شيخ الإسلام مولانا عبدالحميد، ماں استانءِ “سرمايه گذاري وتوسعه”ءِ ديوانءَ (دوشنبه14بهمن / 3 فروری 2014) كه گوں راج كماشءِ اولي دستيار ولهتے چه وزيران وبازيں استاني وكشوري ذمه دارے كه ماں زاهدانءِ فردوسيءِ تالارءَ برجم دارگ بوت، اولءَ مهماناني وش آتك كت ودههءِ فجرءِ بارهءَ پرمائينتي: إيرانءِ مزنيں انقلاب اولي واهگ أت كه رند چه بازيں قرنےءَ گوں ايرانءِ مردماني همشوري وهمدليءَ پوره بوت.
مولانا عبدالحميدءَ استانءِ سيستان وبلوچستانءِ بارهءَ پرمائينت: استانءِ مزنتريں سرمايه آئيءِشريفين ودينداريں مردم ومهلوك أنت كه براتي وتپاكيءِ لوٹوك أنت.
خدادادي منابع ومعادن يكے دگه چه استانءِ سرمايه يان أنت، پيسرا إے استان يكے چه ملكءِ مالداري جاهاں بوتگ، بلے هشت سال قحطي وڈكّالءِ سوبءَ إے ملكءِ مالداري باز ضعيف بوتگ، اگرچه استان كشاورزيءِ لحاظءَ كم آپ ودشتءِ گورءَ إنت، بلے بازيں توانے په كشاوزيءَ داريت، همے پيمءَ معدني لحاظءَ إے استان باز ديما إنت وملكءِ توكءَ بلكيں اولي درجهءَ داريت ومستريں معدناں ماں إے استانءَ هست أنت.
واجه مولانا عبدالحميد كه آئيءِ گپاں گوں ديوانءِ نندوكاني شاباش ديگءَ همراه إتنت گوشتي: استانءِ سيستان وبلوچستانءَ آپي وخاكي مرز هست وإے مرزاں همينچو مهم أنت كه اگه يك روچے دژمن ملكءِ پهكيں مرزاں ببنديت، بلے ذے مرزءَ بست نكنت، پچے كه إے استانءِ شرايط هنچوش أنت كه مرزاني بندگ په دژمنءَ باز سك إنت، إے مرز تونيت كه ملكءِ پهكيں ورگي چيزاني بند وبستءَ بكنت.
زاهدانءِ اهلسنتءِ جمعهءِ پيشنمازءَ استانءِ مشكلاني بارهءَ پرمائينت: پچے استانءِ صنعت چه كار كپتگ وصنعتي شهركاں بے كار أنت؟ پچے چه استانءِ كشاورزي استعداداں وچه مرز ومعدناں بهر زورگ نبيت؟ پچے ملدارں كمك كنگ نبنت؟ إے پهكيں مشكلاتءِ سبب إشنت كه انگتءَ استانءِ سرا وش كار نبوتگ، شريں مديريتے نبوتگ كه مشكلاتءَ مديريت بكنت وچه توليدكنوكاں ديمپاني بكنت، مستريں سياست په يك ديما شتگيں ملكے إشنت كه چه توليد كنوكاں ديمپاني بكنت. تدبير واميتءِ دولتءَ گوں وت اميت آرتگ، وچه روچے كه كاري شروع كتگ إے استانءِ مردماں اميت وار بوتگ أنت كه إن شاءالله گوں تدبير وتپاكي و صحيحيں مديريتءَ مشكلات حل كنگ ببنت.
دارالعلوم زاهدانءِ كار مسترءَ پرمائينت: إے استانءِ مردماں كه وڑ وڑيں قوم و مذهب أنت وگوں يكادگرءَ نزيكي وسيادي إش هست، گڑا بايدنت كه إے مردماں ماں پهكيں كارگس واداره ياں همكوپگ ببنت. اگه إے مردم يكادگرءِ كِرّءَ ببنت هچكس نتونيت كه آياني ميانءَ ناتپاكي پيداگ بكنت.اگه پهكيں دنيا نا امن ببيت، بلے إے استان وتي امنيتءَ چه دست ندنت.
واجهءَ چه تدبير واميتءِ دولتءَ په تجربه كاريں استاندارءِ سركار آرگءَ باز باز منت واري كت وديم گور راجكماشءِ معاون،جهانگيري كت وگوشتي: شما وتي داتگيں وعده په توانمنديں استاندارے سر كار آرگءَ پوره كت.
شيخ الإسلام ماں آ سرءَ عزيزيں راجكماشي په إے استانءِ سرجنگ وچارگءَ لوٹائينت وپرمائينتي: استانءِ مردماں ماں ملكي ودر ملكي سياستاں چه آئيءَ حمايت كن أنت.