واجه مولانا عبدالحمید زاهدانِ اهلسنتِ جمعهیِ پیشنماز، پریرگیں بیگاها (20 دی 1395) په مرحوم آیتالله هاشمی رفسنجانیِ مردمانی دلداری دیگ ؤ آئی جنازهِ شرکت کنگا تهران شت.
په سنیآنلاینِ هالکاریا، واجه مولانا عبدالحمید هما شپی گوں بازیں مسئول ؤ ذمهوار ؤ دگه بازیں اهلسنتِ جهدکارانی همراهیا، مرحومِ لوگا ؤ حسینیه جمارانا شت ؤ وتی اپسوز ؤ دلپدردی ئے درشاں کرت.
زیگیں روچا هں واجه مولانا عبدالحمیدا مرحوم آیتالله هاشمی رفسنجانیِ جنازه همراهی کرت. واجهئا اے جنازهِ همراهیا گوں هالکاراں (خبرنگاراں) گپ ؤ تراں کرت ؤ گوشتی: آیتالله هاشمی رفسنجانی یک خاصیں مردے اَت. په ایرانِ مردماں باز زحمتی کشِّت. آئیِ روگ مزنیں تاوانے.
مولانا عبدالحمیدا گیش کرت: مرحوم هاشمیِ دل پراه اَت، راج ؤ مذهبانی هیالی گور اَت. اهلسنتِ عالم ؤ زانتکاراں گوں آئیا دیدار کرت ؤ آئیا هں نزوریں مردمانی پلامرزی کرت.