لبزانک و مولانا سیدابوالحسن علی ندویِ لیکہ

مولانا ابوالحسن علی ندوی یک نامداریں دینی و میاں اوستمانی رھشونو کواسے بوتگ، آ یک جوانیں لبزانکارے ھوں بوتگ، آئیا داں20سال ندوۃ العلماء لکھنوا تفسیر و عربی و ایدگہ علم وانینتــگ انت، آئیا سرجمیں اسلامی ملکاں گشتگ و سرجمیں لبزانکاراں ھمے کلوہ داتگ کہ مسلمان لبزانکارانی یک گلے جوڈ کنگ ببیت، ھمے درگتا درستاں تپاک کت و 1984ا اے لبزانک گل بن ھشت ماں لکھنوا ایرکنگ بوت کہ ایشی نام *رابطۃ الادب الاسلامی* ایرکنگ بوت، ایشی بنجاھی کارگـس ھوں لکھنوا ات، داں سرجمیں زندا واجہ ابوالحسن علی ندویؒ اے گلِ کار مستر ات، آئیِ بیرانیا پد اے گلِ کارگس ماں سعودی عربا بوت، و ایشی تھا گیشتر اسلامی ملکانی لبزانکار ھوار انت، واجہا بازیں دینی، راجی و لبزانکی کارکتگ، واجہ 1999ئا دسمبر ماھا 31 رمسا بیران بوت، دنیاءِ سرجمیں لبزانک و زبانانی بابتا آئی ونتگ و سرپد بوتگ، چوکہ کلاسیکی، رومانی، مارکسی، جدیدیت و ایدگہ سرجمیـــں، درائیں دنیاءِ لبزانکانی وانگا پد آ وتی لیکھاں لبزانکِ بابتا چوش درشان کنت!
«لبزانک لبزانک انت و بس! آدنیاءِ کجام نیکراھی ربَّال کار [پیغمبر] یا بنی آدمِ بہ بیت، یا کجام ھوں یک آسمانی کتاب و صحیفہ‌اے ببیت، بس آئی شرط ایش انت کہ آ ھما اندازہ‌یا گوشگ ببیت کہ مردما تام بدنت و آئیا اثرے مان ببیت، گشوک دلجم ببیت کہ آئی لبز گوشت و درآنگاز کت کہ گوشداروکا تام ھوں گیپت و سرپد ھوں بوت.»
بزاں لبزانکا وتی مارشت و دلِ زنگاں ھما کساس و اندازہ یا درشان بکنت کہ وانوک آیاں وانیت آ سرپد ببیت کہ من چے ونت و نبشتہ‌کار وتی کلوھا ھمے کساسا سربکنت کہ آوتی وانوکاں سرپد کت بکنت و وتی نبشتگیں ساچشتا چہ دلجم ببیت.