رسول اللہ صلی اللہ علیہ وسلمء ہجرتء ہفتمی سال ات، و خیبرء جاہمنندیں یہودی، روچ ے، یک فیل بازی و کلپی ے، راہ دور دیگء اتنت، و رسول اللہ صلی اللہ علیہ وسلم و آئی یلیں ہمراہانء ہر پیما پریشان کنگ اشانی ہمک روچی کار ات، آخر کار پہ اللہء حکمء رسول اللہء گوں وتی بیل و یاراں خیبرء سرا اُرش کرت و ہمدا کہ جنگ ہلّتت و سوبء مال بہر بوگا اتت دوسء ورنائیں مردے کہ ابوہریرہء نامء نام گپتت اہت و وتی اسلامء جار پِرّینت۔
ابوہریرہء قوم دوس ات کہ مدینہ منورہء کش و گورا آبادات مزن نام و شرفداریں عربی ٹکّے کہ وتی ملک و دمگ و مال و جائدادانی مالک ات وتی ہنکین و مالانء پہ وتی زہم و اسپرء زورا داشتت و چہ کش و گورء ہچ ٹک و قومےء ہچ چیزء کم نہ ات، اشانی سردار عمرو بن طفیل الدوسی وت و وتی راجا باز پیسر مسلمان بوتت بلئے عبدالشمس بن صخر تنے وہدے انگت اسلامء ساہگء چیرا نیاہتگ۔
توامیں کٹم یک پیریں ماتے و یک ورنائیں مردے کہ نوں وتی ورنائیء توامیں زور و بازوء حدء اہتگ و سر انت، نوں کہ اسلام قبول کرت ہمے مَرتے کہ ابوہریرہ تو دیر کرتگ و ہمے چیز زاناں اللہ تعالیء منظورات کہ ابوہریرہ ہمے کمیں روچاں کہ رسول اللہ صلی اللہ علیہ وسلمء دیوانء ہور و ثانی ببیت ہمے روچ آرا بس انت و ہمے ابوہریرہ یک روچے اے آسمانء یک تپناک و نمیرانیں استارے بیت کہ جہان تاں ہستنت، اے استارء شہم و نورا روشن بیت۔
رسول اللہ صلی اللہ علیہ وسلمء اسلام قبول کنگء وہدا نام جست کرت، عرضے کرت: عبدشمس، رسول اللہء فرمان کرت عبدشمس نا، عبدالرحمن، مروچیء رند تئی نام عبدالرحمن انت و ہمے عبدالرحمن ابوہریرہ بوت چیا کہ کسانیء آئی گوں وتا پشی ئی گلّڑے داشتت و مدام ہرجا گونتے کش و گورء ہمراہ و ہمساہگاں ابوہریرہ نام بستت۔
رسول اللہ صلی اللہ علیہ وسلمء ہم پہ ہمے نامء توار کرت گڑا اے نام آواجہء جندا ہنچو دوست بوت کہ عبدالرحمن چیر بوت و ابوہریرۃ ظاہر بوت، رسول اللہء مبارکیں دیوانانی ہوری و واجہء مبارکیں گفتارانی گوشدارگء ہنچو درآورت کہ یک دمانے چہ واجہء دیوانء پاد آیگ پہ آئی مزنیں مصیبے ات، پہ آپ دست و دگہ ضرورے کارےء دراہتیں گڑا بر ترّگ تلوس اِت، و واجہء یک یک گپ و خبر یاد کرتنت، بلئے مدامی پژنیگ و افسوسی ات کہ من واجہء مبارکیں گپاں واشکناں بلئے منا یاد نبنت، چہ اے حالء تنگ و پریشان بوت و رسول اللہ صلی اللہ علیہ وسلمء خدمتء فریادے برت، یا رسول اللہ من تئی درّیں دانکاں یک پہ یکء گوشداراں و سرپد باں، بلئے پدا اے زوت چہ منی یاد و ہوشء درکاینت، رسول اللہء فرمان کرت ابوہریرہ وتی چادرا چیر گیچ، آئی وتی چادر زمینء سرا تالاں کرت، رسول اللہء گوشئے وتی مبارکیں چنک پُر کرت و ہمے چادرء سرا ایر کرتنت و ابوہریرہ رضی اللہ عنہء را فرمان کرت کہ اے چادرا پتا و وتی سینگء بدار، آئی ہنچُش کرت، نوں گوشتے کہ چہ اشی و رند من ہچ چیز فراموش نکرت۔
