امریکهءِ شومّیں لوٹ، مسلماناں گیشتر تپاک کنت

شیخ‌الاسلام مولانا عبدالحمیدا وتی اِے هفتگِ جمعه‌ءِ گپاں امریکهءِ راجکماشِ لوٹ په اِشی که بیت‌المقدس مُلگریں اسرائیلِ بُن‌شهر/پایتخت کنگ بیت، اِیر جت. واجها مسلمان ؤ تمام اسلامی ملک په بیت‌المقدسِ دیمپانیا توار پر داتنت ؤ اِشی آیانی «منّتگیں حق» زانت.
په سنی‌‌آنلائنِ هالکاریا، واجه مولانا عبدالحمیدا وتی گپانی تها گوشت:
🔸ما هنچیں دورے تها زندگی کنیں که امت اسلامی گوں وڑوڑیں مشکل ؤ آپتاں چوشکه ڈُکّال، قحط، واری، بےهوری ؤ بازارانی کساد دیم په دیم اِنت. بلے شه گرداں ٹوه‌تریں مشکل اسلامی ملکانی ناتپاکی، جنگ ؤ درگیری اِنت.
🔸امریکهءِ راجکماشِ گپ که گوشتگی بیت‌المقدس اسرائیلِ بُن‌شهر کنگ بیت، اِے ٹوهیں بیم ؤ چکّاسے که نوک چِست بوتگ.
🔸بیت‌المقدس بِلّی که تاریخِ دراجیا دست په دست بوتگ، بلے بازیں قرنے مسلمانانی دستا بوتگ. هنو دهاں سال اِنت که فلسطین زورگریں اسرائیلا گپتگ ؤ اپسوز اِنت که بازیں زوراکیں ملکے چه اسرائیلا دیمپانی کننت ؤ هر حکمے که اسرائیلِ خلافا بیت آئیا پروش اَنت.
🔸امریکهءِ اِے گپ که بیت‌المقدس اسرائیلِ بُن‌شهر کنگ بیت، مسلمانانی دلی مارشت ؤ احساساتا ٹپی کنت، اِے زوراک گوں وتی اِے کاراں مسلمانانا گون جننت ؤ آیانا په ترندی ؤ هژم وادار کننت.
🔸بیت‌المقدس تهنا فلسطینیانی نهنت، بلکیں دنیاءِ تمامیں مسلمانی حقّ اِنت، پچے که اِے جاه مسلمانانی اولی قبله بوتگ. مسلمان ؤ تمام اسلامی ملکاں باید گوں وتی تمام زورا چِست بنت ؤ امریکهءِ اِے تمنّاءِ پوره بیگِ دیما بگرنت.
🔸باید امریکهءِ دیم گرگ بیت تا چه اِشیا گیشتر میان‌رودرهت/خاورمیانه آسا مسچیت. زانوں اسلامی ملکانی سرا بمب‌گواری امریکه‌یا بسّ نهنت که هنو لوٹیت بیت‌المقدسِ سرا دست‌دراجی بکنت. امریکه‌یا اسلامی ملکانی تها جاهے نیست، باید چه اِے ملکاں درکپیت.
🔸امریکهءِ اِے لوٹ شومّینے، بلے مسلماناں گیشتر تپاک کنت. آ مسلمانے که هنو چه وابا آگاه مبیت، گڑا آئیا اسلامِ تقاضا پوره نکتگ. تمام مسلماناں باید آگاه بنت ؤ گوں وت تپاک ببنت. دژمنانی اِے دلیری چه مسلمانانی وتی اختلاف ؤ ناتپاکیان اِنت.
🔸من ٹِکّاٹکّ امریکه‌یا گوشاں که اگه شما چه وتی دست دراجی په مسلماناں مقدساتِ سرا مکشّ‌اِت، مسلمان شما را هنچیں درسے دینت که په دیمی دورِ مردماں عبرتے بیت.
🔸مسلمان باید یک امتے ببنت، ناتپاکی ؤ اختلافاں کرّا بلّنت، مسلمانانی عزّت ؤ آیانی قدرت مں وحدت ؤ تپاکیِ تها اِنت.