تپاكي و همدلي و عدالتءِ اجرا هر حكومتےءِ‌ پابرجاهيءِ نشان إنت

مولانا عبدالحميدءَ ماں بهرے چه جمعهءِ (18 بهمن 1392 / 7 فرورى 2014)ءِ گپاں گوں اشاره په دهه فجرءِ آيگءَپرمائينتي: ايرانءِ اسلامي انقلاب، ماں جهانءَ اولي اسلامي جُنز أت كه پهكيں راج و مذهباں، مكتبياں، وانوگر و نودربراں گوں جمهوري اسلاميءِ‌ بنيادگرءِ سروكيءَ ماں إے انقلابءَ بهرإش زرت، حتي كسانے كه مسلمان نه إتنت و ديندوست هں نه إتنت په انقلابءِ سوبيں بوگ و پيروزيءَ كمك إش كت. پچے كه ايرانءِ راجءَ زانتگ أت كه ملكءَ چه فردي و شخصي حكومتءَ درآيگ لوٹيت و نيازإنت كه يك تحول و تبديلي إے ببيت تا كه ملت بتونيت وتي سرنوشتءَ گوں وتي دستءَ تعيين بكنت.

زاهدانءِ اهلسنتءِ جمعهءِ پيشنمازءَ پرمائينت: ايرانءِ‌ملتءِ جنز و باهند إے دورءِ مزنتريں قيام و باهند و يك بے نظيريں باهندے أت كه ايرانءِ ملت گوں تپاكي و همدليءَ پادآتك أنت. هما پيمءَ كه إے انقلابءَ په ايرانءِ راجءَ سربلندي و عزت آرت و ايرانءِ‌راج ماں دنياءَ زندگيں و آگاهيں راجے پجاه آرگ بوت، إے انقلابءِ پابرجاهي ماں تپاكي و پلامرزي وحمايت چه راج و مذهبان و چاگردءِ سرجميں مردمان إنت.
مني نزّءَ هما وڑءَ كه تپاكي و همدلي و عدالتءِ اجرا، حكومتءِ پابرجاهيءِ مزنتريں سبب أنت، ناتپاكي و اختلاف هں مزنتريں پاترپ و تهديد په هر حكومت و نظامے إنت.
زاهدانءِ اهلسنتءِ جمعهءِ خطيبءَ ديمءَ پرمائينت: عدالت وبرابريءِ اجرا تونيت هر حكومت و نظامےءَ پابرجاه بداريت. گڑا پهكيں واك و دست اندركاراں، عدالتءِ كشك و راهءِ سرءَ گام بزورأنت، پچے كه الله تعاليءَ اعتدال تاييد كتگ و مئي دين اعتدالءِ دين أنت و افراط و ترندروي په مئي ملكءَ مزنيں تاوان وخطرے زانگ بيت.
مولانا عبدالحميدءَ “فساد”ءَ مزنتريں پاترپ وتهديد په ملكءَ زانت وپرمائينتي: مني هيالءَ مزنتريں پاترپ په ايرانءَ “فساد”إنت كه بايد اداري فساد و لالچ و رشوه واري گار كنگ ببنت. فسادءِ گاركنگ په پهكيں واك و ذمه داراں لازم إنت. گڑا كسانے كه ماں فساد و بيت المال و خزانهءِ لوٹگ و پلگءَ دست إش بوتگ، بايد چه قانونءِ راهءَ درگيجگ و ببنت و بيت المال په ملتءَ‌پچترينگ ببيت.
واجهءَ راج و قوماني حقوقءِ بارهءَ پرمائينت: بايد پهكيں راج و قوماں په يك چمے چارگ ببنت. إے حزب و پاٹاں فرصت أنت و تهديد نه أنت، بلے نبايد مئي ملكءِ‌تها حزبي و پاٹي درگيري وجنجال ببيت، بلكيں بايدإنت يكادگرءَ برداشت بكن أنت و بايد ملتءَ دورچاري ببيت، گڑا ايرانءِ ملت تونيت كه يك سربلند و عزت داريں راجے ببيت و راهي روشن ببيت.
زاهدانءِ اهلسنتءِ جمعهءِ‌پيشنمازءَ پهكاني په بهرزورگ ماں 22 بهمنءِ روانك وراهپيمائيءَ تاكيد وتوصيه كت.
سرمايه داراں بے هچ ترسےءَ ماں استانءَ سرمايه گذاري بكن أنت.
مولانا عبدالحميدءَ ماں وتي گپاني آسرءَ گوں اشاره په “استانءِ توسعه وسرمايه گذاريءِ ديوان”ءَ كه گوستگيں هپتگءَ برجم دارگ بوت پرمائينتي: تدبير واميتءِ‌دولت يك اعتدال دوستيں دولتے و چه ملتءِ سرمايه گذاريءَ حمايت كنت. گڑا سرمايه داراں بے هچ ترسےءَ استانءِ تها ماں هر بهرےءَ سرمايه گذاري بكن أنت تا چه إے راهءَ هم وت نپ و كٹ بگرأنت و هم إے دگه مردماں سركار بنت.