آ که بے عُذرا روچگ ور اَنت، آیانی سرا هیچ رحمت و برکتے نازل نبیت

شیخ‌الإسلام مولانا عبدالحمیدا شریعتءِ اعمال په انسانءِ پاکی و اصلاحا زانت اَنت و چه آیاں که بے عذرا روچگ ور اَنت گِله‌اِی کت.
واجه مولانا عبدالحمیدا ماں جمعه 5تیرماه1394/9رمضان‌المبارک/24جون2015 ءِ وعظاں پرمائینت: انسان چه دو بهر ملکی (فرشتگی) و حیوانیا جوڑ کنگ بوتگ. باید شریعت حکمانی سرا عمل بکنت تا که  اِے دوئیں بهرانی در میانا برابری بیئیت. اگاں کامل انسان فرشته‌ای بهرا دلگوش بکنت، گڑا دنیائی زندگی خراب بیت و اگاں انسان کامل چه فرشته‌ای بهرا دوری بکنت حیوانیت آئیءِ سرا غلبه کنت و سک ترسناک بیت و په دنیائا مزنیں بیمے زانگ بیت.
واجها پرمائینت: آ انسان که حیوانی بهری غالب به بیت و الله‌تعالیءَ به شموشیت آئیءِ مقام و جاگاه چه حیوان و دلوتاں هں کمتر کئیت قرآن مجیدا همے انسانانی بارهءَ گوشتگ: «أُولَئِكَ كَالأَنْعَامِ بَلْ هُمْ أَضَلُّ أُولَئِكَ هُمُ الْغَافِلُونَ» اے انسان هما اَنت که مَلَکی و فرشتگی بهر اِش شموشتگ و په اللهءِ حکماں پشت اِش مان داتگ.
دارالعلوم زاهدانءِ کارمسترا دیما شریعتءِ برنامه چوشکه رمضانءِ مبارکیں ماهءِ روچگ په انسان روحی بهرءِ تقویتا زانت اَنت و گوشتی: پیغمبر صلی‌الله‌علیه‌وسلم، و اسلامءِ شرعا بهتریں برنامه په انسانءِ پاکی و اصلاحا درچتگ. رمضانءِ ماهءِ روچگ و شریعتءِ اے دگه حکماں په اِشی اَنت که انسانءِ “ملکی” بهر تقویت به بیت. رمضانءِ روچگ چه مستریں عبادتان اِنت و په انسانءِ اصلاحا مزنیں اثرے هست اِنت ای. الله تعالیءَ په اشی که نفسءِ واهشات ما چیر مترین اِیت و نفس واهشات مارا چه آئیءِ عبادتا منع مکنت روچگی فرض کتگ.
زاهدانءِ جمعهءِ پیشنمازا گوشت: روچگ تنها خاص اسلامءِ حکم نه اِنت، بلکیں پیسری شریعتاں هں بیتگ.حج چه حضرت ابراهیم علیه‌السلام،ءِ زمانگا اِنت بلے آدگه اعمال چوشکه نماز، زکات و روچگ پهکیں آسمانی دینانی توکا بوتگ اَنت.
واجها گوشت: رمضانءِ مبارکیں ماه آتکگ که مارا جوڑ بکنت و گوں الله تعالیءَ وصل بکنت. ماں اے ماها که قرآنءِ نازل بیگ و ایرگیجگءِ ماه اِنت باز قرآن بوان اِنت. همے پیما انفاق و اللهءِ راها دیگا ماں اِں ماها مزنیں ثواب و مزے داریت. رمضانءِ ماها چه گناهاں سک دیری بکن ایں. ماں حدیثا آتکگ که آ انسان که روچگ گریت و گناها ویل ندات الله‌تعالیءَ په آئیءِ روچگا هچ نیازے نیست اِنت.
زاهدانءِ جمعهءِ پیشنمازا چه آیاں که بے عذرا روچگ ور اَنت گله کت و گوشتی: رمضانءِ ماه خیر، برکت و رحمتءِ ماه اِنت، بلے اِے رحمت خاص انت په روچگ داران اِنت و په آیاں که بے عذرا روچگ ور انت یا که روچگا هچ باور نکن انت هیچ رحمت و برکتے نازل نبیت، بلکیں آیانی سرا اللهءِ لعن و نفرین نازل بیت. مسلمانان که باور اش سست اِنت و  اسلامی حکمانی سرا عمل نکن انت چه اے خیر و برکتا زبهر انت.