مولانا عبدالحمید: امام حسینءِ حرکتءُ جُنز په اسلامءِ دیمپانی، عدالتءُ برابریءِ برجم دارگ أت

شیخ الإسلام مولانا عبدالحمید: امام حسین رضی الله عنه، پیغمبر صلی الله علیه وسلم،ءِ نماسگءُ چُوک أت ءُ آئی پهکیں مسلمانانی اسوه ءُ نمونه إنت. پهکیں مسلماناں په إے واجهءَ باور ءُ دوستی هست.

 

شیخ الإسلام مولانا عبدالحمیدءَ ماں وتی جمعه(9آبان 1393/1 نوامبر2014) ءِ وعظاں په عاشوراءِ روچ ءُ امام حسین رضی الله عنه، ءِ شهادتءَ اشاره کتءُ گوشتی:امام حسین رضی الله عنه، پیغمبر صلی الله علیه وسلم،ءِ نماسگءُ چُوک أت ءُ آئی پهکیں مسلمانانی اسوه ءُ نمونه إنت. پهکیں مسلماناں په إے واجهءَ باور ءُ دوستی هست.

زاهدانءِ جمعهءِ پیشنمازءَ دیمءَ په امام حسینءِ جُنزگءِ سوباں اشاره کتءُ گوشتی:امام حسنءِ زمانگءِ مسلمانانی حکومتءُسرنوشت، یزیدءِ دستءَ که یک ناصالح ءُ بدکاریں مردے أت، کپت. گڑا امام حسینءَ په قرآن، سنت، اسلامءُ مسلمانانی حالاں پریشاں بوت که حکومت مسلمانانی تها ارثی ببیتءُ کم کم نا اهلانی دستءَ کپیت.

واجهءَ پرمائینت: پیغمبر صلی الله علیه وسلمءِ لوگءِ مردم(اهل بیت)ءَ، امام حسینءِ زمانگءَ پیش داشت که حکومتءُ پادشاهی پدءَ نه أنت ، بلکیں آیانی لوٹ اسلامءُ عدالتءِ شنگ کنگ إنت. امام حسین هچ پیمءَ وتی شخصی سوتءِ پدءَ نهت، بلکیں آئیءِحرکتءُ جُنز په اسلامءِ دیمپانی، عدالتءُ برابریءِ برجم دارگ أت.

زاهدانءِ جمعهءِ پیشنمازءَ ماں وتی گپاں “کربلا”ءِ واقعه ئے یک دلپدردیں حادثه إے زانت ءُ گوشتی: کربلاءِ واقعه سَکّیں تهلءُ دلپدردیں واقعه ئے أت. اگاں إے واقعه چه هرنیمگے پٹءُ لوٹ کنگ ببیت، گڑا ما زانیں که ماں اسلامءُ پیسر چه اسلامءِ دورءَ إے وڑیں واقعه کم پیش آتکگ.

واجهءَ دیمءَ په امام حسینءِ حرکتءُ جُنزءِ درسءُ پیگاماں اشاره کتءُ گوشتی:امام حسینءِ جُنزَگءِ درس په جهانءِ مردماں، جنزگ په ظلمءُ بے عدالتی إنت، مقصدی إیش أت که مردمانی حق جاه آرگ ببیت ءُ الله تعالیءِ حق ادا کنگ ببیت. امام حسینءَ آزاتیءُ بهادریءِ درس په مردماں دات. امام حسینءَ إے دلیریءُ بهادری چه پیغمبر صلی الله علیه وسلم، که چه پهکاں دلیرتریں انسان أت، ءُ چه حضرت علی شیرخدا، یاد گپتگ أت. همے خاطرءَ آئیءَ ذلتءُ غلامیءِ جاگاهءَ، شهادت گچین کت.

دارالعلوم زاهدانءِ کارمسترءَ گوشت:دنیاءِ سرجمیں آزاتی لوٹیں انساناں، چه کربلاءِ حادثهءُ امام حسینءِ شهادتءَ سک دلگیر ءُ ناراحت أنتءُ هرکسے په یک وڑے  وتی غمءُ اپسوزءَ پیش داریت.

واجهءَ په”امام حسینءِ زندءِ رندگیری”ءَ وصیت کتءُ گوشتی: چیزے که امام حسینءِ روحءَ گل ءُ شادان کنت آ إیش إنت که ما چه امام حسینءِ زندءُ سیرتءَ درسءُ عبرت بگرإیں. امام حسینءِ دوستیءِ نشان إے نه إنت که ما عاشوراءِ روچءَ آئیءِ ذکرءُ یاتءَ بکنینءُ دگه سالءِ دراجیءَ آئیءَ به شموش إیں.

