اسلامی دُود و فرهنگ بهتریں دود و فرهنگ اِنت

شیخ‌الاسلام مولانا عبدالحمیدءَ اسلامءِ دین، بهتریں دُود و فرهنگءِ واهند زانت کہ عمل پہ آئیءِ حکماں، انسانانی دنیا و آخرتءِ نگبهتیءَ ضمانت کنت.
پہ “سنی‌آن‌لاین” ءِ هال‌رسانی سایتءِ هالکاریءَ زاهدانءِ جمعہءِ پیشنمازءَ ماں وتی جمعہ 15 آبان1394(23محرم1437)ءِ وعظاں، دینءِ اسلامی الله ءِ مزنتریں نعمت زانت و گوشتی: اللهءِ نعمت پہ بندگاں سک باز اَنت، بلے «دین» مزنترین و بهتریں نعمت اِنت کہ انسانءَ پہ اللهءَ رسینیت و اللهءِ محبوب ءِ کنت.
واجہءَ گوشت: دین، انچیں نعمتے کہ پیگمبراں گوں اشیءَ کہ مزنیں درجہ و رتبه‌اش بوتگ پہ دینءِ خاطرءَ بازیں سکّی و سُوری سگ اِتگ اَنت.
زاهدانءِ جمعہءِ پیشنمازءَ گوشت: دین، پہ انسانانی زندگیءَ الله و اللهءِ رسولءِ پروگرام اِنت، و اسلامءِ دین بهتریں دین اِنت و اسلامی دود و ربیدگ بهتریں دین اِنت. اسلامءِ دین چوشکہ آ دگه دیناں، انسانانی دست ساز نہ اِنت، بلکیں چہ اللهءِ نیمگءَ آرگ بوتگ.
واجہءَ دیمءَ گوشت: ما گوں اسلامی رهبندانی رندگیریءَ توانیں وتی باطنءَ هں تزکیہ و پاک بکن اِیں، بلے اپسوز اِنت کہ مسلماناں گوں اشیءَ کہ اے دابیں دینےءِ واهند اَنت ، بلے اپدا هیران وسرگردان اَنت. اگہ مسلماناں وتی دینءِ پابند بہ بنت ، تمامیں مشکلات حل بنت و گیشّ انت. مسلمان انچیں دینے واهند اَنت کہ اگہ آئیءِ سرا عمل بکن انت تمامیں انسانانءَ نجات دینت.
واجہءَ دیمءَ گوشت: هر راجے کہ چہ دینءَ فاصله بگر ایت، گوں همک دابیں مشکلاتءَ دپ کپیت، مرچی اسلامی ملکاں جنگ و گر وکشانی تهءَ گرپتار اَنت، پمشا کہ چہ دینءَ جتا بوتگ اَنت.
واجہءَ وتی گپانی گڈسرءَ پہ بانک و زالبولانی حجاب و سِترءِ بارهءَ تاکید کت و سترء و حجابءِ پوشگی پہ مات و گهاراں ضروری زانت.