اے گپ مشہورانت کہ صحابہ کرام رضوان اللہ علیہم اجمعینء گیشتر حدیث روایت کنوک ابوہریرہ رضی اللہ عنہ انت، و ہمے پیما حضرت ابوہریرہء گوشگ انت، کہ چہ من فقط یک مردمےء گیشتر روایت کرتگ و آصحابی حضرت عبداللہ بن عمرو بن العاص رضی اللہ عنہما انت، چیا کہ اے واجہا یاد کرتگ و نبشتہ ہم کرتگ و ما ایوکء یاد کرتگنت۔
اے توامیں حقیقتانی ہوریء انگت حضرت ابوہریرہء روایت گیشتر انت و اشی سبب ایش انت کہ ابوہریرہ ہچ بر چہ مدینہء در نیاہتگ و عبداللہ بن عمروء بزرگواریں پت حضرت عمرو بن العاص یک برے طائفء والی بوتگ و دگہ یکبرے مصرء، گڑا حضرت عبداللہ گوں وتی بزرگواریں پتء ہور و ہمراہ بوتگ و آزمانگاں علمء مرکز حجاز شریف بوتگ، پمشا چہ حضرت ابوہریرہء گیشتر روایت ہست۔
حضرت ابوہریرہ رضی اللہ عنہ رسول اللہ صلی اللہ علیہ وسلمء مبارکیں دیوان و درّیں دانکانی ہنچیں نشہ ای ے ات کہ یک دمانے چہ واجہء دیوانء درنبوت یکروچے مدینہ منورہء نہادی [تجاری بازار]ء گوست، دیستے کہ مردم گرگء و دیگء انت و شور و کوکارانت، آئی اہت و اعلان کرت کہ شما ادا چے کنگء ات برواِت، مسیتء کہ رسول اللہء مال و میراث بہر بوگا انت گیشتر مردم شتنت، ابوہریرہ ہمدا اوشتات دیرنگوست مردم پدا اہتنت و گوشتش اودا و ہچ چیز بہر بوگا نہ ات۔
ابوہریرہ جست کرت کہ مسیتء کس نیستت گوشتش بلئے مردم باز ہستت لہتے نماز و لہتے ذکر و لہتے قران کریمء تلاوت و دگہ لہتے ہیل گرگ و یاد دیگء دست گٹ اتنت، بلئے دگہ مال و دولتے بہر بوتا نہ ات، ابوہریرہ گوشت رسول اللہء میراث ہمیش انت۔
چہ اسلامء قبول کنگء رند ابوہریرہ رضی اللہ عنہء دپء گپ مدامی ہمش ات، ’’الحمدللہ الذی منّ علی ابی ہریرۃ، بصحبۃ نبییہ محمد صلی اللہ علیہ وسلم‘‘ تمام تعریف زیب دینت یکّیں اللہء را کہ ابوہریرہء سرا وتی رسولء صحابی بوگء احسانے کرت۔
ابوہریرہ چہ وتی عملء ہمے پیشدا شتت کہ دنیاء ہچ چیزے چہ رسول اللہ صلی اللہ علیہ وسلمء دیوان و آئی مبارکیں گپاں قیمتی تر نہ انت پمشا ہچبر در نیاہت،۔
ابوہریرہ رضی اللہ عنہء طبیعتء تہا غریبی و خاموشی غالب ات، کٹمء تہا ایوکء گوں وتی پیر و عاجزیں ماتء زندء روچاں گوازینگء ات، اے روچاں وت و ماتء ہمک روچ اسلام و رسول اللہ صلی اللہ علیہ وسلمء بابتء بحث و جاک و دپ جنگ ات، ہر روچ وتی ماتء دعوت دنت، ماتی نوں دیر مکن و اسلامء قبول کن، آخر یک روچے مات سک زہر گپت و ابوہریرہ سک جت و چہ لوگء در کرت و رسول اللہ صلی اللہ علیہ وسلمء شانء سبکّیں خبر کرت، نوں ابوہریرہ تنگ اہت و گریوان بوت و رسول اللہ صلی اللہ علیہ وسلمء خدمتء حاضر بوت۔
رسول اللہ صلی اللہ علیہ وسلمء گریوگء سبب جست کرت، عرضے کرت یا رسول اللہ منی ماتء منا جتگ و چہ لوگء درکرتگ و تئی بابتء شرّیں خبر نگوشتگ، یا رسول اللہ تو دعا کن کہ اللہ منی ماتء چہ شرکء تہاریاں پہ ایمانء روشنیء در بکنت۔
