گناهانی آسر

یک پادشاهےءَ وتی ملکءِ مزنتریں نقّاش ءُ بُت‌کار، بازیں پولے داتءُ گوشتی تو په من «فرشته» ءُ «شیطان»ءِ بتءُ عکسءَ به کَشّ. بت‌کارءَ گوں وت پکر کت که من نه فرشته دیتگ ءُ نه شیطان، گڑا من چتور إشانی عکسءَ به کشّاں!؟ آخر سرا گوشتی: خیر إنت پادشاه دستور إنت من رواں فرشتهءِ بدلءَ یک گونڈیں معصومیں تبلے (طفلے) عکسءَ کشّانءُ شیطانءِ بدلءَ مزنیں لاتءُ سِل‌کارے ءُ معتادے درگیجانءُ آئیءِ عکسءَ کشاں .
بُت‌کارءَ وتی کار بنگیج کت. رپتءُ یک گونڈیں تبلکے شوهازی کت ءُ آرت وتی کرا نندینتی، تبلی چار إت آئیءِ عکسی کشّ إت. چنت سال گوست تا إشی که عکس آماده بیت.
بت‌کارءَ عکس زرت ءُ دیم په پادشاهءَ تچان بیت که واجه پادشاه! من تئی پرمانءِ اولی بهر آسر کتگ ءُ إےفرشتهءِ عکس إنت. پادشاهءَ چارتءُ سک پسندی بیت مردمانی پیش داشت مردماں هں بُت‌کار شاباش گوشت.
پادشاهءَ گوشت: من وداریگاں/منتظراں باریں کدی تو شیطانءِ عکسءُ بُتءَ په من کار ئے.
بت‌کارءَ چه همودا هَکّل إت ءُ دیم په بازارءَ رهادگ بوت، هیران أت که کیا بگر إیت ءُ شیطانءِ جاهءَ آئیءِ بتءُ عکسءَ بکشّ إیت ءُ ببارت پادشاهءَ پیش بداریت. چنت سالءَ آئیءَ شوهاز کت، بلے نتوانتی یکےءَ بگوشیت که واجه تو بیا من شیطانءِ جاهءَ تئی عکسءَ کشان ءُ براں پادشاهءَ پیش داراں.
چه بازیں شوهازاں دمی برتگ أت، تا إشی که یک روچے گوشتی مرچی رواں زندانءَ چاراں، زنداں سل‌کارءُ لاتانی جاه إنت. شت زندانءَ دیتی اوهووو شیطانءِ هم رنگ إداں وه سک باز إنت من مُپتءَ چنت سالءَ وتءَ سرگرداں کتگ.
زندانءِ تها چکرّے جتی ءُ هما بدتریں زندانی که بُوژّ ءُ بَلوژّ أت ءُ یک کُنڈےءَ کپتگ أت دری گپت ءُ گوشتی: بَزَگ! من ترا کمے پول دیاں بلے تو منءَ اجازه بدئے که من تئی شکلءَ شیطانءِ بدلءَ کشانءُ براں پادشاهءَ پیش داراں. آ بزّگءَ هں سرے چنڈینت که هو منءَ قبول إنت.
بت‌کار سک گل بیت ءُ وتی کاری شروع کت چنت روچءَ گوست، بت کار، وتی کارءَ مشغول أت، تا إشی که یک روچے دیتی إے بزگیں زندانیءُ جیلے سک گریوگ ئین ءُ ارسانی ٹُپ ‌ٹُپّے سر إنت. هیران بیتءُ گوشتی:‌هاں باریں ترا چے بیتگ؟ پرچا گریوئے؟ اگاں شومان‌ئے بگوش من چه وتی کارءَ دست کشّاں.
بزگیں معتادءَ که هنو ماں جیلءَ کپتگ أت ماں هما حال ءَ که گریوگءَ أت گوشتی: نه…….. واجه! تو وتی کارءَ بکن! بلے تو زان‌ئے من کیاں که مرچی تو منی شکلءَ شیطانءِ شکلءِ بدلءَ کَشّگ‌ئے؟!
بت‌کارءَ گوشت: نه من ترا هچبر ندیتگ! من ترا پجّاه نیاراں!
معتادءَ گوشت: هیییی واجه! من هما إتاں وهدیکه گونڈإتاں تو منی شکل په فرشتهءِ شکلءِ بدلءَ کشّ‌إت ءُ مرچی منی اعمال ءُ کردارءَ منءَ چو بزگ کتگ که تو منی شکلءَ شیطانءِ شکلءِ بدلءَ کش ئے.

*** تَرانگ: مئے نوکیں دَور ءِ حالءَ، مئے اعمال ءُ کردار أنت پَدّر کن أنت. وتی کردارءِ هیالداریءَ بکن إیں.