِ عمرا گوست، بلے انگت اهل‌سنت بےانصافیِ رنجا کشّگ اَنت.
په سنی‌آنلائنِ حالا، مولانا عبدالحمیدا وتی گپانی اول سرا «تبعیض» و «نابرابری» اهل‌سنتِ ٹوه‌تریں مشکل زانت و گوشتی: اهل‌سنتِ مشکلات چو حل نبنت و نگیشّ اَنت، باید ملکِ راجکماش و رهشون وت دیما کنز اِنت.
واجها دیمترا په اهل‌سنتِ بهر زورگ مں گوستگیں سالِ راجکماشی گچینکاریا اشاره کرت و گوشتی: ایرانِ اهل‌سنت چه تبعیض و بےانصافیا سک رنج کشّ اَنت؛ ما مروچی اهل‌سنتِ گلّه گوں وت یارتگ، بازینے چه منی بهر زورگ مں اِے دبّوجا راضیگ نبوتگنت، بلے من گوشتگ که ما په رئیس جمهورا زحمت کشّ اِتگ و هنچو سادگی سرا ویلی نکنیں، بلکیں باید وتی گپاں نزیکا گوں آئیا بجنیں.
مولانا عبدالحمیدا گیش کرت: چه انقلاب و جمهوری اسلامیِ عمرا 40 سال گوستگ، بلے اپسوزِ گپ اِنت که اهل‌سنت انگت سک گوں تبعیض و بےانصافیا دیم په دیم اَنت. اهل‌سنت لوٹنت که ملکِ دارگا هور کنگ بنت و په وتی ملکا هزمت کننت.
مولانا عبدالحمیدا وتی گپانی تها زور پر دات: اِے دیوانِ نندوک پهکاں چه راجکماشا لوٹنت که آیانی سلاما رهشونا سر بکنت و په اهل‌سنتِ مشکلاتِ حل کنگا رهشون و راجکماش وت دیما کنز اَنت و جهد کننت. اهل‌سنتا دگه هچ مسئولے حواله مکننت.
واجها گڈسرا گوشت:‌ هنو ملک گیشتر چه هر دورے په تپاکی و وحدتا محتاج اِنت و اِے مراد گوں برابری و انصاف و راج و مذهبانی حق و حقوقِ دیگ و اداکنگا دستا کئیت.