رمضانءِ ماه په نفسءِ اصلاح و پاکیا بهتراِیں موسم اِنت

شیخ‌الاسلام مولانا عبدالحمیدا رمضانءِ ماه بهتریں موسم/فرصت په نفس ءِ اصلاح و تزکیهءَ زانت  و چه اے ماهءِ گیشتر بهر زیرگا تاکیدی کت.
زاهدانءِ جمعهءِ پیشنمازا ماں وتی جمعه 12تیرماه1394 /16 رمضان المبارک/ 3جولائی2015ءِ وعظاں گوشت: الله تعالیءَ وتی بندگانا گوں سئے چیزا چکاس/امتحان گر ایت و تهنا نیگبهت توان انت چه اِے امتحاناں پاس به بنت، پرچا که اے سئیں چیزانی داما کپگ په انسانءِ هلاکی و بَربادیا بس انت.
واجها دیما گوشت: دنیا، نفس و شیطان هما سَئیں چیزاَنت که الله تعالی اشانی واستا انسانانا چکاس/امتحان گر ایت. الله تعالیءَ دنیا په انساناں جوڑ کتگ و انسان توانت دنیا په وتی ضرورتا کارمز بکنت، بلے چیزے که انسانا هلاک کنت، دنیاءِ “عشق  و دوستی” اِنت . باید دنیایا بلوٹ‌این و حاصلی بکن‌ایں، بلے نباید دنیاءِ عاشق به بئیں  و دنیای خاطرا چه اللهءِ عبادتا غافل و بے هیال به شموش‌این و دگرانی حقاں پامال بکن‌ایں.
دارالعلوم زاهدانءِ کارمسترا گوشت: نباید په دنیاءِ دستا آرگا په رشوه، دزی، ربا و حرامیں مالءِ نیمگا دست دراج بکن‌ایں. اے داب‌ایں دنیا ملعون انت. آ که حاضر انت هر پیما که منتگ دنیائا دست بیار انت آ حقیقتا دنیاءِ بندگ انت و دنیاءِ بندگ لعنت و نفرین کنگ بوتگ انت. پیغمبر صلی‌الله‌علیه‌وسلمءَ ماں حدیثے “درهم و دینار”ءِ بندگ لعنت کت انت.
زاهدانءِ جمعهءِ پیشنمازا دیما گوشت: یک دگه چیزے که انسانا گناهءِ نیمگا کش ایت «نفس» انت «نفس اماره» انسانا گناهءِ نیمگا بارت و په گناه و معصیتا دعوتی دات. نفس باید اصلاح و پاک کنگ به بیت. و راستیں راها آرگ به بیت اگه نفسءِ دیم گرگ مبیت، بیمناک بیت. بازیں کُشت و کُشار ، ظلم و گناهانی بنیاد چه نفس اماره ءَ انت.
واجه مولانا عبدالحمیدا، “شیطان” انسانءِ سومی دژمن/دشمن زانت و گوشتی: الله تعالی انسانانءَ گوں شیطانا امتحان و چکاس گر ایت. شیطان سک‌ایں بیمناک‌ایں دژمنے که هیچ وهدا دَم/آرام نکنت و همک وهدا کوششا انت تا گناهءِ وسوسه و خیالا انسانءِ دلا بیار ایت. و انسانانا گناهانی نیمگا بکشّ ایت.
دارالعلوم زاهدانءِ کارمسترا گیش کت: الله تعالی وتی بندگانا گوں اے سئیں چیزاں آزمایش کنت و چکاس ایت  که بندگ دنیا، نفس و شیطانءِ رندا کپ انت، یا که اللهءِ حکمانی نیمگا دلگوش کن انت؟ رندا زانگ بیت که کئے اللهءِ بندگ انت و کئے نفس و شیطانءِ.
زاهدانءِ جمعهءِ پیشنمازا په رمضان ماه ءِ گیشتر بهر زیرگا تاکید کت و گوشتی: ‌رمضانءِ مبارک‌ایں ماه، بهتر ایں فرصت انت په اصلاح و پاکی و اللهءِ عبادتا. اے ماها په چاگرد/جامعهءِ اصلاحا باز اثری هست. گڑا چه اے طلاه‌ایں فرصت و موسما شری سرا بهر بزیر ایں و چه هرچیزے که روچگا تاوان/نقصان دات پهریز بکن ایں. ماں اے ماها چه هر دابیں گناهاں پهریز بکن‌ایں و په اخلاق و نفسءِ تزکیه ءَ جهد بکن ایں. الله تعالیءَ رمضانءِ معنوی سفره تچک کتگ تا ما چه اے ماها “تقوای توشگا” په سال دراجیا بزیر ایں.
واجها گڈسرا گوشت: رمضان آخری ده روچ پیداگ انت. حدیثی روایتاں آتکگ که پیغمبر صلی‌الله‌علیه‌وسلمءَ ماں اے ده روچا وتی عبادت و سخاوت گیش کت . گڑا جهد بکن ایں ماں اے ده روچا گیشتر مسیتاں رو آ کن ایں و گوں عبادت و اعتکافا نفسءِ اصلاح و تزکیهءَ مشغول به ایں.