رودراتکی بلوچستانَے اسلامی حزباں نوکیں اتحادیه‌اِے تشکیل دات

رودراتکی بلوچستانَے 7 دینی و اسلامی حزب و گروها په وحدت و تپاکی‌یَے دستا آرگا نوکیں اتحادیه‌اے په نام «امام» جوڑ کرت.
په سنی‌آنلاینَے هالکاریا نقل چه پاکستانَے «اسلامَے» روتاکا، بلوچستانَے 7 گروه: جماعت اسلامی، جمعیت اهل‌ حدیث، مجلس وحدت‌المسلمین، جمعیت علمای اسلام (فضل‌الرحمن و سمیع‌الحقَے شاخ)، جمعیت علمای پاکستان و مجلس تحفّظ ختم نبوت، اِے نوکیں اتحادیه‌یَے باسک/عضو اَنت.
اِے اتحادیه‌یَے نام «امام» اِنت بزاں چه «اتحاد ملت اسلامیه محاذ» گرگ بوتگ.
مولانا محمدخان شیرانی، یکّے چه جمعیت علمای اسلامَے رهشوناں اِے نوکیں اتحادیه‌یَے کارمستریا و مولانا علی‌محمد ابوتراب اهل‌حدیثے جمعیتَے باسک اِے اتحادیه‌یَے دبیریا گچیں کنگ بوتنت. دگه حزبانی رهشون اِے اتحادیه‌یَے نائب‌رئیسیا جهد کنَنت.
اتحادیه «امامَے» رهشوناں ماں یک خبری کنفرانسے که یکشنبه 10 مردادا ماں کوٹه‌یا برجم دارگ بوتگ په وحدت و تیاکی‌یَے ضرورتا تاکید کرتگ. مولانا محمدخان شیرانیا گوشتگ: ڈنی زوراک لوٹنت که مئے درمیانا جتایی و تفرقه بیار اَنت.
اِے اتحادیه‌یَے رهشوناں چه دگه سیاسی حزب و گلّاں هں لوٹتگ که اِے اتحادیه تها باسک ببنت. قرار اِنت که اتحادیه امامَے دومی دیوان بیست‌پنچ اوت (4شهریورا) برجم دارگ ببیت.
بلوچستانَے ایالت که پاکستانَے ٹوه‌تریں ایالت اِنت چه تمامیں جاهاں محروم‌تریں جاه اِنت و اختلاف و تفرقه‌یَے آسا سچگ اِنت.
بازیں مردم و زانتکارے ماں اِے ایالتا شهید کنگ بوتگنت. همے ماها “مولانا احتشام‌الحق آسیاآبادی” گوں وتی زهگ “مولوی شبیراحمدا” یکجاه گوں ناشناسیں سلاه‌بندانی تیرگواریا شهید کنگ بوتنت.