صدقه و خیرات گناهانءَ شودیت و روزیگءِ تهءَ برکت کاریت

شیخ‌الاسلام مولانا عبدالحمیدءَ ماں اے هپتگءِ جمعهءِ وعظاں صدقه و خیراتءِ بارهءَ گپ کرت و گوشتی: صدقه و خیرات، گناهانءَ شودیت و روزیگءِ تهءَ برکت کاریت.
زاهدانءِ جمعهءِ پیش‌نمازءَ ماں جمعه(20آذر1394/ 29صفر1437)ءِ وعظاں گوشت: الله تعالیءَ انسان پہ یک آزمایش و چکّاسے واستءَ دنیاءَ دیم داتگ. الله تعالی انسانءَ همک دابیں آزمایش گریت تا هر کسی جاگاه و مرتبه یک په یکءَ زانگ به بیت. اللهءِ تمامیں حکم که مختلفیں آسمانی دیناں آتکگ اَنت په انسانان آزمایش اَنت.
واجهءَ دیمءَ گوشت: اللهءِ حکمانی سرا عمل کنگ، انسانءَ په مزنی رسینیت. الله، هر انسانءَ یک وڑیں امتحان گریت. لهتےءَ گوں مال و لهتےءَ گوں فقیری و بے‌وسی. الله تعالی لوٹیت فقیرانءَ په صبر و سیرانءَ په شکر آزمایش بکنت.
زاهدانءِ جمعهءِ پیش‌نمازءَ گوشت: فقیری و بے‌وسی سرءَ صبر کنگ چه مال و ثروتءِ شگرءِ گرگءَ باز آسا‌ن‌تر اِنت. آیی که مالی هست، راحت توانت وتی هرابیں دلی تمنّا و خواهشاتءَ پوره بکنت. بلے اگه وتی دیمءَ بگریت و گوں خیرات و صدقاتءَ مالءِ شگرءَ ادا بکنت، آئیءَ مزنیں مز و پاداشے رسیت.
واجہءَ خیرات و صدقاتءِ فضیلتءِ بارهءَ گوشت: الله تعالیءَ په انفاق و صدقهءَ باز تاکید کرتگ. اسلامءِ شرعءَ غیر چه زکات، په فقیر و بے‌وس و یتیمانی سرءَ خرج کنگءِ فضیلتءَ باز گوشگ بوتگ.
واجهءَ گوشت: قرآن مجیدءَ آتکگ آ کسے که اللهءِ رضا مندیءَ انفاق کنت، آئیءِ مثال چو هما دانگ انت که هفت هوشگ بیت و هر هوشگے صد دانگ کاریت که هوریگءَ 700 دانگ بنت. هر اندازه که اخلاص و اللهءِ رضامندی ماں صدقات و خیرات گیشتر به بیت هما اندازهءَ ثواب گیشتر رسیت.
واجه مولانا عبدالحمیدءَ دیمءَ گوشت: الله تعالیءِ وعده اِنت«و ما أنفقتم من شئ فهو یخلفه» الله شمئے خیراتانی بدل و عوضءَ دات ، آ که انفاق نکن اَت و وتی مالانی زکاتءَ در نکن اَنت آ قیامتءِ روچءَ اپسوز ور اَنت و گوں هما مالانی وسیلهءَ جهنمءَ داگ دیگ بنت.
واجءَگوشت: صدقه آخرتءِ توشوگ اِنت و روزیگءَ برکت کاریت و گناهانءَ بکشیت و مآپ کنت. اللهءِ هژمءَ آرام کنت و اللهءِ رضامندیءَ جلب کنت. مالءِ دوستیءَ چه دلءَ کشیت و اللهءِ محبتءَ ماں دلءَ کاریت. گڑا باید گوں مال و جانءَ اللهءَ عبادت بکن‌ایں . باید هرکس وتی توانءَ اللهءِ راهءَ خرچ بکنت و فقیر و بے‌وسانی چارگءَ بکنت.
واجه مولانا عبدالحمیدءَ ماں دگه بهرے چه جمعهءِ گپاں گوں اشاره په ایرانءِ مجلس/پارلمان و خبرگانءِمجلس انتخابات/ گِچین‌کاریءَ گوشتی: دیمی انتخاباتءَ ایرانءِ مردم باید وتی خبرگانءِ مجلس و پارلمانءِ نماینده و جهگیرانءَ گچین بکن اَنت. اے په ایرانیاں مزنیں آزمایش و چکاسے. آیاں که جَهگیرانی صلاحیت و توانءَ تایید کن اَنت و همے پیمءَ گچین‌کاریءِ نگهبان و برجم داروک، باید جهد کن اَنت که په شرّی و امانت‌داری گچیں‌کاری برجم دارگ به بیت. باید هما کس که مردمی اوٹ/رای دینت همائیءِ نام در به یئیت. آ که جهگیرانی صلاحیتءَ تایید کن اَنت، بایدگوں پراه‌دلی و دور چاریءَ گچین‌اِش بکن اَنت. مردم هں باید هما کسءَ گچیں/انتخاب بکن اَنت که جهگیریءِ صلاحیت و لائقی به بیت. باید وتی چماں شر پچ کن اَنت و تهنا په قوم، راج و مذهبءَ مچار اَنت. جهگیر و نماینده‌اے که گچین بیت هں وتی نام و نگنءِ پدءَ مبیت، بلکیں په مردماں پکرءَ بکنت و په آیانی مشکلاتءِ حل بیگءَ جهد بکن اَنت.