زاهدانءِ اهلسنتءِ جمعهءِ پیشنمازءَ گوشت:ما اهل سنت هں چه امام حسینءِ شهادتءَ سک دلپدردإیں،اگاں ما سیاهیں پچ گور نکن إیں یا پرسءُ پاتیا ءِ دیوانءِ نگرإیں پمیشکا که  مئے مذهب ءُ فقه مارا اجازت ندات ءُ مئے کِرّا پرس تا سئے روچ إنت.

نا امنیانی بُرز ءُ ڈلگ کنگ گوں ملکءِ کماشانی گپاں ضد إنت

مولانا عبدالحمیدءَ ماں بهرے چه وتی جمعهءِ گپاں په شهید سرگزیءِ شهید بیگءِ خبرءِ ڈلگءُ مزن کنگءَ گله کتءُ پرمائینتی: شهید سرگزیءِ بیراں کنگ ماں کسرکندءَ سکیں دلپدردیں هالے أت، ءُ ماں گوستگیں جمعهءِ وعظاںءُ همے داب ماں سفرے که منءَ ماں استانءَ هست أت، من إے کار سک إیر جتءُ محکوم کت. بلے اپسوز إنت که لهتےءَ کوشش کت که إے خبرءَ سک بُرز به جن أنت ءُ مزنی بکن أنت تا إشی که إے گپ په  میان استمانی رسانکاں رست، إے دابیں کار سوب بنت که ڈنی مردم بگوش أنت إیران نا امنیں ملکے، ماں آ حالءَ که مئی ملکءِ بزرگاں چوش رهبر،إیرانءَ «جزیرة الأمن»زان أنتءُ گوش أنت ایران أمن إنت.

مولانا عبدالحمیدءَ گوشت:پهکاں باید وتی شخصیءُ پاٹی منافعءَ بِلّ أنت ءُ په ملکءُ استانءِ منافعءَ پگر بکن أنت.گوستگیں روچاں چنت نفر چوشکه مرحوم باشنده ایرانشهرءِ فرمانداری سرکار که چه استانءِ زانوگریں مردمان أت بیراں کنگ بوت، بلے ما هچکسءَ اجازت ندات که هبری چستءُ إیر کنگ بیت تا مبادا دژمناں بد استفاده بکن أنت. استان سیستان ءُ بلوچستان مزنیں استانےءُ إے دابیں کار پیش کئیت، هرنیمگے جاهلیں  مردم هستءُ لوٹ أنت که جتائیءُ اختلاف جوڑ بکن أنت ، بلے ما را باید وتی کردارءُ گفتارءِ سُدّ ببیت تا دژمنءُ بدواهاں نَپ چست کت مکن أنت.

پارلمانءِ جاه گیراں په وتی حزبیءُ پاٹی نَپاں، دولتءِ دستءُ پاداں مه بند أنت

مولانا عبدالحمیدءَ ماں دگه بهرے چه جمعهءِ وعظاں چه مجلس شورای اسلامی (پارلمان)ءَ گله کتءُ گوشتی:مردمانی انتظار چه مجلس شورای اسلامیءَ إیش إنت که گوں تدبیرءُ امیتءِ دولتءَ همکاری بکنت، دولتءُ نماینده مردمانی گچینی أنت. گڑا چه جهگیرءُ نماینده یاں انتظار إنت که په وتی حزبیءُ پاٹی نپاں دولتءِ دستءُ پاداں مه بند أنت تا که دولت بتوانیت وتی وزیراں گچیں بکنت، بلے اپسوز إنت که لهتے نماینده، دولتءِ راه سرءَ ڈوکءُ سِنگ دور دینت تا که دولت مه توانت وتی کارانءَ دیمءَ ببارت.

مولانا عبدالحمیدءَ گوشت: مروچی پهکیں دنیاءِ چَمّ ایرانءَ سک أنت ، گڑا ما پهکاں خاصکار نمایندهءُ جهگیراں باید سک هژار ببئیں. من یکے چه ملکءِ مردماناں ءُ منءَ چه مجلسءَ گله هستءُ من زاناں إیرانیاں، آیاں که ڈاکٹر روحانی إش ووٹ (رأی) داتگ ءُ بازینے چه آیاں که ووٹ إش نداتگ چه مجلسءَ انتظارش هست که گوں دولتءَ همکاری  بکنت سک مگریت تاکه دولت بتوانت وتی وزیرانءَ گچین بکنتءُ میدان إش بیاریت.

مردمانءَ “اسید پاشگ” ترندروانی کار إنت

زاهدانءِ جمعهءِ پیشنمازءَ په لهتے جنینانی اسیدپاشگ ماں اصفهانءَ اشاره کت ءُ گوشتی:اصفهانءِ اسید پاشگ تندروانی کار إنت که باید آیانی دیم گِرگ ببیت، إے کار بدینءُ سِلّیں کارے أت. إشاں گوں وتی إے کارءَ مزنیں بدنامی إے په مئی ملکءِ مردماں جوڑ کت.