مولانا عبدالحمید: مئے زمانگءِ اصلی مشکل، دژمنی گوں اسلام إنت

شیخ الإسلام مولانا عبدالحمیدءَ ماں جمعه (16آبان1393)ءِ وعظاں ” دژمنی گوں اسلامءَ ” إے زمانگءِ اصلی مشکلی زانت.

واجه مولانا عبدالحمیدءَ ماں زاهدانءِ نماز وانوکانی دیوانءَ پرمائینت: دنیائے که ما ماں آئیءَ زندگی کنگا إیں حال حالءُ رقابتءِ دنیا إنت؛ ما باید گوں دنیاءِ تمامیں مردماں ماں علمءُ زانت، صنعتءُ تکنولوجیءَ رقابت بکن إیں. همے پیمءَ ما مسلمانانی حال حال، وت ماں وتءَ ماں دینیءُ دنیائی تکءُ پهناتاں شریں کارئے.
واجهءَ پرمائینت: قرآن مجیدءَ هں په إے حال حالءَ مارا دعوت داتگءُ گوشتگی: «فاستبقوا الخیرات»،ماں نیکیں کاراں چه یکادگرءَ پیشی بگر إت. بلے باید رقابتءُ پیشی گرگ گوں سلامتیءُ وشّی به بیت نے گوں کینگءُ دژمنی؛ پچے که إے حرام إنت.
واجهءَ گوشت: مشکل إیش إنت که مرچی دنیاءِ لهتے ملکءُ مردماں گوں ما دینی دژمنی هستءُ گوں اسلامءَ دژمنی کن أنت. آیان لوٹ أنت که اسلامءَ چه بینءَ ببر أنت ءُ مارا پُجّ إت نه کن أنت.
بازیں جنگے که مرچی ماں دنیاءَ جاری إنت ریشگ إش ماں دینی دژمنیانی تها إنت.اسرائیلءِ جنگ گوں فلسطینیاں یک نمونه ئے چه دینی جنگان إنت. اگاں فلسطیں سرجمءَ یهودیءُ عیسائی بوت إیں، هچبر صهیونیستءَ فلسطین، اشغال نه کتگ أت ءُ فلسطینیانی نه کشتگ إتنت.
زاهدانءِ جمعهءِ پیشنمازءَ پرمائینت: دنیاءِ مزن واکءُ طاقت والایانی اصلی تُرسءُ بیم چه اسلامی آگاهی ءُ جُنز إنت. ماں یورپءُ أمریکهءَ مسلماناں په وتی دینءَ پَچ ترّگ أنت؛ مسیتاں چه نماز واناں پُر بوگ أنت، مسلمانیں بانکاں وتی سِترءُ پردهءَ حفظ کنگ أنت،  چه فساد ءُ گناهاں دوری کنگ أنت ءُ اگاں آیاں یک مدتے چه دینءَ دور بوتگ أنت ، هنو سار إش کتگ که نجاتءُ کامیابیءِ راه تهنا ماں دینءِ تها إنت.  
واجه شیخ الإسلام مولانا عبدالحمیدءَ پرمائینت: کمے پیسرترءَ یک عیسائی کشیشءُ مُلائےءَ قرآن مجید ماں آسءَ دَور داتءُ سوتک. ءُ واجه پیغمبر صلی الله علیه و سلم، ئے بیراه گوشت؛ إے پهکیں کارانی سوب اسلامءِ نه پُجّگءُ تحمل نه کنگ إنت.
مرچگیں جنگ په گناهءُ فسادءِ شنگ گنگءَ پیش کاینت
دارالعلوم زاهدانءِ کارمسترءَ گوشت: مرچی ماں دنیاءَ حقءُ باطلءِ جنگ جاری إنت. “باطل”ءَ “حق”ءِ تحملءُ پُجگ ءِ زور مان نیست. دژمنان لوٹ أنت که فسادءُ ویلانکیءَ مسلمانانی میانجیءَ رواج بدینت. آیانی دل نه کَشّ إیت که مسلماناں، چه گناه، فسادءُ الکلی ورداپاں (مشروبات) دست به کشّ أنت.
اسلامی ملکانی راجکماش دژمنانی رضامندیءِ پدا مبنت
واجه مولانا عبدالحمیدءَ دیم گوَر اسلامی ملکانی رهشونءُ کارمستراں پرمائینت: رونندی ملکاں په شمئے ملکانی آبادیءُ دیمرویءَ هچ کمک ئے نه کن أنت، چنت سال إنت که آیاں اوگانستانءَ آتکگ أنت، په اوگانان إش چے کرتگ؟
واجهءَ دیمءَ گوشت: رونندی مزن واکاں کارے نه کن أنت، بلے اگاں گونڈیں کمکے به کن أنت، آئیءَ ماں رسانکاں سک مزن پیش دار أنت، باید مسلماناں اللهءِ نیمگءَ پَچ به ترّ أنتءُ اللهءِ رضامندیءِ پدا به بنت نه مزن واکانی.
