وتی زهگاں کم مجنِت و گوں آیاں په نیکی و دوستی رپتار کنِت

واجه مولانا عبدالحمیدا ماں اِے هپتگَے جمعه‌یَے نمازا (22 مرداد 1395) په زهگانی حق و حقوق پِت و ماتانی سرا گپ کرت و صحیحیں تربیتی بهتریں ٹیکی زانت که پت و مات تواننت وتی زهگانی پیش کنَنت.
واجهَے درچتگیں گپ اِشنت:
اسلامَے دین باز گشاد و پراهگوزیں دینے. اے دینَے دگری/پرک گوں دگه دیناں اِشنت که په زندَے تمامیں شعبه و پڑاں برنامه‌ای هست. ماں اے دینا بید چه اللهَے حقاں، بازیں حکمے په مردمانی حقانی باروا چوشکه معاملات و معاشراتَے واستا اَنت.
اسلامَے شریعتا پِسّ و ماسا زهگانی سرا و زهگاں پِس و ماسَے سرا حق هست. ماں حدیثا آتکگ وهدے که زهگے چه ماسا بیت، اولا باید آیی راستیں گوشا بانگ و چپّیں گوشا اقامه کنگ ببیت تا پیسر چه هر چیزا اللهَے بزرگی زهگَے گوشا اعلام کنگ ببیت و چه شیطانی وسواساں محافظت ببیت.
قرآن و سنتَے دگه وصیتے اِشنت که باید په زهگا نامِے بندگ ببیت و هپتمی روچا په آئیا عقیقه کشگ ببیت. په نام واستا باید پیگمبر، صحابه و یا دگه بزرگے نام زورگ ببیت یا انچیں نامے که وشیں مانایے ببیتی. همے پیم شریعتا وصیت کرتگ که اگه زهگ جنکّے بوت یا پُسّگے هر هالا پِس و ماس شاد و گل ببنت. حدیثا آتکگ وهدے که یک پسّ و ماسے دو جنکّا رودیننت و لوگ جاگه کنَنت، الله تعالا بهشتا په آیاں تیار/ آموده کنت.
وتی زهگاں تحقیر مکنِت و کم مجنِت و گوں آیاں په نیکی و محبت رپتار کنِت. گوں بچک و جنکا برابری سرا دوستی کنِت. اگه یکیا شما ٹیکی‌یے دات، دومیا هں بدیت. آیانا وشّیں اخلاق و ادب یاد دیِت و شرّی سرا تربیت کنِت. شریں تربیت بهتریں ٹیکی اِنت که پس و ماس توانَنت وتی زهگی بدینت. زهگاں باید دنیایَے زندگی‌یَے روشا هں یاد بگرنت. وتی زهگاں آخرتَے زندگی‌یَے تیاری و دنیایَے زندگی کار و باراں یاد دیِت.
وهدے که جنک و بچک بالغ بنت اگه شریں درے درکپت آیانا عاروس دیِت. اگه رند چه بالغ بیگا زهگ گناهے بکنت، پس شریک اِنت. مرچگیں زمانگا ماهواره‌اِی شبکه اِے چیزَے پدا اَنت که چاگردَے تها سل‌کاری و گناه رواج دینت. عاروسَے سرا اهتمام کنگ، زهگانا چه گناه و فحشایا دور داریت. البت توصیه بیت که کم سالیں جنکاں عاروس مدیت پرچا که مرچی زندگی مشینی بوتگنت و زهگانی ردگ و قدرت کم اِنت، پمشا آیانی زوت عاروس دیگا بربرے نقصان و مشکلات هست.
عاروسَے دیوان باید شریعتَے مطابقا ببنت. لهتے رسم که اِے روچاں مسلمانانی عاروساں جاه کپتگنت اسلامی نهنت. بلکیں اِے جاهلیت و رونندی/غربی رسم و داب اَنت. باید مهریه و مردمانی دعوت دیگ هرکسَے توانَے اندازه‌یا ببیت.
هوریں عاروسی دیوان گرگ سوب بیت که هرج کم ببیت، اِے وشیں رسمے. عاروسانی تها چه هر پیمیں گناها دوری کنگ ببیت. ڈهل و ناچ و… حرام اَنت و قیامت روچا اِشانی جواب دیگ لوٹیت.