عزتِ چٹِّی ؤ نسخه

دنیاءِ تها هر انسانے عزّتِ پدا اِنت. هرکس دل لۏٹیت که مردمانی کرّا آئیا عزت ؤ شرف ببیت. مردم آئیِ احتراما بکننت، لهتے همے خیال کنت که عزت مال تها اِنت، پمشا شپ ؤ رۏچ مال پدا کپتگ ؤ لۏٹیت مال مُچّ بکنت تا مردم آئیا بمنّنت ؤ احترام بکننت. لهتے دگه دنیائی مقام ؤ پُستِ پدا اِنت لۏٹیت که آئیا دنیاءِ تها مں اداره ؤ کارگسے کارے دستا کپیت تا بلکېں مردمانی کار په آئیا گَٹّ ببیت ؤ په وتی کار واستا آئیِ دېما سرا جهل کننت.
بلے اصلی گپ اِدا اِنت که عزت اللهِ دستا اِنت، هرکسا که الله بلۏٹیت آئیا عزت داد ؤ هرکس که ملۏٹیت آئیا تۏرېں دنیاءِ تها هر اندازه مال ؤ‌ سرمایه ؤ جاگاه ببیت بلے چه عزتا زبهر بیت.
واجه مفتی محمدقاسم قاسمیا پېرېگېں بېگاها دیوانے هست اَت، واجها همے باروا باز جوانېں سرپدی دات. مفتی صاحبا گوشت: الله پاکا قرآن مجیدِ سوره فاطرِ دهمی آیتا فرمائېنیت: «مَن كَانَ يُرِيدُ الْعِزَّةَ فَلِلَّهِ الْعِزَّةُ جَمِيعًا إِلَيْهِ يَصْعَدُ الْكَلِمُ الطَّيِّبُ وَالْعَمَلُ الصَّالِحُ يَرْفَعُهُ» [فاطر: 10] هرکس عزّت لۏٹیت، گڑا بزانت که عزّت په الله ئیگ اِنت، پاکېں کلمه اللهِ‌ نېمگا رونت ؤ نېکېں عملاں الله برز بارت.
دېمترا مفتی قاسمی صاحبا گوشت: واجه مفتی شفیع عثمانی رحمه‌الله، ئا وتی تفسیر «معارف‌القرآن»ءِ همے آیتِ تفسیرا چه علامه شاه عبدالقادرا نقل کتگ که گوشتگی: په عزتِ‌کٹّگا اِے چٹّی/نسخه بے شک راست اِنت ؤ چَکّاسگ (تجربه) بوتگ، شرط اِشنت که په اللهِ ذکر ؤ نېکېں عملاں تا یک حدّے که الله آ اندازه‌یا گهتر زانت، پابندی کنگ بیت، آ وهدی الله پاک عمل کنۏکا هنچېں عزّتے همېشگی مں دنیا ؤ آخرتا دات که بے مَٹّ بیت.
جی هو عزّتِ دستا آرگِ شرط دو اَنت:
1. الله ذکر
2. نېکېں عمل