الله تعالیءَ پرمائینتگ:«ولن ترضی عنک الیهود ولا النصاری حتی تتبع ملتهم»؛اسلامی ملکانی رهشون ءُ رهبراں باید بزان أنت تا وهدیکه آیانءَ کاملی سرءَ رندگیری مکن أنت آ راضیگ نه بنت.
زاهدانءِ جمعهءِ پیشنمازءَ گوشت: مسلماناں غیر شریعتءَ تحمل کت نه کن أنت.اسلامی ملکانی امنیتءُ عزتمندی ماں اسلامءُپیغمبر صلی الله علیه وسلم،ءِ سنتانی تها إنت.
مولانا عبدالحمیدءَ پرمائینت: اسلامی ملکانی رهشونءُ رهبراں په اللهءِ رضامندیءَ کوشش به کن أنتءُ په وتءُ وتی مردماں اعتماد بکن أنت.الله تعالی پرمائینت: «یأیها النبی حسبک الله ومن اتبعک من المؤمنین» الله تعالیءَ پیغمبرءَ گوشیت که ترا دو چیز بَس إنت: 1. الله تعالی  2. مومناں. باید إنت که  دولتاں  اولءَ اللهءِ رضامندی ءُ پدا وتی ملتءُ مردمءِ سرا اعتماد به کن أنتءُ آیانی رضامندیءَ دستءَ بیار أنت.
أمریکهءِ مجلس سنایءِ گچیں کاریءِ نتیجهءَ پیش داشت که اوباماءِ سیاستاں ماں میاں رودراتکءَ پروش وارتگ
واجه مولانا عبدالحمیدءَ گوں اشاره په أمریکهءِ مجلس سنایءِ گڈی گچین کاریءَ پرمائینت:إے گچین کاریءِ نتیجهءَ پیش داشت که أمریکهءِ سیاستاں ماں میاں رودراتکءَ پروش وارتگءُ أمریکهءِ مردماں إے سیاست پسند نه بنت. زانگ بوت که اوباما ءِ سیاستءَ پروش وارتگ همے خاطرءَ مرچی ماں میاں رودراتکءَ مشکلاتانی تها کپتگ أنت.آیاں ماں میاں رو دراتکءَ باز ظلم کت چه ظالمیں اسرائیلش دیمپانی کت
رانندهءُ دلیوراں بایدراهنمائیءُ رانندگی(پلیس راه)ءِ قانوناں هیال داری به کن أنت
واجه مولانا عبدالحمیدءَ گوں اشاره په “راهءُ جاده یانی جهانی ایمنی ده روچ”پرمائینتی: اپسوز إنت که مئے ملکءِ جاده یانی تلفءُ بیرانی چه پهکیں ملکاں گیشتر أنتءُ بازیں مردمے ماں راهاں بیران بیت، بلکیں یک سوبے إیش إنت که مئے ملکءِ راهءُ جاده چپءُ چوٹ أنت. بلے اصلی سوب رانندهءُ ڈیلیورانی بے احتیاطیءُ ترندروی إنت.
واجهءَ گوشت: منی هیالءَ مئے ملکءِ تلفءُ بیرانیاں چه دگه جاهاں گیشتر أنتءُ آ کسانے که ماں إے حوادثءُ اتفاقاں کشگ بنت میان سالیں جوان 21تا30 سال أنت. همے خاطرءَ وصیت بیت که پهکاں راهنمائیءُ رانندگیءِ قانوناں هیال داری بکن أنت. ءُ راننده یاں باید چه ترندرویءَ پهریز بکن أنت. آیاں که گازائیلءُ بنزیں کشی کن أنت باید مسافرانی هیال داریءَ بکن أنتءُ جاده یانی امنیتءَ چه بین مه برأنت آیاں که خلاف کن أنت شریعتءِ لحاظءَ آ وتی ءُ دگرانی کشوک أنتءُ سک گناهکار أنت.
واجهءَ ماں وتی گپانی آ سرءَ په واجه مولانا جمشید علی خانءِ وفاتءَ اشاره کرتءُ خدامرزی ئے  چه نیکءُ  لائقیں بنده یاں زانت که وتی عمری ماں دعوت ءُ تبلیغءَ گوازینتگ. ءُ چه الله تعالیءَ لوٹ إت که واجهءِ درجهءَ برز کناتءُ إے دگه دعوت دیوکءُ عالمءُ زانتکاراں گیشتر توفیق دیات.