استاد امینی فردءِ معلّمیءِ بُرزین بالاد

بلوچستانءَ پیش چه رضا شاهءِ اُرشءَ، واننده چو ایرانءِ اِے دگه ملکان ملّاءُ مکتبی بیتگ اَنت.
گون رضا شاهءِ آیگءَ نوکین مدرسه پچ بنت. بلوچستانءِ اولی معلّم چه کَشءُگوری ملکان چو کرمان،بیرجندءُ مشهدءَ کاینت.رند چه کمّین وهدے بلوچستانءِ وتی فرزند آستیگان لانچ اَنتءُ علمءُ زانتءِ میدانءَ بورسواری کن اَنت.
هدامرزی استاد محمد امین امینی فرد یکّے چه بلوچستانءِ اولی استادءُ معلمان اِنت. امینی فرد بُندرءَ ڈمّنءِ مردمے، هدامرزی چه تهرانءَ وتی لیسانسءَ علوم طبیعیءِ رشتهءَ گراِیتءُ وتی لانکءَ پر وتی قومءِ هزمتءَ بنداِیت. مدتے مان سروانءَ وانگءُ زانگءِ (آموزش وپرورش) کارمستر بیت. مدتے رند چه وتی تجربهءُ کارزانتیءِ سوبءَ تهران کار کنتءُ آموزشءُ پرورشءِ وزیر که نامے «پارسا» بیت، امینی فردءَ یک باز جوانینءُ کارزانتین معلمے زانت.
هدامرزی دراجین مدتے جنین چکانی تربیت معلمءَ زاهدان کار مستر بیتءُ پدمنتگین بلوچستانءَ بازین جنین معلّمے هدامرزی شاگرداَنت.
انقلابءَ رند امینی فرد وتی تجربهءُ زانتکاریءَ کار بنداِیتءُ بچکانی تربیت معلّمءِ کارمستر بیت. سال1360ءَ تربیت معلّم بند بیتءُ بلے امینی فرد وتی معلّمی پیشگءَ هجبر ویل نه کنتءُ وتی کارمستری زمانگءَ هم شاگردان درس دات.
اے نیکین بلوچ فرزندءَ گوستگین هپتگءَ چه بے وفاین اِمروزءَ لڈّ اِت، بلے آیی نیکین نامءُ یات نمیرانءُ اَبدمان اِنت.
هدامرزی امینی فرد ابید چه معلمیءَ یک دینی ءُ مذهبی زانتکارے بیتگ.گون قرآنءُ نمازءَ مزنین مهرءُ دوستی یے چه ورناییءَ دانکه زندءِگُڈّی روچان بیتگ ئے. هما روچءَ که چه اِے دنیاءَ شتگ ساه ئے نمازءِ وانگءَ چه کنٹءَ بال کنت.جاه ئےمان جنتءَ بات.
استاد امینی فردءِ نیکین نام گوں وتی نیکین ءُ نامداریں فرزندان گیشتر زندگ انت. آییءِ مسترین بچّ یک نامدارءُ زانتکارین چمّءِ دکترےکه ابید چه وتی دکتری علمءُ زانتءَ یک قوم دوستءُ وانندهءُ دانشورے. دکتر مهران، دکتر رضاءُ مهندس صلاحءُ مهندس انوش هم گون علیءُ سعیدءَ هدامرزیءِ نیکینءُ سولین پشپداَنت. ما 6ماه پیش چه واجهءِ بیرانیءَ شور کتگ اَت که پهرهءِ سَے3 زانتکارءُ شاگرد پرورین استادءِ شرپءَ؛استاد حاج امینی فرد،استاد حاج گمشاد کردیءُ استادعبدالحمیدایران نژادءِ شرپءَ دیوانے بدارین دانکه اِے بزرگانی قدرءُ قیمتءَ چاگردءَ پیش بداریں، بلے مئیگءُ دگه لهتے دوستانی سُستی سوب بیت که اَجل موه مدات که ما وتی اِے واهگءَ پوره بکنیں.من پدءَ یک برے هدامرزی استاد امینی فردءِ ناگتین بیرانیءَ آییءِ سولین فرزندان،بلوچستانءِسرجمین معلمانءُ هدامرزیءِ شاگردان تسلیت گوشان.
مرحوم امینی فردءِ بابتءَ سید هاشمی اِے شئیر منی یاتءَ کیت:
“اِے مراد که همبلون روچے شیرکنین دردءِ وشّیءَ زان اَنت”