- سنی آنلاین - http://sunnionline.us/balochi -

حضرت ابوذر غفاری رضی اللہ عنہء اسلام

حضرت ابوذر غفاری رضی اللہ عنہ مشہوریں صحابی ایت کہ رندترء آئیء شمار چہ مزنیں زاھداں و مزنیں عالمانء بوت

حضرت علی کرم اللہ وجہہء ارشاد انت کہ ابوذر غفاری رضی اللہ عنہ انچیں زانوکے انت کہ دگراں چرائی حاصل کنگء عاجزانت بلے آئیء ایشرء محفوظ داشتگ وہدے آئیء رسول اکرم صلی اللہ علیہ وسلمء نبوتء اولی اولی حال سربوت تو آئیء وتی براتء پہ احوالء پٹ و لوٹء واسطہ مکہء دیم دات کہ ہر کس اے دعوی کنت کہ منی گورء وحی کئیت و آسمانی حبراں سر بنت آئیء احوالء معلوم بکن و آئیء کلامء شرّیء گوش بدار آئی مکہ مکرمہء اہت حال و احوال معلوم کنگء رند رفت وتی برات گشت کہ من آئرا خوبیں عادتاں و جوانیں اخلاقء حکمء درشان کنانء دیست و چہ آئی دپء یک انچیں کلامے اشکتوں کہ آ نہ شعرایت و نہ جادو و منتر گوشوکانی کلام انت۔
ابوذرء چرے گونڈیں گپء تسلی نہ بوت وت وتی اُرد بہ سفرئیگی بست و ماں مکہء سربوت و تِچکء ماں مسجدالحرامء شت۔ حضور صلی اللہ علیہ وسلمء را جاہے نیارتگ ات و چہ دگے کسء جست کنگء مصلحت نہ دیست دان بیگاہء ماں ہمے دابء راہ چاروک بوت بیگاہء حضرت علی کرم اللہ وجہہء دیست کہ یک پردیسی مسافرایت مسافرانی غریبانی خبرگیری و ایشانی حاجتاںء پورہ کنگ اے واجہانی رگانی توکا جاہ منندات پمشکا آئرا ماں وتی لوگء برتے مہمان داری کرت چوش جست کنگء حاجت نہ زانت کہ تو کئے و چہ کجا کائے و پہ چہ کارئےء آھتگے مسافرء چہ وتی نیمگء ہچ ظاہر نہ کت صحبء پدا مسیتء سر بوت و تمامیں روچ ماں ہمے جاورء گوازینت تا وت نشان دستء نہ کپت و جست چہ کسء نہ گپت۔
غالبا اشی سبب ایش بیت کہ گوں حضور صلی اللہ علیہ وسلمء دشمنیء داستاں باز مشہورت ات گوں واجہء دُچار کپوکیںء ہمک وڑیں تکلیف دیگ بوتگ ات آئیء حیال کت کہ راستیں حال معلوم نہ بیت و چہ بدگمانیء سببء مفتء تکلیف جدا سرء کپیت دومی روچء بیگاہء وہدء ہم حضرت علی رضی اللہ عنہء خیال کت کہ درآمدیں مسافرے ات سر ظاہر بہ ہرچ غرضےء ادا اھتگ زانا آئیء غرض دنیگہ تمام نہ بوتگ پمیشکا پدا دواری ماں وتی لوگء برتی شپء شام وارینت واپینت۔ مگر اے شپء ہم جست و پرسء نوبت نیاہت سیمی پشتء پدا ہمے صورت بوت نوں حضرت علی رضی اللہ عنہء جست کت کہ تو پہ کجام کارئیگی اہتگئے وتئی غرض چی انت، تو حضرت ابوذر غفاری رضی اللہ عنہء اولی سرء آئرء سوگند دات و قول گپت کہ آتچکیں و راستیں گپء جنت چرائیء بعد وتی غرض و مطلب بیان کت۔ حضرت علی کرم اللہ وجہہ گشت کہ بیشک اللہء رسول انت و صُحبء وہدے من سر گراں تو ہم گوں من سر بگر من ترا داں ہمائی جاگہ رسیناں بلے مخالفتء زور زیات انت پمشکا ماں راہء اگہ منارا یک انچیں مردمے ڈک دات کہ چرائیء بہ منی ہمراہیء سببء خطرہ بہ بیت تو من پہ آپ دستے نیمونء ننداں یا وتی کوشانء شر کنگء گلائش باں تو گڑا مدار و تچکء برو تا کہ دگہ کس زانت مکنت کہ تو منی ہمراہے۔
