نواز شریفءِ پریشانیاں گِیش بُوان أنت

دو هپتگءَ گیش إنت که پاکستانءِ پایتختءُ لهتے دگه شهراں، اعتراضءُ زهرشانی نواز شریفءِ خلافءَ برجاه إنت.

په سنی آنلاینءِ هالکاریءَ نواز شریف، پاکستانءِ مزن وزیرءِ دو مخالفیں پاٹءُ گلّ،گیش چه دو هپتگ إنت که ماں پاکستانءِ هُشکنات (پایتخت) ءُ لهتے دگه شهراں په  مزن وزیرءِ خلاف ءُ آئیءِ چِست کنگ چه مَزَن وزیریءَ یک توار بوتگ أنتءُ اعتراض ءُ زهرشانی إش برجاه داشتگ.

گوستگیں هپتگءِ شنبهءِ روچءَ (8شهریور)ءَ نواز شریفءِ مخالفءُ نه مَنّوکاں دیمروی کتگءُ تا دولتی بنگله یاں دیمءَ شُتَگ أنت.
نواز شریفءِ مخالفاں دوشنبه(10شهریور)ءَ رند چه جنگءُ درگیری گوں أمنِیَّتی واکءُ فوجیاں دیمءَ شُتَگ أنتءُ پاکستانءِ راڈیو ٹلویزیونءِ کارجاه (مرکز)إش کمِّیں وهدےءَ إشغال کتگ تا وتی توارءَ شرتر په اسلام آبادءِ کارمستراں سَر بکن أنت.
لهتے رسانکانی هالءَ چه دوشنبهءِ درگیریءُ گِرءُ گِیشّاں 3 نفر کشکءُ گیش چه 500 نفر ٹَپّی بوتگ، که لهتے فَوجی ماں ٹَپّیانی ردءَ گندگ بوتگ أنت.
بازینے چه إے مخالفاں گوستگیں هپتگءَ چه لاهورءَ آتکگءُ ماں اسلام آبادءِ تهءَ گوں مخالفاں هور بوتگ أنت.
مخالفاں دو پاٹ أنت که یک پاٹےءَ “طاهر القادری” رهشونی کنتءُ دومیءَ “عمران خان” کریکٹءِ پهلوان، که إے دو سیاسی گلّاں دولتءَ هرابکاریءِ تهمتءُ ٹپّهءَ جَن أنتءُ مستریں لوٹ إش “نواز شریف”ءِ کِرکنگ چه مَزَن وزیری إنت.