مزن نامیں واجہ مولانا محمد حسین گرگیجا (15/آذر/ 95ھمدپ گوں 5 تاکشان 2016) ئا ماں زاهدانِ چشمہ زیارتِ (حافظانی) قدردانیِ مراگشا گوشت:” قرآن ماں ھمک پِڑا مسلمانانی دوزواہ ؤ گموار اِنت.” قرآنِ علمِ در برگ ؤ آئیِ رھبندانی سرا جنزگ مزنیں ارزشتے داریت.
واجہ ئا اچ “آل عمرانِ” سورتِ 164 پاگپ/آیہ وانگا پد گوشت: قرآن ماں قبر ؤ محشرِ پِڑا مسلمانِ دوزواہ ؤ گموار اِنت. حافظ ماں گلباگ/بھشتا اچ قرآنِ وانگِ سوَبا پہ بُرزتریں منصبا رسنت، اے پہ حافظاں مزن وژبھتییے.
گالیکشِ نیکراھی/دینی وانگجاہِ مسترا دیمترا گوشت: مزن وژبھتییے کہ ماں اے دمگا سے صد (300) بانکیں گوھار پہ نیکراھیِ علم ؤ زانتِ وانگ ؤ در برگا گلائیش انت ؤ اے چیز پہ اے دمگِ مردماں وشیں مستاگے، جنیں آدم ماں لوگا چکانی ھیلکاریِ زمہ دار اِنت، گڑا وھدے کہ آ پہ نیکراھیِ حکم ؤ رھبندانی سرا جنزان بکننت لوگِ درستیں مردم رژنائیں کشکا گندنت ؤ بد ھیلیِ ؤ بدعادتیِ دیم گرگ بیت.
دیمترا اے مزن نامیں واجہ ئا پہ نیکراھیِ برات ؤ گوھاریں نودربراں گوشت: منی سوج ایش اِنت بنگیجا عِلما پہ پکائی در بہ بر اِت، پدا آئیِ رھبندانی سرا جنزان بکننت ؤ سیمی اے کہ وتی دربرتگیں علما پہ درستیں ملک ؤ سرجمیں مسلماناں پہ بھر زیریا سر کناِت.
واجہ ئا دیمترا گوشت: اللہِ مستریں میراث پہ بندگاں قرآن اِنت. اللہ ئا مزنیں رحم ؤ منتے پہ انسانانی سرا کتگ ؤ قرآنی پہ آیاں ٹیکی داتگ. اللہِ مستریں میراث پہ بندگاں قرآن اِنت، اے پہ مسلماناں مزن پھر ؤ شانے کہ چاردہ سدی ؤ چیزے سال پِر گوستگ بلے انگتا اچ اے پاکیں کتابا لبزے ھم کم ؤ گیش نبیتگ.
واجہ ئا دریں پیگمبرِ صلیاللهعلیهوسلم، لھتے مزن شانی اے وڑا پراریچ کت ءُ گوشت: پیگمبر انسانانی چاگردا ودی بوت ؤ ھمک کسا پہ ارزانی گوں آئیا رھوت ( ارتباط) کنگِ اجازت ھست اَت، ترند تبی ؤ بد روئی ؤ نامھروانیا دِریں پیگمبرِ صلیاللهعلیهوسلم، درا بستارے/ارزشے نیست اَت ؤ پہ مومناں مدام وش تب ؤ وش رو اَت ؤ واجہِ درستیں کار پہ شور ؤ سلاہِ سرا اِتنت ؤ واجہ ئا پہ بیت المالِ نیمگا مزن دلگوشے گور اَت.
واجہ ئا پدا “آل عمرانِ” سورتِ 164 پاگپ تفسیر کت ؤ گوشت: اللہ ئا ماں اے پاگپِ تہا چار زمہ واری قرآنِ باروا پہ وتی دریں پیگمبرِ کوپگاں لڈاِت، اولی قرآنِ وانگ انت کہ یکے اچ ھما ھشتیں ھکان انت کہ سرجمیں مسلمانانی سرا ایر کنگ بیتگ، یکے اچ قرآنِ مول ؤ مراداں بدواہ زانتی اِنت، مرچیگیں دورا ما گندگا ایں کہ دنیاءِ ظالم ؤ ستمکار چے پیمیں پندل پہ مسلمانانی ایرجیگ کنگا کار بندگا اَنت، چیا کہ اسلامِ بدواہ کدی ھم مے دوزواہ نبنت.
دومی زمہ واری نفسِ پلگار کنگ اِنت، نفسِ پلگار کنگِ بزانت وتی ھستمانِ پلگاری ؤ ھلار ؤ ھرامِ پجّار اِنت. مسلمانِ بائد نہِنت کہ خیانت بہ کنت ؤ بائد اِنت مسلمان وتی نیکراھیِ براتِ جان ؤ مال ؤ عزت ؤ آبروِ پاسپان ببیت. سیمی زمہ واری قرآنِ یاد دیگ اِنت ؤ پہ درستاں ھژدری اِنت کہ قرآنِ حکم ؤ دُرّیں نبیِ حدیثانی منوگر ببنت.
واجہ ئا دیمترا گوشت: کساس سے ھزار حدیث ؤ پنچ صد ؤ چهل آیت اچ قرآنا گوں اللہ ِ حکماں ھمگرنچ انت. لھتے اچ نابزانتاں اے حدیثانی منوگر نہنت کہ اللہِ مزن شانیں قاصدا اے بنگپِ سرا مزنیں کڈن ؤ بیھارے کتگ.
دریں پیگمبرِ چارمی زمہ واری حکمت ؤ نیکراھیِ علمِ سوج دیگ پہ مسلمانان اَت.
واجہ ئا ماں اے مراگشِ گڈ سرا ناٹھی ؤ نشہ ؤ بے بروردیں کارانی اَثر پہ انسانی چاگردا ڈوبار اِتنت ؤ قرآن ؤ پیگمبرِ رھبندانی سرِ جنزگا کڈن کت.
رجانک: محمد امیری