چنانچہ صُحبء حضرت علی کرم اللہ وجہہء رندء روانء حضور صلی اللہ علیہ وسلمء خدمتء سر بوت۔ اودا گپ وتران بوت ہما وقتء مسلمان بوت حضور اقدس صلی اللہ علیہ وسلمء آئی تکلیفء خیال دارانء فرمائینت کہ وتی اسلامء انوں پدرا مکن گوں خاموشیء وتی قوم و راجء برو وہدے مئے غلبہ زور بیت گڑا آوہدء یا آئیء عرض کت یا رسول اللہ صلی اللہ علیہ وسلم ہما ذاتء سوگند انت کہ منی جان بہ ہمائی قبضہء انت کہ اے کلمہء توحیدء ماں ہمے بے ایمانانی مچیء تہا گوں جارء واناں چنانچہ ہما دمانء مان مسجدالحرامء شت و سر بوت و گوں بُرزیں آوازء (اشھد ان لا الہ الااللہ و اشھد ان محمد رسول اللہ) ونت گڑا چہ بوت کہ چہ چاریں کنڈاں مردم جم بوت انت و ہمنکراش جت کہ مرگء قریب بوت، حضور صلی اللہ علیہ وسلمء ناکو حضرت عباس رضی اللہ عنہ کہ آدنیگہ مسلمان ہم نہ بوتگ ات آئیء رکینگء خاطرء آئیء سرا وتء دور دات و گوں مردماں گوشتی باریں چشیں ظلم چیا کن ات اے شخص چہ غفاری قبیلہء انت و اے قبیلہ ملک شامء راہء نندوک انت شمئے تجارت و کاروبار گوں شامء ملکء انت اگہ اے مرت شامء رو و آبند بیت برشیء آ مردماں فکرء کپت انت کہ چہ ملک شامء مئے تمام ضرورتء چیز سرجم بنت اودء راہء بند بوگ پہ ما مصیبت ثابت بیت پمیشکا مردء یلہ دات اش دومی روچء پدا ہمے دابء ماں مسجدالحرامء سر بوانء گوں ترندیں توارء کلمہ وانت و مردمانء اے کلمہء اشکنگء برداشت نہ بوت، پمشکا آئیء چکّء کپت انت دومی روچء ہم حضرت عباس رضی اللہ عنہ ہمے دابء آیانء سرپد کناںء یک کرّء کنائینت انت کہ تجارت راہ بند بنت۔
ف: چونکہ حضور صلی اللہ علیہ وسلمء اے ارشادء باوجود کہ وتی اسلامء چیر بدئے آئی اے عمل اے حقء درشانیء و لولہ و غلبہء شون دیوک ات کہ وہدیکہ اے دین برحق انت تو کسی پتء کجام اجارہ داری انت کہ چہ آئیء ترسء حقء چیر دیگ بہ بیت حضور صلی اللہ علیہ وسلمء منع کنگ چہ شفقتء سبب ات کہ ممکن انت تکلیف برداشت کنگ متوانیت و اگہ نہ حضور صلی اللہ علیہ وسلمء وت ماں دینء تالاں کنگء ہمک وڑیں تکلیف برداشت کنگ ات پمشکا ابوذر رضی اللہ عنہء سکیں راہےء سرا عمل کنگء بدلء حضور صلی اللہ علیہ وسلم جندء راہ بندء سرا عمل کنگ ترجیح دات ہمے یکیں چیزات کہ چرائی برکتء ہمک قسمء دیمروی دینی توری دنیاوی صحابہ کرام رضی اللہ عنھمء قدمانء شرفدار کنگااتنت و ہمک میدانء ماں ہمایانی قبضہ ات کہ ہرچ شخص ہم یک برے کلمہ شہادتء وانانء اسلامء برکء چیرء اہتگ ات گڑا مسترء چہ مستریں قوت ہم آئرا جلّوک و داروک نیست انت و نہ مستریں و زوراکیں ظلم چہ دینء تالانیء دور داروک ات انت۔
رضی اللہ عنہم و ارضاہم

 

از فضائل اعمال: شیخ الحدیث مولانا زکریا رحمہ اللہ
بلوچی رجانک: مولانا خیر محمد ندوی رحمہ اللہ
سرچمّگ: راستیں راہ