عقل‌مندیں انسان چہ دنیاءِ فرصتءَ پہ آخرتءَ تیاری کنت

واجہ مولانا عبدالحمیدءَ دنیاءِ زندگی یک بے‌وپائیں زندگی‌یے زانت و گوشتی کہ عقل‌مند و سَسّا والاییں انسان ماں دنیاءَ آخرتءِ زندگیءِ تیاریءَ کن اَنت.
پہ”سنی آن‌لاین” ایرانءِ اهل‌سنتءِ هال‌رسانی سایتءِ هالکاریءَ، زاهدانءِ جمعہءِ پیش‌نمازءَ 13 آذر 1394/22 صفر 1437ءِ جمعہءِ وعظاں گوشت: دنیایے کہ ما آئیءِ تهءَ زندگی کن‌اِیں، گیر چہ ظاهری چیزّاں بازیں حقایق و چیریں چیزّے هست که چہ مئے چَمّاں چیر اَنت، بلے آسمانی کتاب و پیغمبراں چہ وحیءِ طریقءَ انسان خبردار کرتگ اَنت.
واجہءَ دیمءَ گوشت: الله تعالیءَ لهتے حقایق چہ انسانانی چمّءَ پوشتگ، تا انسانانءَ آزمایش بکنت و چکّاس بگر ایت تا بچاریت کہ کئے پیغمبر و آسمانی کتابانی خبرانءَ گریت و کئے رد اِش کنت. اللهءَ پیغمبر دیم داتگ اَنت تا کہ انسانانءَ چہ پوشتگیں حقیقتاں خبردار کن اَنت، بلے ظاهر گنداں کہ چہ پوشتگیں حقیقتاں خبردار نہ اَنت، هچ‌ پیمءَ حاضر نہ اَنت کہ پیگمبرانی خبرانءَ قبول کن اَنت.
دارالعلوم زاهدانءِ کارمسترءَ گوشت: پیغمبر یهت اَنت تا کہ انسانانءَ بگوش اَنت کہ سارءَ بدار اِت دنیاءِ پریبءَ مہ ور اِت و پہ دنیاءَ دل مہ بند اِت، پرچا کہ دنیاءِ نعمت پانی و اَدارکی اَنت، بلے آخرتءِ نعمت چند برابر بهتر و همیشگی اَنت . آخرت و بهشتءِ نعمت انچوش اشنت کہ انسانءِ ذهنءَ جاه نگر اَنت و الله ءَ آ پہ نیکیں بندگاں آموده کرتگ اَنت. اے دنیاءِ سکّی و مشکل آخرتءِ مقابلءَ آسان اَنت، قبر و قیامتءِ حالات سگگی نہ اَنت.
واجہ مولانا عبدالحمیدءَ گوشت: قیامتءِ روچءَ هرچیزّے کہ ماں دنیاءَ چیر و پوشتگ بوتگ آ ظاهر بیت. آ روچءَ پرده چہ چَمّانی دیمءَ زورگ بنت. آ انسان کہ ماں دنیاءَ گوں مکر و پریب انسانانی حق اِش پامال کتگ رسوا بنت. آ روچءَ ایمان، اخلاص، خداترسی و تقوا ظاهر بنت. نیکیں انسان پہ وتی نیکیں کاراں پهر کن اَنت.
دارالعلوم زاهدانءِ حدیث و تفسیرءِ استادءَ گوں آیه «يَوْمَئِذٍ يَوَدُّ الَّذِينَ كَفَرُواْ وَعَصَوُاْ الرَّسُولَ لَوْ تُسَوَّى بِهِمُ الأَرْضُ وَلاَ يَكْتُمُونَ اللّهَ حَدِيثًا» [نساء:42]ءِ وانگءَ گوشتی: الله تعالی ماں قیامتءِ توصیف و حالتءِ بیانءَ گوشیت کہ کافراں آ روچءَ تمنا کن اَنت کہ دریگیتیں/کاش ما گوں هاکءَ برابر بات اِیں. همے کافرے کہ پیغمبرانی خبری قبول نکت و چه اللهءِ داتگیں نعمتاں هراب استفاده‌ای کت. جنین، تبل و پیرینانی سرا بمب گواری کت و هچ دل رحمی نہ شت، همے آ روچی تمنا کنت کہ من گوں هاکءَ یکسان بہ باتاں، بلے اے تمنا هچ دردےءَ دوا نکنت.
واجہءَ گوں آیہ «يَوْمَ نَقُولُ لِجَهَنَّمَ هَلِ امْتَلَأْتِ وَتَقُولُ هَلْ مِن مَّزِيدٍ*وَأُزْلِفَتِ الْجَنَّةُ لِلْمُتَّقِينَ غَيْرَ بَعِيدٍ» [ق:30-31]ءَ گوشتی: جهنم مجرمانی وداریگ/منتظر اِنت و لوٹیت کہ آیانءَ اِیر بہ بارت. وهدے کہ جهنمی ماں جهنمءَ چگل دیگ بنت، اپدءَ هں جهنم پریات کنت که مجرمانءَ منءَ تحویل دیت. بهشت پہ متقی و خدا ترسیں انساناں بے‌قراراِنت. الله وتی دیدارءَ پہ بهشتیاں عنایت کنت و وتی رضامندیءَ پہ آیاں اعلام کنت.
زاهدانءِ جمعہءِ پیش‌نمازءَ وتی گپانی گڈسرا گوشت: باز وش نصیب اِنت آ کسے کہ دنیاءِ پریبءَ مہ وارت، بلکیں چہ دنیاءَ پہ آخرتءِ تیاریءَ توشگے بہ زوریت.