- سنی آنلاین - http://sunnionline.us/balochi -

رودرآتکی بلوچستانءِ بلوچاں وتی دومی اعتراضی روانک

رودرآتکی بلوچستانءِ بلوچاں وتی دومی اعتراضی روانک چه کراچی دیم په اسلام آبادءَ، په وتی گاریں نزیکانی درگیجگءَ بنگیج کت.
بازیں جهدکاریں بلوچ، پاکستانءِ واکاں دزگیرءُ گارءُ بیگواه کتگ.

په سنی آنلاینءِ گزارشءَ نقل چه پارسی العربیهءَ: گیش چه چنت هزار جهدکاریں بلوچ که ماں همے گوستگیں سالاں گارءُ بیگواه کنگ بوتگ أنت، آیانی سیادءُ نزیکاں وتی دومی روانک چه کراچی دیم په اسلام آبادءَ بندات کت.
إے اشخاص وتی اولی  750کیلومتری روانک ، گوستگیں نوامبرءِ ماهءَ چه شال(کوئٹه) بلوچستانءِ مزن شهر تا کراچیءِ شهرءَ انجام دات.
آیاں رند چه کراچیءِ مان بوگءَ ماں تاکارانی بنجاهءَ بیست روچءَ داشتءُ وتی کار رندگیری کت؛ بلے په وتی مرادءُ واهشتءَ نرس إتنت گڑا آیاں گوں ماماقدیر بلوچءِ سروکیءَ وتی دومی 1416کیلومتری روانک ، چه کراچی دیم په اسلام آباد پاکستانءِ مزن شهرءَ گوستگیں پنج شنبهءَ بنگیج کت.
إے بلوچانی اعتراضی گروپ، وهدے که ماں کراچیءَ په وتی سیادانی درگیجگءَ داشتگ أت، چه بازیں وزیر، سیاسی سروکانءُ مردمی حقانی جهدکارانی نیمگءَ چارگءُ گندگ بوتءُ وتی پلامرزیءُ حمایت إش چه إے گروپءَ جار جت.
عبدالله بلوچ یکے چه إے روانکءِ باسکاں گوں پاکستانی روتاک«دان»ءِ حالکارءَ گوشت: پاکستانءِ عالی دیوان چه کراچی تا اسلام آبادءَ مئی امنیتءِ ذمه داری زرتگءُ هنو ما کراچیءِ فیصلشهرءِ شاهراه إیں که پولیسءِ دو ماشین مئی اسکورت إنت؛ بلے بهرزوروکاں الّم نه أنت که آیانی امنیت باریں تا کدی برجاه دارگ بیت.
رودراتکی بلوچستانءِ بلوچاں مدعی أنت که گیش چه 18000چه آیانی سیاسی سروکءُ جهدکاراں پاکستانءِ امنیتی واکاں چه سالءِ 2001 تا هنو گپتگ. ءُ چه سال 2010تا 2013ءَ، 1700 دانگ عذاب کوشءُ سستگیں جون ماں بلوچستانءِ پٹءُ گیاباناں دست کپتگ.
پاکستانءِ مخالفیں بلوچاں گوش أنت: رند چه بریتانیاءِ واکانی درآیگ چه هندءَ چنت ملک ماں إے منطقهءَ جوڑبوت. برما، بوتاں، هندوستان، نپالءُ پاکستان. ءُ إے درمیانءَ بلوچستان هں باید وتواجهینءُ وتواکیں ملکے ببوتیں. همے واستا اگستءِ دوازدهم 1947مءَ بلوچستان هں وتی وتواجهیءَ جارجت؛ بلے پاکستانءِ نوکیں حکومت بے دلگوش کنگ په داتگیں عهداں وتی لشکرءَ اپریلءِ 1948ءَ بلوچستانءَ دیم داتءُ خان کلات دزگیر بوتءُ بلوچستاں، پاکستانی رستریں واکانی دستءَ کپت.
هنو«گاریں بلوچانی توار» که آئیءِ سروک ماما قدبر بلوچ إنت مزنیں باهندءُ زرمبش بنگیج کتگءُ چه سر جمیں مردمی حقانی پاسباناں  کمکءُ پله مرزی لوٹوک إنت.
ماما قدیر إے باهند کنوکانی سروک گوشیت: مارا دراجیں راهے دیمءَ هستءُ بازیں مشکلءُ نگیگی إے مئی راهءِ سرءَ هست چوشکه هر روچے تهدیدءُ پاترپاں که چه پاکستانی واکاں په ما رسنتءُ گوشنت: وتی باهندءُ زرمبشءَ انگار کن إت.
بلوچانی مردمی حقوقءِ جهدکاراں گوش أنت: پاکستانءِ حکومت بلوچستانءَ ممنوعیں منطقه جار جتگءُ ملکیءُ درملکی رسانکاں چه بلوچستانءِ مان بوگءَ منع کنگ بوتگ أنت
پاکستانءِ لشکرءُ امنیتی واکاں، بلوچانی اتهاماتءِ منّگ یا ردکنگءِ بارهءَ انگتءَ ساکت أنت.
دلگوش کرزیں گپ إشنت که 44%چه پاکستانءِ ملک، بلوچستانئیگ إنتءُ إے استاں پاکستانءِ مزنتریں استان إنت. همے پیمءَ  خدادادی گنجانی لحاظءَ یکے چه جهانءِ سیرتریں ملکان إنتءُ چه طبیعی معادنءَ مالامال إنت بلے ایوکءَ 6% چه پاکستانءِ 150میلیونی مهلوکءَ اودءَ زندگی کنگاإنتءُ إے استاں پاکستانءِ نیزگارتریں استان إنت.