رسول اللہ صلی اللہ علیہ وسلمء وتی مبارکیں دست چست کرتنت، ’’اللھم اھد اُمّ اباھریرۃ‘‘ گوں اے دعاء ابوہریرہ کہ ہچ پہ تیزیں گام راہا نشتگ پہ تچگ دیم پہ لوگا رہادگ بوت، باریں من ساریء سرباں یا رسول اللہ صلی اللہ علیہ وسلمء دعا پیش کپیت، لوگء سر بوت دیستے کہ لوگ چہ تہا بندانت و آپء رچگء توارانت، دروازگء ٹکّگء رند توارایت ابوہریرہ بوشت، و کمّے دیرا رند وقتے کہ دروازگ پچ بوت گندیت کہ ماتء غسل کرتگ ماتء ابوہریرہ بغلء گپت و گوشت منی چک بس انت، نوں من تئی خبر زرت، منا بزور وتی رسولء خدمتء ببر، ابوہریرہ رضی اللہ عنہ پدا گریوگء لگّت و وت و ماتء رسول اللہ صلی اللہ علیہ وسلمء خدمتء حاضر بوت، انگت گریوان انت، بلئے ہنّونیں گریوگ و پیسرء گریوگء فرق ہست، اولء غم و افسوسء گریوگ ات و نوں گل و شادانیء گریوگ انت۔
ابوہریرہ رضی اللہ عنہ بے ضرر و کسمرنجیں مردم، یک روچے رسول اللہ صلی اللہ علیہ وسلمء ہمراہیء جہادء سرگپت، ماتء اجازت ندات، ابوہریرہ رضی اللہ عنہء گوشت کہ تو اجازت بدئے ئے یا مدئے من جہادء روان، ابوہریرہء مات گریوان بوت و رسول اللہ صلی اللہ علیہ وسلمء خدمتء شت، یا رسول اللہ من پیرہ زال دگہ خدمت کار و دستبوجے منا نیست، ابوہریرہ گوشیت من جہادا رواں، رسول اللہ صلی اللہ علیہ وسلمء ابوہریرہ توار کرت و گوں ترندیء ہکّل دات و واپس کرت و فرمان کرت برو وتی ماتء خدمتء بکن گڑا ابوہریرہ برترّات۔
حضرت ابوہریرہ رضی اللہ عنہء ہمیشہ ورنایانء ہمے سکین دات کہ وتی مات و پتانی خدمتء بکن اِت و آیانی خبراں بزورات۔
حضرت ابوہریرہ رضی اللہ عنہ چند بار مدینۃ النبیء والی و استاندار ہم نام گپت بوتت، بلئے ہچ بر آئی درویشی و فقیری و روشن دیمیء فرق نکرت، ہمے روچاں کہ مدینہ منورہء والی ات وت جنگلء شت و سوچگی دار چت و آورت، نہ غلامے نہ کاردارے نہ دگہ چیزے۔
ابوہریرہ رضی اللہ عنہء گوشگ انت کہ من کسانیء یک نامداریں عربےء ہشترانء چارینت و آئی لوگء خدمت کرت و آئی کستر پاد و دسبوج ات ءُں، اللہء منی سرا ہنچیں روچے آورت کہ ہمے نامداریں عربء جنک منی لوگی بات، حالانکہ آروچاں اے سردار و رئیسء زاماتی ہر کس دلی واہگ ات، بلئے اے درہا چہ رسول اللہ صلی اللہ علیہ وسلمء خدمت و ہمراہیء منارستنت۔
رسول اللہ صلی اللہ علیہ وسلمء زمانگء پہ شد و گژن و تکلیف و سکّی زندگی گوازینوکیں ابوہریرہ ہچبر مال جم نکرت و سیدنا عمر بن الخطاب رضی اللہ عنہء زمانگء چہ ہر کجا فتح بوتگیں دمگانی مال و اسباب جمع بوت و مسلمانانی سرا بہر بوتنت و چوناء ہر یک صحابی ے سخی و دست پچ اَت، بلئے ابوہریرہ چہ اے مال و اسباباں پہ وتا ہچ نداشت، یک روچے پہ امتحان چہ خلیفہاں یکےء پہ حضرت ابوہریرہ رضی اللہ عنہء لہتے سہرء سکہ دیم دات، گوں رسگء شرطء حضرت ابوہریرہ رضی اللہ عنہء اے توامیں سہر بہر کرتنت و ہورکیں دستء نشت، سہبء ماہلّا خلیفہء ہمے سہر پدا لوٹت انت و گوشتے اے دگرےء دگی بوتگنت کہ پہ ردی تئی گورا آرگ بوتگنت، پمشا اشاں واپس کن، ابوہریرہ رضی اللہ عنہء گوشت منا افسوس انت کہ من اشانء وتی مال و حق زانتگ و دوشی ختم کرتگنت نوں چہ منی ماہانی مقرریں خرچء حسابش کن، ہمے پیمیں دہ بازیں واقعات و قصہے ہستنت کہ بیان کننت کہ اے درویش تبیں صحابیء وتی زند پہ اللہء حکمانی زندہ دارگ و دینء تالاں کنگ و قرآن و حدیثء تعلیمانی تالاں کنگء گوازینت۔
[چہ کتاب یاران پیامبرء زرتگیں]
سرچمگ: راستیں راہ