- سنی آنلاین - http://sunnionline.us/balochi -

ایرانِ بیست‌ؤدومی فقهی دیوان برجم دارگ بوت+مصوّبات

ایرانِ اهل‌سنتِ فقهی مجمع/دیوان (شنبه 13 آذر 1395/ 3 ربیع‌الاول 1438) گوں بازیں عالم ؤ زانتکارے مُچّ بیگا مَں دارالعلوم زاهدانا بنگیج بوت.
په سنی‌آنلاینِ هالکاریا، مَں ایرانِ اهل‌سنتِ بیست‌ؤدومی فقهی مجمع/دیوان که تا دو روچا شنبه ؤ یکشنبه‌ئا برجم دارگ بیت، چه ایرانِ بازیں استانے مزنیں عالم ؤ مفتیاں بهر زرتگ اَت.
مَں اِے دوئیں روچاں چهار دینی مسائل «تکافل»، «کارمزد»، «بانْکانی امتیاز دیگ» ؤ « آپی چا‌هانی مسائل» چِست ؤ اِیر بوتنت.
بیست‌ؤدومی مجمعِ بنگیجی دیوان، گوں واجه مولانا عبدالحمیدِ مستریا برجم دارگ بوت. اول سرا مولوی محمدیوسف موسوی یکے چه خراسانِ واجهاں قرآن مجیدِ چنت آیت، تلاوت کرت.
شیخ‌الاسلام مولانا عبدالحمیدا مَں بنگیجی دیوانا رند چه مهمانیں واجه ؤ‌مفتیانی وشّ‌آتکا، «دینی مسائلِ بررسی ؤ روشن کنگ» یکے چه عالمانی وظیفه‌یاں زانت ؤ‌ گوشتی: عالمانی وظیفه اِنت، آ نوکیں مسائلا که چاگردِ ضرورت اَنت بررسی کننت ؤ آیانی حکما درگیج اَنت. اِے کار، خداپسندیں کارے ؤ مردمانا هں رازیگ کنت.
مولانا عبدالحمیدا دیمترا وتی گپانی تها گوشت: خلفا راشدینا وتی دَورا صحابی جمع کتنت ؤ مختلفیں مسائل باروا گوں وت گپ ؤ ٹالش کرت تا که یک نتیجه‌اِے رستنت. امام ابوحنیفه‌یا همک وهدا اِے دابیں دیوان برجم داشت. اِے دابیں دیوان گرگ مفتیانی کارا آسان کنت.

بیست‌ؤدومی فقهی دیوان دوشنبهِ شپا آ سر بوت. اِے فقهی دیوانِ مصوّب کتگیں حکم اِشنت:

1.اجتماعی تکافل
الف: اجتماعی تکافل اِیش اِنت که چنت نفر یک «صندوق‌ِ تکافلے» جوڑ کننت تا خطره ؤ پیشامدانی وهدا په آیاں کمکے ببیت ؤ مقصدش پول ؤ ‌سودِ درآرگ نهنت.
ب: اجتماعی تکافل وقفِ وڑا شرعا جایز اِنت، بلے جهد کنگ بیت که اِے گوں دینداریں واجه ؤ فقهی زانتکارانی چمِّ چیرا کنگ بیت.

2. بانک ؤ مالی مرکزانی امتیاز دیگ
اگه بانک ؤ مرکزی مالانی وام دیگ همے شرطا ببیت که اے اندازه پول تا فلان وهدا باید بانکا ایرنگ بیت، اِے کار شرعا جایز نهنت.

3. کارمزدِ شرعی حکم
کارمزد «رسم الخدمة» باروا بازیں علمی-تحقیقی نبشتانکے وانگ بیت. رند چه گوشدارگ ؤ گپ و ترانا یک گروهے چه واجهاں گچیں کنگ بوت که اِے کاراں بکننت:
الف. نبشتانکانی وانگ گوں هورت چاری ؤ چه آیاں دیدانک ؤ دلایلِ جمع کنگ؛
ب. گوں دگه عالم ؤ زانتکاراں اِے باروا گپ ؤ ٹال کنگ؛
ج. بانکی کارشناسانی کرّا روگ ؤ حقیقی کارمزدِ باروا جست ؤ پرس کنگ.
اے واجه که په اِے کارا گچیں کنگ بوتگنت، اِشنت:
1- مولانا محمدقاسم قاسمی؛
2- مولانا شهاب‌الدین شهیدی؛
3- مولانا عبیدالله افروخته؛
4- مولانا عبدالحلیم قاضی؛
5- مولانا عبدالصمد اجباری؛
6- مولانا عبدالقادر عارفی؛
7- مولانا محمد زکریا دهواری؛
8- مولانا محمود عبدی؛
9- مولانا عبدالعزیز حنفی؛
10- مولانا نظرمحمد زعیمی.

4. آپی چاهانی حکم
الف: هر کسا وتی مِلکا اجازت اِنت که چاه بجنت. همے شرطا که دگراں بلاهیں ضرر ؤ تاوانے مرسیت.
ب: دینداریں زانتکار ؤ‌ کاربلدانی دیدانک په بلاهیں تاوانِ تعیین کنگا بَے بیت/ اعتبار هست.