امام احمد بن حنبل رحمہ اللہ

نام: احمد بن محمد بن حنبل
کنیہ: ابو عبداللہ
قوم و ٹک: بنی شیبان
۱۶۴ہجریء بغدادء ماں جہانء ودی بوتگ، وتی زندء سیمی سالء پتء ساہگء زبہر بوتگ، اے روچاں کہ امام صاحب ماں بغدادء ودی بیت اے دمگ پہ علم و ادبء نامی تریں ڈیہہ و دمگ بوتگو نامی ئیں عالم و محدث ہمدا جاہ منند بوتگ انت۔

کسان سالیء قرآن کریمء حافظ بوگء سعادت نصیب بوتگ، نوکی زندگی چہاردہمی سالء پہ حدیثء وانگء ایرکپتگ، امام احمد بن حنبل گوشیت کہ آئیء حدیث تہا اولی استاد امام ابویوسف انت و اے واجہ امام اعظم امام ابوحنیفہء شاگرد و مکتبی انت۔
امام احمد بن حنبل رحمہ اللہ وہدے کہ ماں بغدادء جامع مسجدء وتی درس و تدریسء دیوان جم کنت گڑا آئیء دیوانء تاں پنج ہزار مردماں حدیث گوش داشت کہ اشانی تہا پنچصد نفر وانوک و نبیسوک اتنت۔

امام احمد بن حنبلء شاگرد و مکتبی
چونائی چہ اے واجہء علمی فائدہ چست کنوکانی حساب و اندازہ سک بازانت، بلئے مشہورتریں نام امام بخاری و امام مسلم و ایدگہ صحاحء واجہانی نام انت۔
امام احمد بن حنبل رحمہ اللہ انچیں انسانے بوتگ کہ گیشتر وہداں آئی دعا جاہ پہ جاہ قبول بوتگنت و آیاں وتی اثر پیش داشتگ، یک برے واجہء خدمتء یک مریدے گریوان ات و عرضے کرت کہ واجہ منی ماتء دست و پاد ہشک بوتگنت من باز پریشان اوں تو دعا بکن کہ اللہ تعالی منی ماتء شفا بدانت چیا کہ ما ہمک وڑیں علاج و درمان کرتگ بلے ہچ پہ ہچ، وہدے امام احمد بن حنبل دعا کرت اے مردم تا وقتے کہ لوگء شُت و دیستے کہ ماشاء اللہ مات پورہ وش و صحت مندانت و نشتگ۔
امام احمد بن حنبل رحمہ اللہء بزرگی چہ ادا جاہ کئیت کہ وہدے آئی جنازہ مردمانی کوپگء دیم پہ قبرستانء روگء ات، گڑا مردماں دیست کہ بالی مرغاں وتا آئی جنازہء سرا دور دیان انت و پِری پِری کنگ انت، امام احمد بن حنبل رحمہ اللہء جنازہء اے دابیں جاورء گندگء ہمے یکیں روچء دوازدہ ہزار کافراں اسلام قبول کرت۔
قرآن کریمء یک یک حکم و رسول اللہ صلی اللہ علیہ وسلمء یک یک سنت آئی زندہ داشتگ انت و آیانی سرا کار بند بوتگ، قرآنء عشق و شوقء اندازہ اے بوتگ کہ ہر ہفت روچء یک برے لازم قرآن کریمء تلاوت مکمل و سرجم کرتگ۔
ابوبکر مروزی رحمہ اللہء شاہدی انت کہ من چار ماہ گوں امام احمد بن حنبل رحمہ اللہ ہمراہ بوتگوں یک روچے من نہ دیست کہ واجہ قرآنء تلاوت مہ کنت و یک شپے ہم من نہ دیست کہ تہجدء نماز موانیت۔

امام احمد بن حنبل رحمہ اللہء اساتذہ
امام احمد بن حنبل رحمہ اللہء اولی استاد امام اعظم ابوحنیفہ رحمہ اللہء خاصیں شاگرد امام ابویوست انت، ہمے دابء امام حنیفہء دومی خاصیں شاگرد امام محمد ہم واجہ امام احمد بن حنبل رحمہ اللہء استاد انت، چہ اے دوئیں واجہانی علاوہ امام ہیثم بن بشیر اے بزرگوارء استاد انت و اے دابء واجہ امام احمد بن حنبل رحمہ اللہ امام شافعی رحمہ اللہء ہم شاگرد انت۔

امام احمد بن حنبل رحمہ اللہء دست نوشتیں کتاب
چو و امام صاحبء بازیں کتاب و رسالہ و فتوی نبشتہ کرتگ بلے مسند احمد، کتاب الزہد، کتاب الناسخ و المنسوخ، سک مشہور انت، اے گپ ہم است انت کہ گوشنت مسند احمدء تہاسی ہزار حدیث شامل انت۔

وفات
آخر انچوش کہ اللہ رب العزتء مرضی انت کہ ہر زندہ جانےء یک روچے موت انباز کنوک بیت، امام احمد بن حنبل رحمہ اللہ ۷۷ سالء عمر چہ دنیاء روت، چہ وفات و بیرانیء ساری یک طبیب و حکیمے آرگ بیت، آ وہدے امام صاحبء چاریت گڑا ہمے جواب دانت کہ چہ بازیں فکر و غماں اے واجہء جگر و گُٹگّ، آش و موش بوتگنت،
ربیع الاول سنہ ۲۴۱ ہجریء دنیا یلہ دات و ماں بغدادء درپ و جاہ بوت۔
وفاتء رند چہ واجہء خاصیں دوست و سنگتاں یکےء وابء دیست و جست کرت کہ باریں گوں تو چے بوت، گوشتے منا اللہ تعالیء جست کرت کہ احمد زندگیء تو پہ کئے اے اندازہ جنجال و تکلیف برداشت کرتگ؟ من عرض کرت اے رب تعالی تئی خاطرا، گرا منا چہ اللہ تعالیء دربارء گوشگ بوت کہ ہمے سببء ما تئی مغفرت کرتگ۔
رحمہ اللہ رحمۃ واسعۃ

سرچمّگ: راستیں راہ